Filimon 1 - Ecorit Aŋejuk 2003

¹ Ani alia Paulo, elle efita 'to ibabus te eram Kristo Yesu. Ani alia iko illa hohoi Timoteyo. Egiorok hohoi awaraga ana jio illa hohoi Felimon egiamani ihuo hohoi

² iko jio eluluŋ heruhok onno ottubatio 'to ihaŋ hoi, buo fe jio haniye hohoi Appiya iko Arkipos ollo odik 'to egiama bebe ihuo hohoi.

³ Ijiara Hollum Monye hohoi iko Yesu Kristo, Lamonye hohoi isiarani jihatai ayiji tajia iko elik tajia.

Abuaran taji iko Neruk Felimon

⁴ Esiorio ni ahumo jio Hollum buo fe agilutta iyye, Felimon, alla amojo ni,

⁵ nyio, etaniŋu ni abuaran taji hoi aati Hollum 'daŋ iko eruk hoi jio Yesu, Lamonye.

⁶ Amojo buo fe ni jio, ijiara etoŋo hohoi arabotie ikoye a heruhok iyaŋuno jihohoi amijana ono ayiji 'daŋ te enoso iko Kristo.

⁷ Nyio, illaŋ, iyaŋuno abuaran taji hoi jihoŋ amuno onno obolo iko elik tua! Itamuno iyye aati Hollum 'daŋ.

Attana te Eram Onesimo

⁸ Te eram ania, aremik duo ni iŋerejanio iyye ihuo lella to Kristo, iramaniere iyye jio, ihanie ihuo ojiori.

⁹ Ati ta abuaran taji hoŋ iyye, attana ni iyye 'tana. Ani Paulo, elle ifahu Kristo, buo fe ihuania efita te eram honyi.

¹⁰ Ania, attana ni iyye te eram Onesimo, lonyi hoŋ to Kristo. Nyio, anna awanari ni ihuania ibabus, ara ni jihonyi a monye.

¹¹ Berien ibeŋ nyia iyye igonyu obo ayiji jihonyi, ati ihuania, egonyu iyye ikoŋ ayiji honyi.

¹² Ihuania, enyiaha ni inyi ajihoi; obuor ataji hoŋ inyi bebe.

¹³ Awak duo ni luŋa inyi arasa jihoŋ dini, iluahiere ani imaji hoi buo ni hefita ibabus te eram sayyo ayijok.

¹⁴ Ati abeŋ ni awak irosonia iyye iluahiere ani. Awak ni ijiara iyye ihan ihuo iwak iyye. Tania, ettallik ni ihanio obo ariŋ arari fe elle iruk iyye.

¹⁵ Ara hara inyi ninyia obiaŋari Onesimo awanari jihoi obo kai jio, oŋida bati inyi ottu duloro ikoye.

¹⁶ Ihuania, abeŋ inyi ara apit ijiai, ati agalik inyi apit; ara inyi ella elle emuno bebe to Kristo. Oyyu inyi bebe ta taji hoŋ, ati agalik adi ayiji honyi jihoi bebe; nyio, ara inyi apit hoi buo fe ella hoi to Lamonye.

¹⁷ Tania, elle imijak iyye jio ira iyye ahegiamani ihuo ani, inyiaha ifuotuna inyi ihuo iremik iyye ifuotuna ani.

¹⁸ Elle ihan nyia inyi obo epali jihoi kuyya ohuru obo ariŋ jihoi, igiorok ahoros honyi ahonoŋ.

¹⁹ Ani Paulo, egiorok eram ana ta aani hoŋ: aduma adi ni iyye. (Abeŋ ni awak itagiluna iyye jio, ara amanya hoi a Kristiani toni.)

²⁰ Aafe, illaŋ, ihana ariŋ ania jihoŋ te eram Lamonye. Itamuno atua hoŋ ihuo ella to Kristo!

²¹ Enne egiorori ni ana, amijak ni luŋa jio, ihan adi iyye ariŋ anna awak ni. Amijak ni luŋa jio ihan adi iyye erre allaŋari hunna awak ni.

²² Oŋida buo fe ihuhumak jihoŋ obo amaji eyirit nyio, eyihi ni jio, te emojiti hatai 'daŋ aŋatani adi ani icohuniere jihatai.

Efonyita Etisidita

²³ Itifonya itai Epafra elle efita 'to ikoŋ ibabus te eram Kristo Yesu.

²⁴ Itifonyai buo fe egiamak ihuo nani; isi bo Marko iko Aristakos, buo Demas iko Luka.

²⁵ Ijiara ayiji taji ono Yesu Kristo, Lamonye hatawana jihatai 'daŋ.