Etaleyehina 1 - Ecorit Aŋejuk 2003

¹ Igioroni jio abuk ana erre hunyia italeyehi Yesu Kristo. Itifuotok nyia Hollum jihonyi aleyehino ania itahutaniere ejifak honyi erre hunyia iliahai 'to luŋa iduoŋ. Ifahu nyia Kristo ajilo honyi itahutaniere erre hunia jio egiamani honyi Yoane,

² elle iramak 'to erre 'daŋ hunyia igonyu inyi. Ekenita honyi huna, te eram sayyo Hollum iko nelahode enne italeyehi Yesu Kristo.

³ Hotomunohi lia, elle ihianak 'to ekenita Hollum hutto tua abuk ana jio aati! Hotomunohi buo fe hia, hulle itaniŋie 'to jio ekenita Hollum, buo fe oniŋie erre hunne igioroni jio abuk ana! Nyio, iliahai oŋitek hunno ofuarik erre hunia 'daŋ iduoŋ.

Amolie jio Eluluŋi Heruhok Huna Hattarik

⁴ Ani alia Yoane; egiorok ni jio eluluŋi heruhok huna hattarik hutta ŋati Asia. Hatawana jihatai ayiji taji iko nelik taji onno ottu 'to jio Hollum iko jio oloholioo huna hattarik hutto hosiere seger ilohittok honyi. Hollum, ollo owon 'to ihuania, linyia owon 'to berien, buo fe olo ittuna.

⁵ Hatawana buo fe jihatai ayiji taji iko nelik taji onno ottu 'to jio Yesu Kristo, asuut oloyijio, etteri jio hia hulle itubuhuni toye, buo fe ara elettok olo obuok hutta fau. Obuor ataji honyi hohoi, ette ihohina eyyata hohoi ta naye honyi likruce,

⁶ ette buo fe ihanana hohoi a hobuore hehumak, igiamari jio Hollum Monyonyi. Hatawana akuatan iko aduaran jio Yesu Kristo 'tulaŋ 'tulaŋ! Amen.

⁷ Imijiete, ollo ottu fe lia tedohuo! Igonyuni adi aati 'daŋ inyi; 'daŋ iko hia hunyia ocuhi 'to inyi. Oyyoo adi awoyo tulo 'daŋ ta fau te eram honyi. Ara adi luŋa ihuo nyia.

⁸ Ikiana nyia Hollum Lamonye, Laduarani, ollo owon 'to ihuania, linyia owon 'to berien, buo fe olo ittuna, jio, “Ani etteri iko ecuŋi.”

Aleyehino Kristo Ihuo Arigia

⁹ Ani alia illatai Yoane. Ta arahan hoŋ a hejifani Yesu, ettubanio ni arabotie ikatai idihuniere dee, ettigemita hunno onyurani hia hulla arai 'to a hulo Olobie honyi. Ihanani nyia nani iful anna anya 'to Patmos, te ettittoyo hoŋ eram Hollum iko elahode ninyia italeyehi Yesu.

¹⁰ To oloŋ ono Lamonye, inef nyia Oloholio ani, ette ni itayiruna obo etuk onno okuat ihua afuruju itayiruno tettehalu hoŋ,

¹¹ onno ojio jio, “Igiorok erre hunne igonyu iyye, osulsak abuk ania jio eluluŋi heruhok hutto borejin gala huna hattarik huna: Efeso, Simirna, Pergamum, Tiatira, Sardis, Filadelfia buo Laudisia.”

¹² Attati ni iyito imijiere ŋai elle ikiana 'to alia jihoŋ, ette ni igonyuna etawojita 'lomohien hattarik hunna arai ayyel.

¹³ Ihiji etawojita 'lomohien hunia, egonyu nyia ni obo ariŋ anna ara ihuo atulo, elle iyyafatio aboŋo onno ohodo buo ottodok agas 'yel isuhe honyi.

¹⁴ Obuori nyia oofir honyi biny biny ihua agutuny, kuyya ihuo eriri; buo oŋite honyi owulori hile hile ihuo eema.

¹⁵ Opipiahi nyia eejek honyi ihuo abilata enne ihumi ipuar buo fe ihumi ipot; buo etuk honyi itir ihuo ecuri hari.

¹⁶ Oŋuahatio nyia inyi elelefi hattarik ta aani iŋet honyi, buo ademi erremit onno ofi aŋacio arrihai ojiŋu to hutuk honyi; buo omom honyi afaŋ bebe ihuo oloŋ fanni.

¹⁷ Ninyia hégonyu ni inyi ihuania, ette ni iruboho ifau iger hejek honyi ihuo atulo alla aye. Ati, ottir nyia inyi ani ta aani iŋet honyi, ette jiaran, “Hèbaŋ! Ani alia, Ani etteri iko ecuŋi.

¹⁸ Ani alia esuoni! Aye nyia ni, ati ihuania, esu ni 'tulaŋ 'tulaŋ. Owoni buo fe eŋanyiti huno naye iko huno amaji hayaak jihoŋ.

¹⁹ Ihuania, igiorok ti erre hunne igonyu iyye; 'daŋ hunno owoni 'to ahana iko hunno ofuoi 'to iduoŋ moi.

²⁰ Inyi ana awoyo hiram ono elelefi hattarik, hunne igonyu iyye ta hani iŋet hoŋ iko etawojita 'lomohien hattarik. Elelefi huna hattarik, isi ajilohien hulo eluluŋi heruhok hattarik, buo etawojita 'lomohien hattarik, isi eluluŋi heruhok huna hattarik.