Ebrei 1 - Ecorit Aŋejuk 2003

Ekiana Hollum onno Ottu 'to tottolo Lonyi Honyi

¹ Berien, ikianatio nyia Hollum jio hohonyiok hohoi te etuhe hekianak honyi, enyiahita arriai iko te ekotia arriai.

² Ati jio oŋitek huttehalu huna, ikiana inyi jihohoi tottolo Lonyi honyi. Tenyi, oyyeu nyia Hollum edou iko afau. Onyimu nyia Hollum inyi jio, oŋida erre daŋ ofuoi irahan a hunonyi.

³ Itahutak tibuo inyi luŋa akuatan Hollum, buo fe orrijio hode iko Hollum. Ogottiere inyi erre daŋ huttedou iko hutta fau te ekiana honyi onno odua 'to. Ninyia italibo inyi aati 'daŋ jio eyyata, itoŋo inyi iŋati iŋet Hollum Laduarani, alla Agalik 'to 'daŋ.

Agalihina ono Lonyi Hollum

⁴ Agalik aduaran Lonyi ono ajilohien, buo fe arahan honyi Olonyi Hollum, agalik bebe elohittok ono ajilohien.

⁵ Alali ajilo nyia ollo ojio Hollum jihonyi jio: “Iyye lonyi hoŋ; nyio, ahana ara ni a Monyohoi?” Kuyya, alali nyia ollo ojio inyi jihonyi jio, “Ara ni a Monyohoi, buo iyye ira a lonyi hoŋ?”

⁶ Buo ninyia ajio Hollum efahu Oloŋeu honyi ifau, iramak nyia inyi jio; “Ijiara luŋa ajilohien hoŋ 'daŋ itahabuye inyi.”

⁷ Ati te eram ajilohien, ojio nyia Hollum jio, “Oyyeu nyia Hollum ajilohien honyi irari ihuo Oloyyami, buo fe oyyeu egiamak honyi irari ihuo aŋadiafa hima.”

⁸ Buo te eram Lonyi honyi, ojio nyia inyi jio: “Ira iyye a Hollum, osio adi olobie hoi 'tulaŋ mak! Ilohittok adi iyye jio aati hoi ta abisan.

⁹ Obuor atua hoi ariŋ onno obis 'to, buo oliwari enne ipal 'to. Ania, anyimuniere ni iyye, nani Hollum hoi, ette ni isiarana jihoi amuno anna agalik 'to bebe ono orriahat hoi.”

¹⁰ Ojio buo fe Hollum jio, “Lamonye, tetteri iyye nyia iyyeu afau, iyye nyia buo fe ta ahuan hoi iyyeu nedou.

¹¹ Otuhoroi adi isi 'daŋ, buo iyye idulo 'tulaŋ mak; imaruahi adi isi ihua aboŋojin.

¹² Ibubun adi iyye isi ihua akout amuarani, ette iduhara addi ihua aboŋojin amaruak. Ati ira iyye olosiohol, buo fe imanya 'tulaŋ mak.”

¹³ Hobeŋ Hollum ojio jio obo olo ajilohien honyi jio: “Itoŋoi tene totto ŋati iŋet hoŋ many ehananiere ni amiorok hoi ariŋ enne irriehiniere iyye eejek hoi.”

¹⁴ Haŋai ti ajilohien? Isi oloholioo hulle igiamai 'to jio Hollum. Ifahu Hollum isi iluahiere hia hullo ofuoi 'to italahuno.