3 Yoane 1 - Ecorit Aŋejuk 2003

¹ Nani alia Lahouti… Egiorok ni jio Gayos, alla amuno ni, ollo obuor ataji hoŋ hode.

² Illaŋ, alla amuno ni bebe, amojo ni jio ijiara erre ayijok hotodulohi ikoye. Ijiara buo fe ahuan hoi odulo ayiji…ihuo amijak ni jio oyyu oloholio hoi.

³ Amuno nyia ni bebe ninyia afuonni omuk Kristiani jihatai, ette iramana jihoŋ jio imanya iyye te elahode…ihuo enne iniŋiere iyye luŋa nelahode.

⁴ Obeŋ obo ariŋ enne itamuno 'to nani bebe, agalik etaniŋuna jio amanyai aduri hoŋ te nelahode.

Itahuye Gayos

⁵ Illaŋ, alla amuno ni, igottiere iyye luŋa ehanio onno oyyu jio Kristiani hullomuk, duadi bu itimo iyye isi.

⁶ Iramani isi jio eluluŋ heruhok eram ono abuaran taji hoi. Oduloi luŋa iluahio isi iculari ahosiere, ihuo awak Hollum.

⁷ Nyio, itterie nyia isi amomoriya igiamari jio Kristo, buo ihari efuotuna obo aluahio jio aati hullo obeŋi 'to arai aheruhok.

⁸ Tania, ijiara luŋa eluahio eruhok ihuo hulia, oŋida bati era 'daŋ arabotie ikosi a hegiamak hulo nelahode.

Diyotrifis iko Demetrios

⁹ Egiorok nyia ni awaraga jio eluluŋ heruhok, ati iha nyia Diyotrifis asiehina 'yaha jio eram awaraga ania. Nyio, awak nyia inyi ikafana ahuan honyi elettok hosi.

¹⁰ Tania, alla attu ni, alo adi ni salana ehanita honyi 'daŋ: etarrohojio fureta hohoi iko agesemita 'daŋ hunyia omuaŋari inyi hohoi! Obiaŋara nyia hunia ijiai; obeŋ nyia inyi ifuotutta Kristiani, buo fe itihotio hia hulla awahi 'to ifuotuna isi, ette buo fe wahan ifuhara isi addi to klesia.

¹¹ Illaŋ, alla amuno ni, hèjifatio ehanita 'rohojak, ijifatie ehanita yijok. Lia, elle ihanio 'to onno oyyu, ara inyi a holo Hollum; buo lia, elle ihanio 'to onno orroho, hobeŋ inyi omijak Hollum.

¹² Ikianai aati 'daŋ onno oyyu to Dimetrios, buo fe nelahode 'daŋ ikiana onno oyyu tenyi. Eruk buo fe hohoi eram ania. Imijana itai jio, obis ekiana hohoi.

Efonyita Etisidita

¹³ Oluaji erre hunna awak ni iramana iyye, ati abeŋ ni awak igioronia isi jio awaraga ana.

¹⁴ Egigilo ni, eliaha ni attuna jihoi, oŋida efuonni ikiana, nani ikoyye.

¹⁵ Ijiara nelik taji hatawana ikoyye. Itifonyai mottiarak hoi 'daŋ, iyye. Itifonyak mottiarak hohoi 'daŋ ababo.