2 Yoane 1 - Ecorit Aŋejuk 2003

¹ Ani alia Lahouti… Jio Aŋotte Nonyimoto iko aduri honyi hunno obuor ataji hoŋ luŋa. Obiaŋara ataji hoŋ hama obuor itai, ati, obuori buo fe atajia hia 'daŋ hullo omijani 'to nelahode.

² Nyio, odulo nelahode jihohoi, owon adi jihohoi 'tulaŋ.

³ Ijiara Hollum Monye iko Yesu Kristo, Lonyi Monye, isiarani jihohoi ayiji taji, amehino, iko nelik tajia; ijiara arai ahunohoi te nelahode iko ta abuaran tajia.

Nelahode iko Abuaran Taji

⁴ Amuno nyia ni bebe ninyia etayiru ni jio amanyai omuk aduri hoi te nelahode, ihuo ninyia ihumari Monye iramaniere jihohoi.

⁵ Ihuania, attana ni iyye, Aŋotte Nonyimoto: Ijiara abuaran taji owon ihiji hohoi. Abeŋ ni egiorok jihoi obo efahi aŋejuk; inyi fe ania efahi ninyia owon 'to jihohoi many tetteri.

⁶ Ojio awoyo hiram ono abuaran taji enne ekiana ni ania jio, ijiara luŋa ejifatio efahita Hollum. Ihuo itaniŋuna nyia itai 'daŋ tetteri, ojio efahi ania jio, ijiara luŋa emanya ta abuaran tajia.

⁷ Isarrari enyabak arriai afau 'daŋ; isi aati hullo obeŋi 'to iruhoni jio ara Yesu Kristo atulo. Aati ihuo hulia, hulla arai 'to a henyabak buo fe amiorok Kristo.

⁸ Ihumata ti mijio, ŋadi italitohina ariŋ enne egemu oŋida bati ifuotuna edumiti hatai 'daŋ hiny.

⁹ Atulo 'daŋ elle itallaŋ 'to ettiyenita Kristo, buo obeŋ ogottiere isi, obeŋ Hollum jihonyi. Buo lia, ollo ogottiere 'to ettiyenita Kristo, owon Monye arabotie iko Lonyi, jihonyi.

¹⁰ Tania, alla attu obo atulo jihatai, buo obeŋ ittiyenio ettiyenita hunia, hèfuotuna inyi ihaŋitek hatai. Hèfonyata buo fe inyi.

¹¹ Lia, elle ifony 'to inyi, iruk inyi ehanita atulo alia hunno orrohoji 'to hunia.

Ekenita Esidita

¹² Oluaji erre hunna awak ni iramana jihatai, ati abeŋ ni awak igioronia isi iwaraga. Egigilo ni ittuniere jihatai, ikianari ikatai ta ahuan hoŋ jio, oŋida bati amuno hohoi luŋa ottuba.

¹³ Itifonyai iyye aduri Haniyohoi nonyimoto.