2 Timoteo 1 - Ecorit Aŋejuk 2003

¹ Ani alia Paulo, elefahata Kristo Yesu ta awahan ono Hollum. Ifahuni nyia ani ittittoyere eram ono nesu ninyia ocorok Hollum, te enoso iko Kristo Yesu.

² Jihoi Timoteyo, elle ira 'to ihuo lonyi hoŋ alla amuno ni; ijiara Hollum Monye iko Yesu Kristo, Lamonye hohoi, isiarani jihoi ayiji, amehino iko nelik taji.

Ahumo iko Etagolita

³ Esio ni ahumo jio Hollum elle egiama ni jihonyi te egigilo onno olibo ihuo ninyia igiamarik hohonyiok hoŋ jihonyi. Esiarak ni ahumo jio Hollum ta aduloro hoŋ imojo teyye.

⁴ Alla agilu ni neyyoo hoi, ette atua hoŋ iwahan bebe igonyuna iyye jio, oŋida bati amuno ifut jihoŋ.

⁵ Agilutta buo fe ni elahode ono neruk hoi; neruk ninyia owon 'to jio hahanyihoi Lois iko jio honyohoi Yunis. Amijak ni jio, owon buo fe neruk ania jihoi.

⁶ Tania, eramak luŋa ni iyye jio, ijiara esiorio ninyia ifuotu iyye jio Hollum odulo awulori ihuo eema, to ninyia eyabaniere ni ahas hoŋ jihoi.

⁷ Nyio, obeŋ Oloholio enne isiarak Hollum jihohoi iyaŋuno abaŋi, inyiak tibuo oloholio ania itufutana jihohoi nagolon, abuaran taji iko ehum ittoŋotio huan onno oyyu.

⁸ Hèloriri ikianari eram ono Lamonye hohoi jio aati. Hèloriri buo fe toni, elle efita 'to ibabus te eram Kristo. Nyio; ta agolon enne isiarak Hollum jihoi, ifuotu buo fe ettigemita te eram ono Asayyo Ayijok.

⁹ Ta awahan iko ta ayiji taji honyi, italahu nyia inyi hohoi ette iloŋuna hohoi irari a hulonyi, obiaŋara te ehanita hohoi. Many hobeŋi oyyeuni afau iko edou, isiarak nyia inyi jihohoi ayiji taji ania to Kristo Yesu.

¹⁰ Ati ihuania, italeyehini inyi jihohoi ta attuna ono etalahani hohoi Kristo Yesu. Itapuak inyi agolon ono naye buo ette iyaŋuno nesu onno osio 'to 'tulaŋ ta Asayyo Ayijok.

¹¹ Onyimu nyia Hollum nani irari elefahata buo fe a hettiyanani, ittittoyere Asayyo Ayijok.

¹² Eram ania atibuo enne ittigemierek ani ihuania. Ati, abeŋ ni eloriri nyio, amijak ni eyyihi ni jio ŋai; amijak buo fe ni luŋa jio, oremik inyi ittoŋotio onno oyyu erre hunyia ihanak inyi ihas hoŋ.

¹³ Ogottiere eram ahode hode ninyia ettiyanak ni iyye; ijiara ara etahuti enne ijifatio iyye. Ogolik jio neruk iko abuaran taji hunna arai 'to a hunohoi te enoso iko Kristo Yesu.

¹⁴ Ta agolon ono Loholio Olibo, alla amanya 'to jihohoi, ogottiere erre ayijok hunyia ihanani ihas hoi.

¹⁵ Imijak iyye jio, ihari nani aati 'daŋ hutto ŋati Asia; isi arabotie iko Figelos buo Hermojins.

¹⁶ Ijiara Lamonye omehino jio aati hutta haŋ Onesiforo nyio, itamuno nyia inyi ataji hoŋ enyiahita arriai. Obeŋ nyia inyi iloriri awanan hoŋ ibabus;

¹⁷ buo ninyia afany inyi Roma, ette inyi ittifia nani imasik 'daŋ many orumaniere nani.

¹⁸ Ijiara Lamonye omehino jihonyi jio Noloŋ nyia! Imijak buo fe iyye bebe erre hunyia ihan inyi jihoŋ to Efeso.