2 Petro 1 - Ecorit Aŋejuk 2003

¹ Ani alia Simone Petro, egiamani buo fe ara elefahata Yesu Kristo. Egiorok ni jio hia hinyia ifuotuni 'to neruk onno orriama iko onohoi, ta abisan ono Yesu Kristo, Hollum hohoi, Etalahani.

² Ijiara ayiji taji iko nelik taji ofonihinie jihatai hiny hiny, ta amijana hatai Hollum iko Yesu, Lamonye hohoi.

Eloŋuna iko Anyimuna ono Hollum

³ Isiarak aduaran Hollum jihohoi erre 'daŋ hunne emanyari ta abaŋi Hollum. Isiarani nyia erre hunia 'daŋ jihohoi, ta amijana hohoi lia, linyia iloŋu 'to hohoi ifuotuniere akuatan iko ayiji ottononyi.

⁴ Isiarak inyi jihohoi esiorita hunna agalihini 'to bebe ta ayiji, hunyia ocorok inyi jio, oŋida bati enoso jio amanya ottononyi. Te esiorita hunia, eremik iris addi jio ewahiti fau hunno orrohoji 'to.

⁵ Tania, okiamata bebe ifonihiniere ayiji jio neruk hatai; buo jio ayiji, ofonihina olofioro;

⁶ buo jio olofioro, ofonihina attoŋotio huan, buo jio attoŋotio huan, ofonihina adihan, buo jio adihan, ofonihina abaŋi Hollum;

⁷ buo jio abaŋi Hollum, ofonihina amuno huattek, buo jio amuno huattek, ofonihina abuaran tajia.

⁸ Alla awoni asaŋ hunia jihatai buo fe itai imijana luŋa Yesu Kristo, Lamonye hohoi, ogolihini adi isi itajia hatai. Itaruhuli adi isi itai, ette ihum itageny itai.

⁹ Buo alla abeŋi isi owoni jihatai, irata itai ihuo atulo ollo osuk egigilo, ollo oguoro jio italibori nyia inyi jio eyyata honyi hunyia berien.

¹⁰ Tania, illarak iko haniyarak hoŋ, okiamata bebe bebe itahutaniere luŋa jio iloŋu Hollum itai buo fe onyimu itai. Elle ihanata itai ihuo nyia, ibiaŋata adi itai iruasara neruk hatai.

¹¹ Tania, aŋatani adi itai ijiŋaniere Ilobie onno osio 'to 'tulaŋ ono Yesu Kristo Lamonye hohoi, etalahani hohoi.

¹² Tania, adulo adi ni etagilutta itai erre hunia, duadi bu imijana itai isi buo fe iruhoto elahode enne ihum 'to igolihina jihatai.

¹³ Egigilo ni obis luŋa jihoŋ itagiluttari itai erre hunia buo ni hésu.

¹⁴ Nyio, amijak ni jio eliaha ni edehina ahuan onno obeŋ 'to ana isu 'tulaŋ, ihuo iramak nyia Yesu Kristo jihoŋ.

¹⁵ Inyi luŋa anna akemiere ni bebe jio, oŋida bati itai 'daŋ iduloro agilutta erre hunia, ihalu ye hoŋ.

Asuuti hunyia Igonyuni 'to Akuatan Kristo

¹⁶ Ebeŋ nyia hohoi ejifatio eyabita eberien, to ninyia eramaniere hohoi jihatai aduaran iko acohuno ono Yesu Kristo Lamonye hohoi. Egonyu nyia hohoi aduaran honyi to oŋite hohoi.

¹⁷ Ewon nyia hohoi diya to ninyia ifuotuniere inyi olohuo iko akuatan jio Hollum, Monye, Laduarani alla agalik 'to ta Akuatan. Itayiruno nyia ekiana onno ojio 'to jio, “Lonyi hoŋ alia, ollo obuor ataji hoŋ, amuno ni inyi bebe!”

¹⁸ Etayiru nyia hohoi ekiana ania ottu tedou to ninyia ewanari hohoi ikonyi idoŋe eduara.

¹⁹ Tania, ehum tibuo hohoi imijana bebe bebe jio, arai asayyo hunyia ikianai ekianak Hollum, hode. Tania, ihumata luŋa imijio asayyo hunia onno oyyu, ihuo enne imijiette itai allomo onno owulo 'to imaji enne iriok 'to. Ihumata luŋa imijio isi onno oyyu many iduoŋori ataŋatio Motie, buo fe afaŋan ono elelef otto motie iduoŋ itajia hatai ihuo enne iduoŋori elelef motie.

²⁰ Ati jio hunia 'daŋ, omijana luŋa jio, ittallik obo atulo imijana awoyo hiram ono ekenita hutto buk Hollum, te elofioro ottononyi.

²¹ Nyio, obeŋ obo ekiana Hollum ottu ta awahan tulo; ati, ifut nyia Loholio Olibo jio aati, ania ikianarik isi asayyo Hollum.