2Korinto 1 - Ecorit Aŋejuk 2003

¹ Ani alia Paulo, elefahata Kristo Yesu ta awahan Hollum, iko illa hohoi Timoteyo. Egioro hohoi jio eluluŋ heruhok Hollum otto Korinto iko jio aati Hollum 'daŋ hullo owoni 'to ifau Akaya 'daŋ.

² Ijiara Hollum Monye hohoi iko Yesu Kristo Lamonye isiori jihatai ayiji tajia iko nelik tajia.

Isiarak Paulo Ahumo jio Hollum

³ Hésiatta ahumo jio Hollum, Monye Yesu Kristo Lamonye hohoi, Monye ollo owon 'to iko amehino, inyi Hollum elle iyaŋuno 'to aluahio 'daŋ!

⁴ Oluahio inyi hohoi jio ettigemita hohoi jio, oŋida bati eremik iluak hia hullo owoni 'to iko ettigemita gele gele, te eluahiti hunyia oluahiere Hollum hohoi.

⁵ Ihuo enne efuotuniere ettigemita arabotie iko Kristo, ihuo nyia buo fe efuotu adi aluahio Hollum enne ittokon arabotie ikonyi.

⁶ Elle erumak hohoi ettigemita, arai isi iluahiere iko italahuniere itai; buo alla aluahi hohoi, aluahi buo fe itai ette isiarana agolon idihuniere dee ettigemita ihuo hunne edihu hohoi.

⁷ Tania, odulo eyihina hohoi jihatai igolon; nyio, emijak hohoi jio, ihuo enne ifuotuniette itai ettigemita arabotie ikohoi, ifuotuna buo fe itai aluahio arabotie ikohoi.

⁸ Illarak iko haniyarak hohoi, ewak hohoi oŋida itai imijana ettigemita hunyia erumak hohoi iŋati fau Asia. Ogoli nyia ettigemita hunyia erumak hohoi, many egigilori hohoi jio, ebeŋ adi hohoi ejio esu.

⁹ Awon nyia itajia hohoi jio aŋotoni naye jihohoi. Ati iduoŋi nyia erre hunia ihuo nyia jio, oŋida hohoi ebeŋ eyihi jio ahuattek hohoi, ati jio Hollum, etubuhoni hayaak.

¹⁰ Italuahu nyia inyi hohoi jio ekoi ye onno orroho 'to bebe, italuahu adi buo fe inyi hohoi. Eyihi hohoi jihonyi jio, inyiak adi inyi italuahuna hohoi.

¹¹ Oluahata luŋa hohoi ta amojo. Itarraŋi adi emojiti arriai hunia hunno omojorik to hohoi, ette adi Hollum isiarana jihohoi ayiji. Isiarani adi aati arriai ahumo jihonyi to hohoi.

Iloit Paulo Adaha Honyi

¹² Etadara hohoi jio, iramani egigilita hohoi jio emanya hohoi ifau dini ihuo awak Hollum, agalik ti ta amanya hohoi ikatai. Obeŋ nyia amanya hohoi idima. Ara nyia inyi ta agolon ono ayiji taji Hollum, buo obiaŋara to olofioro tulo.

^13-14 Egiorok hohoi jihatai erre hunne iremehina itai ihen ittata imijana. Duadi bu imijana itai kai ekenita hohoi, egigilo ni ifuanna adi ihum imijana ekenita hunia 'daŋ. Tania, Iholoŋ ono Yesu, Lamonye hohoi, ifuanna adi itadara to hohoi, buo hohoi etadara tetai.

¹⁵ Amijak nyia ni eram ania bebe, inyi ninyia awahari ni ittuniere do jihatai jio, oŋida bati ifuotuna amuno enyiahita arrihai.

¹⁶ Awak ni ittuna ifonyaru itai, buo ni alo Masedonia buo fe alla acohuno ni teya, irumaniere obo aluahio jihatai ta aleten hoŋ Yudea.

¹⁷ Itawwaha nyia ti ahou hoŋ ninyia awahari ni ihaniere erre hunia? Alla awak ni ihanio omuk erre, ehanatio soho ni isi ihuo aati afau ana, alla ajio ni, “Aafe” buo awak jiaran “obeŋ”?

¹⁸ Hode hode, ihuo omijak Hollum, obeŋi nyia ekenita hoŋ jihatai arai a huno “Aafe” buo fe a huno “obeŋ”.

¹⁹ Nyio, Yesu Kristo, Lonyi Hollum, linyia ettittoyo hohoi jihatai; ani iko Silas buo Timoteyo, obeŋ inyi ara atulo olo “Aafe” buo fe a holo “Obeŋ”. Ati odulo egigilo honyi irahan ahono “Aafe”.

²⁰ Tenyi, arai ecoriti Hollum 'daŋ “Aafe”. Inyi buo fe, enne ejiari tenyi, “Amen”, itakuaciere Hollum.

²¹ Hollum, ta ahuan honyi, itagol hohoi ikatai, te enoso iko Kristo. Hollum, ta ahuan honyi, nyia buo fe igelu hohoi,

²² ette isihonia emoi honyi jihohoi irari a hulonyi; buo fe itufutak Loholio Olibo itajia hohoi irari etahuti jio, erre 'daŋ hunno ottunak inyi to hohoi, arai adi luŋa ahunohoi.

²³ Ijiara luŋa Hollum isiarak jihoŋ ettigemita, alla agesem ni…nyio, omijak inyi erre hutta taji hoŋ. Abeŋ nyia ni alo Korinto jio, ŋadi ani enyiak iyaŋuno jihatai ettigemio.

²⁴ Ebeŋ hohoi ewak irosonia jihatai neruk. Emijak hohoi jio, igottiette itai eruk hatai. Ati, egiama hohoi arabotie ikatai, iyaŋuniere amuno jihatai.