1 Timoteo 1 - Ecorit Aŋejuk 2003

¹ Ani alia Paulo, efahata Kristo Yesu ta awahan ono Hollum etalahani hohoi, buo ono Kristo Yesu elle eyihi jihonyi…

² Egiorok ni jihoi, Timoteyo; te neruk, ira iyye ihuo lonyi hoŋ hode. Ijiara Hollum Monye iko Kristo Yesu, Lamonye hohoi isiarani jihoi ayiji taji iko amehino buo elik taji.

Asario te Eram ono Ettiyenio enne Ipal 'to

³ Ninyia alari ni Masedonia, ehum nyia ni iramana iyye jio, arasai Efeso oŋida luŋa ihum iramana aati hulle ittiyenie 'to ettiyenita hunne ipali 'to hunia jio, ijiara luŋa itawoji ettiyenita hunia.

⁴ Iramak luŋa isi, hèlaha otuhoni oŋitek hosi 'daŋ jio eyabita eberien iko ekukuboro afureta hohonyiok hunno obeŋi esidita. Iyaŋunie isi olorisa ihiji waati, buo obeŋi oluahi atulo ihaniere egiama Hollum, onno ottu 'to te neruk.

⁵ Awak ni iyye oŋida ittiyenio aati abuaran taji onno ottu 'to jio ataji onno olibo 'to iko jio atua onno oyyu 'to buo neruk anna ara 'to hode.

⁶ Idehini omuk aati erre hunia, buo ette ittallunyanio jio etafudita asai.

⁷ Awahi isi irahan a hettiyanak ifahita huno Mose, buo otimoi erre hunne ikianai isi, duadi bu ojiori isi jio emijak isi.

⁸ Emijak jio, oyiji efahita elle igiamarik isi te ekoi onno oyyu 'to.

⁹ Omijana jio, obeŋi efahita arai ta abisak; arai isi ta amiosok ifahita, te epalak, ta atimok Hollum iko eyyak, te eharak mojo jio Hollum iko etarrohojak fure Hollum, ta attok monyie iko honyie, ta attok waati,

¹⁰ ta asomok, ta aliawa hullo ojotorik 'to aliawa ihuo isi, ta apocok waati, ta agesomok, ta asuuti agesomok iko ta atulo 'daŋ elle iha 'to ettiyenio onno obis 'to.

¹¹ Onyurani ettiyenio ania jio asayyo hunyia itifuotoni ihas hoŋ ittittoyere. Isi Asayyo Ayijok hunno ofuonni 'to jio Hollum akuatani, elle etahabuyo.

Esiarana Ahumo jio Hollum

¹² Esiarak ni ahumo jio Kristo Yesu, Lamonye hohoi elle isio 'to jihoŋ agolon igiamari. Buo te ehianana honyi nani oloyijio, onyimuniere inyi ani ahegiamani honyi.

¹³ Ara nyia ni a hamoroni, a hetarrohojiani fure buo fe ahettigiamani heruhok Kristo. Ati omehino nyia Hollum jihoŋ nyio, abeŋ nyia ni amijak ehanio ni anyio, buo fe neruk nyia obeŋ jihoŋ.

¹⁴ Ati itufutak nyia Kristo Yesu, Lamonye hohoi, jihoŋ belette hia ayiji taji, neruk iko abuaran taji hunno ofuonni 'to jihonyi.

¹⁵ Ara ekiana ana ahode; ijiara luŋa atulo 'daŋ iruk jio, ottu nyia Yesu Kristo ifau dini, italahuniere eyyak. Ani nyia tibuo eyyani alla agalik 'to 'daŋ!

¹⁶ Ati omehino nyia Hollum jihoŋ jio, oŋida bati Kristo Yesu itahutak abolori ono adihan honyi toni, ani eyyani alla agalik 'to 'daŋ; irari etamijani jio hia hullo ofuonni 'to iruk jihonyi, ette inyurana nesu onno osio 'to 'tulaŋ.

¹⁷ Jio Oobu ollo osio 'to 'tulaŋ, elle ittallik 'to iye buo fe obeŋ oleyo, alla ara 'to a Hollum abotie, hatawana olohuo iko akuatan 'tulaŋ 'tulaŋ! Amen.

¹⁸ Timoteyo, lonyi hoŋ, esiarak ni efahi ana jihoi, orriama inyi iko eram ninyia ojiori ekianak Hollum teyye. Ijiara ekenita hunia arai erremiti hoi irriomori onno oyyu.

¹⁹ Ogottiere neruk iko egigilo onno obis 'to. Ihari omuk aati ejifatio egigilita hosi, ania ette ittarroho neruk hosi.

²⁰ Ihiji aati hulia, owon Himenayo iko Alesandro hulle esio ni ihas Sittan ittigemiere isi, oŋida omijani jio, orroho etarrohojio fure Hollum.