1 Petro 1 - Ecorit Aŋejuk 2003

¹ Ani alia Petro, elefahata olo Yesu Kristo. Egiorok ni jio onyimot Hollum, hulle isarrahini a hafuhok iŋacio huno Pontus, Galasia, Kapadosia, Asia iko Bitania.

² Onyimuni nyia itai ta awahan ono Hollum, Monye; buo fe italibori itai to Oloholio honyi jio oŋida iniŋiete Yesu Kristo elle italibo nooto honyi itai. Ijiara ofuanani ayiji iko nelik tajia jihatai hiny hiny.

Eyihina Ahode hode

³ Hésiatta ahumo jio Hollum, Monye Yesu Kristo, Lamonye hohoi! Ta amehino honyi onno obolo 'to, isiarak inyi jihohoi nesu aŋejuk te etubuhuna honyi Yesu Kristo toye. Itufutak ania jihohoi eyihina ahode hode jio,

⁴ efuo adi ifuotuna emuniti hunyia ocorok Hollum jio aati honyi. Ottunani jihohoi emuniti hunia lidou, amaji enne ittallihorik isi imuyahari kuyya irrohojari kuyya ililitoro.

⁵ Arai emuniti hunia tetai hulle iruhoto 'to jio Hollum. Ottoŋotio agolon honyi itai onno oyyu jio oŋida ifuotuna etalahuno onno ottuba 'to onno ofuoi italeyehina iholoŋ esidi.

⁶ Omunoti te eram ania, duadi bu irumana itai luŋa ihuania ettigemita arriai.

⁷ Itahutani ettigemita hunia arahan ono neruk hatai hode. Duadi bu ayyel onno oremehini ittarroho, okemie inyi te neema. Tania, ijiara buo fe luŋa okemi neruk hatai, anna agalik 'to ayyel ta ayiji, oŋida bati inyi odulo. Ifuatta adi ifuotuna etahabuyo, akuatan iko olohuo jio Oloŋ enne italeyehinierek Yesu Kristo.

⁸ Ibiaŋata nyia itai igonyuna inyi, ati obuori nyia atajia hatai inyi. Duadi bu ibiaŋata itai igonyuna inyi ihuania, iruhoto itai jihonyi. Tania, obolo amuno jihatai bebe; amuno onno okuat bebe, onno obeŋ tulo oremik ikiana.

⁹ Te neruk hatai jihonyi, irumana itai etalahuno.

¹⁰ Ihumi nyia omuk ekianak Hollum ittifia bebe awoyo hiram ono etalahuno ania. Ihumi nyia isi ikiana te eram ono esiorio onno olo Hollum isiarana jihatai.

¹¹ Awahi nyia isi imijana alali tulo kuyya anani saa onno ottuniere inyi. Oŋitek hunia hunyia itahutaniere, Oloholio Kristo ninyia owon 'to jihosi, isi ihumari ikianari te eram ono ettigemita hunno ottu Kristo idihuna iko te eram ono akuatan onno olo inyi ifuotuna.

¹² To ninyia ikianarik ekianak Hollum erre hunia, italeyehini nyia jihosi jio, arai egemita hosi hunia tetai, buo obiaŋara tesi. Ihuania, itayiruna itai erre hunia jio hia hulle ittittoye 'to Asayyo Ayijok ta aduaran ono Loholio Olibo linyia ifahuni tedou. Erre hunia hunna awahi ajilohien bebe imijana awoyo hiram hosi.

Oŋida Luŋa Emanya Aliborok

¹³ Tania, ihuhumata egigilita hatai igiamari. Ihumata imijio, otuhonia eyihina hatai 'daŋ jio ayiji onno ofuoi isiarana jihatai elle italeyehini Kristo.

¹⁴ Oniŋiete Hollum, hèlaha ewahiti hatai ogottierek itai, ihuo ninyia berien.

¹⁵ Ati, ijiara amanya hatai olibo ihuo onno oliborori Hollum, linyia iloŋu 'to itai.

¹⁶ Ihuo ojio abuk Hollum jio, “Oliboroto, nyio, alibo ni.”

¹⁷ Elle imojoti itai jio Hollum, ijiatta itai inyi Monyatai. Obeŋ inyi igigia alla aŋocio inyi eram waati te ehanita hosi. Tania, abaŋata Hollum buo itai hèmanyati ifau dini.

¹⁸ Imijana itai edumit ninyia italahunierek itai jio ekotia hunno orrohoji 'to hunyia ifuotuna itai jio hohonyiok hatai. Obeŋi nyia italahuni itai ta ariŋ, ihuo abilata aboŋ kuyya ayyel, onno oremehini ittarroho.

¹⁹ Ati, italahuni nyia itai to nooto Kristo, ariŋ onno ogol ihaniere. Ara nyia Kristo ihuo olosobe ollo ottuba ahuan honyi 'daŋ.

²⁰ Onyimuni nyia inyi many hobeŋi oyyeuni afau. Ati, te eram hatai, italeyehini nyia inyi jio oŋitek huttesidi huna.

²¹ Tenyi, iruhoto itai jio Hollum, linyia itubuhu 'to inyi toye, ette isiarana jihonyi akuatan; inyi buo fe onno odulori eyihina iko neruk hatai jio Hollum.

²² Ihuania, italiboroto itai ahuattek hatai ta aniŋio hatai nelahode, abuori buo fe atajia hatai hode eruhok hullomuk. Tania, ijiara luŋa abuaran taji odulo awanan itajia hatai 'daŋ.

²³ Ihaniete ihuo nyia, nyio, isiarak Hollum jihatai esiuno aŋejuk te ekiana honyi enne isu 'to 'tulaŋ. Irata itai aduri esioni ollo osio 'to 'tulaŋ, obiaŋara a hulo ollo oremik 'to iye.

²⁴ Ihuo ojio abuk Hollum jio, “Arai aati 'daŋ ihuo amiyaŋ, buo fe akuatan hosi ara ihuo ayaburita miyaŋ. Oyohojo amiyaŋ, buo ayaburita ette idouna;

²⁵ ati, osio ekiana ono Lamonye 'tulaŋ.” Ekiana ania, inyi Asayyo Ayijok hunyia iramani jihatai.