1Korinto 16 - Ecorit Aŋejuk 2003

Eluahiti jio Eruhok Alociaŋak

¹ Ihuania, ijiara nani ekiana eram ono eddudduha isiorita jio aati Hollum hutto Yudea. Ihaniete luŋa ihuo ninyia eramaniere ni eluluŋi heruhok hutto Galasia.

² To oŋitek Dominika, ottunattati omuk arrobiyaa, ihuo iremehina itai 'daŋ ababo ifituna; nyio, oŋida ibiaŋata ifuanna iddudduha alla afany ni.

³ Alla afany ni, attu adi ni isiarana awaraga etahuti jio hia hulle inyimuna itai oŋida iyarai esiorita hatai Yerusalem.

⁴ Alla ayyu jihoŋ buo fe ilari, efuo adi isi ikoŋ.

Erre hunne Igigilo Paulo Ihaniere

⁵ Attu adi ni jihatai elle elur ni Masedonia, nyio, awak ni leten totto Masedonia.

⁶ Ara hattu ni itoŋonia omuk oŋitek ikatai; kuyya ayafajin hacoro 'daŋ, oŋida bati itai iluahata nani iculari, jio amaji anna alari ni teya.

⁷ Awak ni ihum itoŋuna ikatai, obiaŋara obo kai. Alla awak Lamonye, eyihi ni itoŋori ikatai oŋitek arriai.

⁸ Etoŋo adi ni Efeso many iholoŋ Pentakoste;

⁹ nyio, awon ekoi onno obolo jihoŋ ihaniere egiama onno oyyu 'to, duadi bu oluaji amiorok.

¹⁰ Alla attu Timoteyo talia, ifuotuna luŋa inyi onno oyyu, nyio, ihanio inyi egiama Lamonye ihuo enne ehaniere ni.

¹¹ Hèlaha obo iyas inyi, ati oluahata inyi iculari ahosiere te nelik taji oŋida ocohuno jihoŋ. Nyio, egigilo ni jio ocohuno adi inyi iko eruhok.

¹² Ihuania, alla ara eram illa hohoi Apolo, ehum ni ikianatio jihonyi oŋida olo imijuno itai iko eruhok hullomuk; ati obeŋ inyi ihum iruk ilari jihatai ihuania. Ottu adi alla arumak inyi obo ekoi ittuniere.

Ekenita hutte Isidi

¹³ Ihumata mijio, ogottiette neruk hatai, itagoloto atajia, ogoloto.

¹⁴ Ihaniete erre 'daŋ ta abuaran tajia.

¹⁵ Imijana itai bo Stifanas iko aati hutto haŋ honyi; isi nyia etterita waati ta Akaya hunyia oyitoi 'to a Kristiani. Atuhoni isi ahuattek hosi 'daŋ igiamari ta aati Hollum. Illarak iko haniyarak hoŋ, attana ni itai jio,

¹⁶ ijifatiete arihok ihuo hulia, iko aati 'daŋ hulle igiamai 'to ikosi.

¹⁷ Amuno ni ta attuna ono Stifanas iko Fortunatos buo Akiyakos; nyio, arutani isi imaji hatai.

¹⁸ Iyaŋunie isi amuno jihoŋ, ihuo ninyia iyaŋunierek isi jihatai. Itaniŋiete jio aati ihuo hulia.

¹⁹ Itifonyai eluluŋi heruhok hutto Asia. Itifonyai Akuila iko Prisila itai te efonya Kristiani; isi iko eruhok hullo omojotie 'to ihasik hosi.

²⁰ Imalaye buo fe eruhok 'daŋ, hullo owoni 'to dini, itai. Ifonyati ahuattek ta ahucio 'yaha ono elik tajia.

²¹ Ani Paulo, egiorok efonyita huna ta aani hoŋ:

²² Ijiara epit owon jio lia, ollo obeŋ ataji honyi obuor Lamonye. Maranatta…Lamonye hohoi, waŋ!

²³ Hatawana ayiji taji Yesu Lamonye jihatai.

²⁴ Hatawana abuaran tajia hoŋ ikatai, to Kristo Yesu. Amen.