1Korinto 1 - Ecorit Aŋejuk 2003

¹ Ani alia Paulo, linyia iloŋuni ta awahan Hollum irari elefahata olo Yesu Kristo, iko Sostins illa hohoi.

² Egiorok hohoi jio eluluŋ heruhok Hollum otto Korinto, jio aati hulle iloŋuni aliborok, hulla arai 'to a hulonyi to Kristo Yesu, iko jio aati 'daŋ hutto masik 'daŋ, hullo omojoi 'to Lamonye hohoi Yesu Kristo, Lamonye hosi buo fe Lamonye hohoi.

³ Ijiara Hollum Monye hohoi iko Yesu Kristo Lamonye hohoi, isiori jihatai ayiji tajia iko nelik tajia.

Emuniti to Kristo

⁴ Esiorio ni ahumo jio Hollum motie motie tetai nyio, ta ayiji taji enne isiarak inyi jihatai to Kristo Yesu.

⁵ Nyio, to enoso iko Kristo inyurana itai erre 'daŋ hunno oyiji 'to iko amijana ikiana buo elofioro 'daŋ.

⁶ Ihumi asayyo Kristo idioro itajia hatai,

⁷ tania ittallik obo esiorio Hollum iŋaramahina itai, te etila hatai aleyehino ono Yesu Kristo, Lamonye hohoi.

⁸ Ogottiere adi Hollum itai many isidi jio, oŋida obo epali obeŋ owon jihatai, Iholoŋ ono Yesu Kristo, Lamonye hohoi.

⁹ Ogottiere Hollum ecoriti honyi, Hollum elle iloŋu 'to itai iwanari jio amanya Lonyi honyi Yesu Kristo, Lamonye hohoi.

Ebubuanya Ihiji Iluluŋ Heruhok

¹⁰ Attana ni itai illarak iko haniyarak hoŋ, ta afure Yesu Kristo, Lamonye hohoi, jio oŋida itai 'daŋ iruhoto ta ataji abotie. Hèlaha ebubuanya owon ihiji hatai. Inosoti arabotie, te egigilo abotie iko awahan abotie.

¹¹ Nyio, iramani aati hutta haŋ Koloi jihoŋ jio, owon aŋalafa ihiji hatai, illarak iko haniyarak hoŋ.

¹² Ajio ni jio, ikianati itai 'daŋ ababo jiojio, “Ara ni a holo Paulo”, buo obo ojio jio “Ara ni a holo Apolo,” buo obo ojio “Ara ni a holo Petro,” ife obo ojio jio “Ara ni a holo Kristo.”

¹³ Ibibuanya soho Kristo eluluŋi eluluŋi? Paulo soho linyia isihoni ikruce tetai? Itifuotoni nyia soho itai batisimo ta afure Paulo?

¹⁴ Ajio ni humo jio Hollum nyio, abeŋ nyia ni etifuotok batisimo jio obo alatai arari fe jio Krispus iko Gayos hama.

¹⁵ Tania ittallik obo jiaran jio, itifuotoni nyia batisimo jihatai irari a hejifak hoŋ. (

¹⁶ Etifuotok nyia buo fe ni batisimo jio Stifanas iko aati hutta haŋ honyi. Ati ettallik ni igiluna obo jihatai elle etifuotok ni batisimo jihonyi.)

¹⁷ Obeŋ nyia Kristo ifahu nani itifuociere batisimo; ati, ittittoyere Asayyo Ayijok, buo obiaŋara te ekiana ono olofioro tulo, nyio, ŋadi luŋa agolon onno oyeri Kristo ikruce ara asai.

Kristo inyi Agolon iko Olofioro Hollum

¹⁸ Jio aati hullo ofuoi 'to ilitohina, arai asayyo huno naye Kristo ikruce ariŋ asai, buo jihohoi hulle efuo 'to italahuno, ara inyi agolon Hollum.

¹⁹ Nyio, ojio Abuk Hollum jio, “Etarrohojak adi ni olofioro lofiorojok, buo fe ettaŋa addi amijana onno owon jio aati hulle iheni 'to.”

²⁰ Tania, tahiai buo alofiorojok? Kuyya aati hulle iheni 'to? Kuyya ekianak hulo aŋasi huna? Itahutak tibuo Hollum jio, ara elofioro ono afau ana asai!

²¹ Nyio, Hollum, te elofioro ottononyi, nyia itik aati imijaniere inyi te elofioro ottonosi. Ati, italahu Hollum eruhok ta asayyo hunne ettittoyo hohoi, hunno ojiori miji arai “A hirre asai”.

²² Awahi Yudei eduariti irari etahutita, buo Grik awahi olofioro.

²³ Ati ettittoyo hohoi asayyo Kristo, linyia isihoni ikruce. Isi asayyo hunne ittallihi Yudei idiloro, buo fe arai a hirre asai jio Alufajak.

²⁴ Ati, jio hia hulle iloŋuni tehiji Yudei iko Grik 'daŋ, arai asayyo hunia jihosi Kristo, alla ara 'to agolon iko elofioro Hollum.

²⁵ Nyio, ariŋ onno oleyo 'to ihuo emannaŋa Hollum, agalik olofioro tulo; buo fe ariŋ onno oleyo 'to ihuo afiahaji Hollum, agalik agolon tulo.

²⁶ Illarak iko haniyarak hoŋ, iko ogiluna iwanata nyia itai aŋai, ninyia hèloŋu Hollum itai. To hoŋite waati, omutari nyia alofiorojok hatai, elettaha hatai iko asamak hatai.

²⁷ Ati, Hollum, ta awahan honyi, nyia onyimu erre hunno ojiori aati jio arai a hirre asai, itanyahiniere alofiorojok ariri; buo fe onyimu afiahajak, itanyahiniere elettaha ariri.

²⁸ Onyimu Hollum ariŋ onno ofiaha 'to to hoŋite waati, buo fe iyasie, buo fe igigiloi jio ariŋ asai, ittarrohojiere ariŋ onno oyyu 'to bebe to hoŋite hosi.

²⁹ Itahutak ania jio, hèlaha obo atulo itadara to hosiere Hollum.

³⁰ Ati, iyaŋuno Hollum enoso jihatai iko Kristo Yesu; buo fe ihanak Kristo irari jihohoi olofioro, abisan hohoi, alibori iko etalahuno hohoi.

³¹ Tania, ihuo ojio abuk Hollum jio, “Lia, alla awak 'to itadara, ijiara luŋa itadara te nerre hunne ihan Lamonye.”