ཡུ་དཱས་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ ཡེ་ཤུ་ཁིརཱིས་ཀྱི་ཕྱག་ཞུ་མི་ ཡ་ཀོབ་ཀྱི་ནུ་གཅུང་ ང་ ཡུ་དཱས་ཀྱིས་ ཡབ་དཀོན་མཆོག་གིས་བྱམས་པ་མཛད་དེ་འབོ་ཡོད་མི་ ཡེ་ཤུ་ཁིརཱིས་ཀྱིས་སྲུང་སྐྱོབས་མཛད་དེ་ཡོད་མི་སྤུན་ཆ་ཚུ་ལུ་ ཡི་གུ་འདི་འབྲི་དོ།

² དཀོན་མཆོག་གིས་ཁྱེད་ཆ་ཁྱབ་ལུ་ ཁོ་རའི་སྙིང་རྗེ་དང་བྱམས་པ་ ཞི་བདེ་ ཡང་ལས་ཡང་དུ་གནང་བར་ཤོག།

ཉེན་ཁ་ཡོད་མིའི་སློབ་དཔོན་རྫུས་མ་ཚུ་གི་སྐོར།

³ ངེ་གི་བྱམས་པའི་ཆ་རོགས་ཚུ་ ང་བཅས་ག་ར་མཉམ་རུབ་ཀྱི་ཐོག་ལས་ བཅའ་མར་གཏོགས་ཏེ་ཡོད་མི་ ཡེ་ཤུ་ཁིརཱིས་ལས་འབྱུང་འོང་མིའི་ཐར་པ་དེ་གི་སྐོར་ལས་ ཡི་གུ་གཅིག་འབྲི་དགོ་མནོ་ཡི་ ཨིན་རུང་ དེ་གི་སྐོར་ལས་མེན་པར་ དཀོན་མཆོག་གིས་ ཁོ་རའི་དམ་པའི་མི་ཚུ་ལུ་ ཚར་གཅིག་གུ་གནང་ཚར་མི་ བདེན་པ་འདི་ལུ་དད་པ་བསྐྱེད་དེ་ ཁྱེད་ཀྱིས་སྲུང་སྐྱོབ་འབད་ནི་ལུ་ བརྩོན་ཤུགས་བསྐྱེད་དགོ་པའི་སྐོར་ལས་འབྲི་དགོཔ་འདི་ ཁག་ཆེ་བས་ཟེར་ ང་གིས་ཤེས་ཅི།

⁴ ག་ཅི་སྨོ་ཟེར་བ་ཅིན་ མི་ལ་ལུ་ཅིག་གིས་ མེན་བརྫུ་བཏབ་སྟེ་ ཁྱེད་ཀྱི་སྦུག་ལུ་གཙང་བཏང་འཛུལ་ཏེ་ཡོད་ ཁོང་གིས་ཁྱེད་ལུ་ འདོད་ཆགས་ངན་པའི་ལཱ་འབད་བ་ཅིན་ཁྱད་མེད་ ག་ཅི་སྨོ་ཟེར་བ་ཅིན་ དཀོན་མཆོག་གིས་ཐུགས་རྗེ་གནང་འོང་ཟེར་སླབ་ནི་དང་ ད་རུང་ཁོང་གིས་ ཡེ་ཤུ་ཁིརཱིས་འདི་ སྦྱིན་བདག་དང་གཙོ་བོ་ཡང་མེན་ཟེར་སླབ་ཨིན་མས་ དེ་ཚུ་དཀོན་མཆོག་ལུ་མ་འདྲོག་མི་ཚུ་ཨིན་ དེ་འབདཝ་ལས་བརྟེན་ཏེ་ ཧེ་མ་ལུང་བསྟན་ནང་བྲིས་དོཝ་བཟུམ་སྦེ་ དཀོན་མཆོག་གིས་ཁོང་ལུ་ཧེ་མ་ལས་ ཁྲིམས་བཀལ་ནི་སྦེ་ ངོས་འཛིན་འབད་དེ་བཞག་ཡོདཔ་ཨིན།

⁵ མ་གཞི་ ཨ་ནི་དེ་ཚུ་ག་ར་ ཁྱེད་ཀྱིས་ཧེ་མ་ལས་ཤེས་ཚར་རུང་ ད་རུང་ཁྱེད་ལུ་དྲན་བསྐུལ་འབད་དེ་ ང་གིས་སླབ་དོ་ ཧེ་མ་ གཙོ་བོ་གིས་ ཁོ་རའི་མི་ ཨཱིས་ར་ཨཱེལ་པ་ཚུ་ལུ་ ཨི་ཇིབ་རྒྱལ་ཁབ་ནང་ལས་སྐྱབས་མཛད་དེ་འཁྱིད་འོངས་ཡི་ དེ་འབདཝ་ད་ཤུལ་ལས་ ཁོ་ལུ་དད་པ་མ་བསྐྱེད་མི་ཚུ་ལུ་རྩ་མེད་མཛད་ནུག

⁶ དེ་ལས་དཔེ་གཅིག་འབད་བ་ཅིན་ དཀོན་མཆོག་གིས་གནང་སྟེ་ཡོད་པའི་དབང་ཚད་ནང་ལས་འཐོན་འགྱོ་མིའི་ཕོ་ཉ་ཚུ་ ཁོང་གིས་ཁོང་རའི་སྡོད་ས་སྤང་བཞག་ནི་དེ་གིས་ སྡོད་ས་གནག་དུང་དུ་གཅིགཔ་དེ་ནང་ དཀོན་མཆོག་གིས་ཁོང་ལུ་འགྱུར་བ་མེད་པའི་ལྕགས་ཐག་གིས་བསྡམས་ཏེ་ ཁྲིམས་ཕྱེ་བའི་ཉིནམ་སྦོམ་ ཁོང་གི་དོན་ལུ་བཞག་གནང་སྟེ་ཡོད།

⁷ དཔེ་དེ་བཟུམ་སྦེ་ཁྲོམ་ སོ་དོམ་དང་ གོ་མོ་ར་ དེ་ལས་ མཐའ་འཁོར་གྱི་ཁྲོམ་ནང་གི་མི་དེ་ཚུ་གིས་ཡང་ འདོད་ཆགས་ཀྱི་ལུས་འབྲེལ་མ་འདྲཝ་འབདཝ་མ་ཚད་ མཚན་མ་གཅིག་པའི་ལུས་འབྲེལ་འབད་དེ་ ཁོང་ཆ་ཁྱབ་ ནམ་ཡང་ཤི་ནི་མེད་པའི་མེ་གིས་འཚིག་སྟེ་ ཁྲིམས་འབག་མི་ཚུ་གི་དཔེ་གཅིག་ཨིན་མས།

⁸ ཨ་ནི་དཔེ་འདི་ཚུ་ ཁོང་སློབ་དཔོན་རྫུས་མ་འདི་ཚུ་གིས་ཤེས་ཏེ་འབད་རུང་ ཁོང་རའི་མཐོང་སྣང་མ་འདྲཝ་ལེ་ཤ་ལས་བརྟེན་ཏེ་ ཁོང་གིས་མ་རབས་ཀྱི་ལཱ་འབད་དེ་ དབང་ཚད་ལུ་ངོས་ལེན་འབད་མ་བཏུབ་མ་ཚད་ དངོས་སུ་སྦེ་མ་མཐོང་མི་གཟི་བརྗིད་ཅན་ལུ་ཡང་ སྨད་པ་རྐྱབ་ཨིན་མས།

⁹ ཨིན་རུང་ ཕོ་ཉ་གི་འགོ་དཔོན་ ནུས་ཤུགས་ཅན་ མི་ཁ་ཨཱེལ་གྱིས་ མོ་སཱེས་ཀྱི་སྐུ་ཕུང་གི་སྐོར་ལས་བདུད་དང་གཅིག་ཁར་རྩོད་པ་རྐྱབ་ད་ ཁོ་གིས་ ཁོ་རང་ལུ་ཡང་ བདུད་ལུ་སྨད་པ་རྐྱབ་ནི་འོས་འབབ་ཡོདཔ་སྦེ་མ་བརྩིས་བར་ བདུད་དེ་ལུ་ གཙོ་བོ་དཀོན་མཆོག་གིས་ཁྱོད་ལུ་བཀའ་དམ་དྲགས་གནང་བཅུག་ཟེར་གསུངས་ཡི།

¹⁰ དེ་འབདཝ་ད་ ཨ་ནི་སློབ་དཔོན་རྫུས་མ་ཚུ་ ཁོང་གིས་ཧ་མ་གོ་མི་ཚུ་གི་སྨད་པ་རྐྱབ་ཨིནམ་མ་ཚད་ ཁོང་བློ་རིག་མེད་པའི་སེམས་ཅན་ཚུ་བཟུམ་སྦེ་ ཁོང་རའི་རང་བཞིན་གྱིས་ག་སླབ་མི་འདི་འབད་དེ་ ཁོང་རང་ལུ་རྩ་མེད་གཏངམ་ཨིན་མས།

¹¹ ཁོང་སློབ་དཔོན་རྫུས་མ་ཚུ་ལུ་ ག་དེམ་ཅིག་ལཱ་ཁག་རྐྱབ་ནི་སྨོ་ རང་གི་ནུ་གཅུང་བསད་མི་ ཀཱེན་དེ་གི་ལམ་བདའ་འགྱོཝ་ཨིན་མས་ ལུང་སྟོན་པ་ བ་ལམ་བཟུམ་སྦེ་ ཏི་རུ་བཟོ་ནི་གི་དོན་ལུ་ ག་ཅི་ཡང་འབདཝ་ཨིན་མས་ དེ་ལས་ ཀོ་ར་བཟུམ་སྦེ་ དཀོན་མཆོག་དང་ཁོ་རའི་ཞབས་ཕྱིཔ་ མོ་སཱེས་ཀྱི་ངོ་རྒོལ་འབད་དེ་ རང་ལུ་རྩ་མེད་གཏངམ་ཨིན་མས།

¹² ཁོང་གིས་ཁྱེད་དང་གཅིག་ཁར་ གཙོ་བོ་གི་བྱམས་པའི་ཚོགས་སྟོན་ཟ་བའི་སྐབས་ ངོ་ཚ་ནི་མེདཔ་སྦེ་ ཁོང་ གྲུའི་འོག་ལུ་གསལ་ཏོག་ཏོ་སྦེ་མ་མཐོང་མིའི་ བྱུ་རུའི་ཕུང་པོ་དང་འདྲ་ རང་དོན་བལྟ་མི་ལུག་རྫིཔ་དང་འདྲ་ ས་གཞི་གུ་ཆརཔ་རྐྱབ་ནི་མེད་པའི་ ས་སྨུག་སྐམ་རླུང་མ་གིས་འཐུ་འབག་འགྱོ་མི་དང་འདྲ་ ཁོང་ནམ་སེར་ཁ་དོག་མ་བཏགས་ནི་མེད་པའི་ཤིང་སྡོང་དང་འདྲ་ ར་ཏོ་དང་ཤིང་སྡོང་གཉིས་ཆ་ར་ཤི་སོངམ་བཟུམ་སྦེ་ཨིན་མས།

¹³ ཁོང་གིས་ངོ་ཚ་ནི་མེད་པའི་འབད་བཞག་ཚུ་ རྒྱ་མཚོ་ཁ་ལས་ཐོན་པའི་ལྦ་ག་ ཁམས་ལོག་སི་སི་དང་འདྲ་ ཁོང་སྤྱང་འཁྱམ་འགྱོ་མི་སྐརམ་དང་འདྲ་ དེ་འབདཝ་ལས་བརྟེན་ཏེ་ དཀོན་མཆོག་གིས་ཁོང་ལུ་ཁྲིམས་གཏང་གནང་ནི་སྦེ་ འོད་ནམ་ཡང་ཤར་ནི་མེད་པའི་ས་གནས་ གནག་དུང་དུ་གཅིག་བང་བཏབ་བཞག་གནང་སྟེ་ཡོད།

¹⁴ ཨ་དམ་ལས་མི་རབས་བདུན་པ་ཨིན་མིའི་ ཨེ་ནོག་གིས་ཡང་ ཨ་ནི་མི་ཚུ་གི་སྐོར་ལས་ ཧེ་མ་ལས་ལུང་བསྟན་བཤད་ནུག་ དེ་ལུ་ཉན་ཤིག་ གཙོ་བོ་གིས་ ཁོ་རའི་གྱངས་ཁ་མ་ཆོད་པའི་དམ་པའི་ཕོ་ཉ་ཚུ་དང་གཅིག་ཁར་བྱོན་ཏེ།

¹⁵ འཛམ་བུ་གླིང་གི་མི་ག་ར་ལུ་ཁྲིམས་ཕྱེ་ནི་ཨིན་མས་ དཀོན་མཆོག་ལུ་མ་འདྲོག་མི་འདི་ཚུ་གིས་ འདོད་ཆགས་ཀྱི་ལཱ་འབད་ནི་དང་ ལཱ་ངན་པ་ཡང་འབད་ནི་ལུ་མ་འདྲོག་པར་ དཀོན་མཆོག་གི་སྐོར་ལས་ ཚིག་ངན་སླབ་སྟེ་རྒོལ་ནི་དེ་གིས་ ཁོང་ལུ་ཆདཔ་གཏང་གནང་ནི་ཨིན་མས་ཟེར་གསུངས་ནུག

¹⁶ ཨ་ནི་མི་དེ་ཚུ་ཁ་གདུག་འབར་མི་དང་ རྒྱབ་ཁ་ལས་ཁ་གཏང་མི་ ཁོང་རང་གི་འདོད་པ་བཞིན་དུ་ལཱ་ངན་འབད་མི་ ཁམས་ཆེ་དྲགས་ རང་དོན་སྒྲུབ་པའི་དོན་ལུ་གཞན་ལུ་ཤ་མུ་སྐམ་དྲང་མི་ཚུ་ཨིན།།

དམ་ཚིག་ཅན་སྦེ་སྡོད་དགོ་པའི་སྐོར།

¹⁷ དབའེ་ ངེ་གི་བྱམས་པའི་ཆ་རོགས་ཚུ་ ཧེ་མ་ གཙོ་བོ་ཡེ་ཤུ་ཁིརཱིས་ཀྱི་སྐུ་ཚབ་ཚུ་གིས་ ལུང་བསྟན་བཤད་མི་དེ་ཚུ་ མ་བརྗེད་པར་ ཁྱེད་ཀྱི་སེམས་ཁར་དྲན་ཏེ་བཞག་དགོ།

¹⁸ ཁོང་གིས་ དུས་མཐའན་མཇུག་ལུ་ དཀོན་མཆོག་ལུ་དགོད་བྲ་བཟོ་སྟེ་ རང་གི་འདོད་པ་བཞིན་དུ་འབད་དེ་ དཀོན་མཆོག་ལུ་མ་འདྲོག་མི་འདི་ཚུ་འཐོན་འོང་ཟེར་ ལུང་བསྟན་བཤད་ནུག

¹⁹ ཨ་ནི་མི་དེ་ཚུ་གིས་ ད་ལྟོ་ཁྱེད་དདཔ་ཅན་ཚུ་གི་བར་ན་ལུ་ དཀྲོགས་ཁ་བརྐྱབས་ཏེ་ ཁག་གཉིས་བཟོ་གཏངམ་ཨིན་ ཁོང་གིས་ཁོང་རའི་འདོད་པའི་དབང་དུ་གཏང་སྟེ་ལཱ་འབདཝ་ཨིན་ ཁོང་གི་ནང་ན་དཀོན་མཆོག་གི་ཐུགས་ཉིད་རྩ་ལས་རང་མེད།

²⁰ དེ་འབདཝ་ད་ ངེ་གི་བྱམས་པའི་ཆ་རོགས་ཚུ་ ཁྱེད་ཀྱི་དད་པ་ དོན་ལས་རང་དམ་པ་ཨིན་མི་དེ་ལུ་ ཁྱིམ་གྱི་འགྱམ་བཟུམ་སྦེ་ མར་སྒྲིང་སྒྲིང་སྦེ་བཙུགས་ཏེ་ དེ་ལུ་བརྟེན་ཏེ་སྡོད་དགོ་ དེ་ལས་འཕྲོ་མཐུད་དེ་རང་ དམ་པའི་ཐུགས་ཉིད་ནང་སྨོན་ལམ་བཏབ།

²¹ ཁྱེད་མཐའ་མེད་པའི་ཚེ་ནང་འཁྱིད་འོང་མི་ གཙོ་བོ་ཡེ་ཤུ་ཁིརཱིས་ཀྱི་སྙིང་རྗེ་ལུ་སྒུག་སྡོད་པའི་བསྒང་ ཁྱེད་དཀོན་མཆོག་གི་བྱམས་པ་ནང་འཕྲོ་མཐུད་དེ་རང་གནས་དགོ།

²² མི་ལ་ལུ་གིས་ དད་པ་བསྐྱེད་ནི་ལུ་ཐེ་ཚོམ་ཟཝ་ཨིན་ འདི་ཚུ་ལུ་སྙིང་རྗེ་བསྐྱེད་དགོ།

²³ དེ་ལས་ལ་ལུ་ཅིག་ལུ་ མེ་གིས་འཚིག་སར་ལས་ མགྱོགས་པར་བཏོན་ཏེ་ སྲོག་སྐྱབས་འབད་དགོ་ ཁྱེད་ཀྱིས་མི་ལ་ལུ་ཅིག་ལུ་ སྙིང་རྗེ་བསྐྱེད་དེ་ཨིན་རུང་ དྲན་པ་ཐེབས་བཏོན་ཏེ་ ཁོང་གི་སྡིག་པའི་རང་བཞིན་གྱིས་ ཁམས་ལོག་སི་སི་བཟོ་ཚར་མི་བགོ་ལ་ཚུ་ལུ་ སེམས་མ་ཤོར།།

བཀྲིས་ལེགས་སྨོན་ཞུ་བའི་སྐོར།

^24-25 ད་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་རྒྱུད་ལས་ ང་བཅས་ལུ་དད་པ་ཉམས་འགྱོ་ནི་ལས་སྐྱབས་མཛད་དེ་ ཁོ་རའི་གཟི་བརྗིད་དང་ལྡན་མིའི་སྐུ་མདུན་ལུ་ སྐྱོན་ག་ནི་ཡང་མེདཔ་སྦེ་ དགའ་སྤྲོ་གིས་གང་སྟེ་ འཁྱིད་འོང་ཚུགས་མི་ ང་བཅས་ཀྱི་སྐྱབས་མགོན་ དཀོན་མཆོག་ངོ་མ་ཨིན་མི་ ཁོ་རང་རྐྱངམ་གཅིག་ལུ་ གཟི་བརྗིད་ དཔལ་དང་འབྱོར་བ་ དབང་ཤུགས་ དབང་ཚད་ འཛམ་གླིང་མ་མཛད་པའི་ཧེ་མ་ལས་ ད་ལྟོ་དང་དུས་རྒྱུན་དུ་རང་ བཞུགས་པར་ཤོག་ ཨ་མཱེན།། །།