པེ་ཏྲོ་དང་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ ཨ་ནི་ཡི་གུ་འདི་ ཡེ་ཤུ་ཁིརཱིས་ཀྱི་སྐུ་ཚབ་ ང་ པེ་ཏྲོ་གིས་ དཀོན་མཆོག་གིས་བཙག་འཐུ་མཛད་གནང་མི་ ཁོ་རའི་མི་ ཕྱིའི་རྒྱལ་ཁབ་ པཱོན་ཏཱུས་དང་ ག་ལ་ཏི་ ཀ་པ་དོ་ཀི་ཡ་ ཨེ་སི་ཡ་ བི་ཐུན་ཡ་ནང་ཁ་གཏོར་ཏེ་འཁྱམས་སྡོད་མི་ཚུ་ལུ་བྲིས་དོ།

² ཡབ་དཀོན་མཆོག་གིས་ ཁྱེད་ཆ་ཁྱབ་ ཁོ་རའི་མི་སྦེ་ཧེ་མ་ལས་ངོ་མཁྱེནམ་བཞིན་དུ་ དམ་པའི་ཐུགས་ཉིད་ལས་སྦེ་དམ་པ་མཛད་གནང་ཡི་ དེ་གིས་འབད་ ཁྱེད་ཆ་ཁྱབ་ ཡེ་ཤུ་ཁིརཱིས་ཀྱི་བཀའ་ལུ་ཉན་མི་དང་ ཁོ་གི་སྐུ་ཁྲག་རིན་ཆེན་གཏོར་ཏེ་ གཙངམ་མཛད་ཚར་མི་ཚུ་ཨིན། དེ་བ་ཡང་ལྷག་པའི་ ཐུགས་རྗེ་དང་ཞི་བདེ་ ཁྱེད་ལུ་ ཡང་ལས་ཡང་དུ་གནང་བར་ཤོག།

ཁྱེད་ཀྱིས་ཐོབ་མིའི་ཐར་པ་དེ་ག་དེམ་ཅིག་བཟང་པོ་ཨིན་པའི་སྐོར།

³ ད་ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་ ཡབ་དཀོན་མཆོག་ལུ་བསྟོད་པ་ཕུལ་བར་ཤོག་ ཁོ་རང་གི་སྙིང་རྗེ་སྦོམ་དང་འཁྲིལ་ཏེ་ གཤགས་ས་ལས་གསོན་པོ་སྦེ་བཞེངས་མིའི་ ཡེ་ཤུ་ཁིརཱིས་ཀྱི་ཐོག་ལས་ ང་བཅས་ལུ་ནམ་ཡང་ཤི་ནི་མེད་པའི་རེ་བ་ སྐྱེད་ནི་གི་དོན་ལུ་ཚེ་གསརཔ་གནང་ཡི།

⁴ དེ་མ་ཚད་ ཞིང་ཁམས་ལུ་ ནམ་ཡང་མེདཔ་ཐལ་ནི་མེདཔ་ རུལ་ནི་མེདཔ་ ཉམས་འགྱོ་ནི་མེད་པའི་ནོར་སྐལ་ངོ་མ་ ཁྱེད་ཀྱི་དོན་ལུ་བཞག་གནང་ཡོད།

⁵ དཀོན་མཆོག་གིས་ཁྱེད་ཀྱི་དོན་ལུ་གྲ་སྒྲིག་མཛད་གནང་མིའི་ཐར་པ་འདི་ དུས་མཐའན་མཇུག་ལུ་ཕྱི་ཁར་བཏོན་གནང་འོང་ འདི་མ་ཐོབ་ཚུན་ཚོད་ ཁྱེད་ཀྱིས་དད་པ་བསྐྱེད་པའི་ཐོག་ལས་ དཀོན་མཆོག་གི་དབང་ཤུགས་ཀྱིས་ ཁྱེད་ལུ་སྲུང་སྐྱོབ་མཛད་གནངམ་ཨིན།

⁶ དེ་འབདཝ་ལས་བརྟེན་ཏེ་ ད་ལྟོ་ཁྱེད་ ཡུདཔ་ཐེངས་ཅིག་གི་དོན་ལུ་ དཀའ་ངལ་དང་ སྡུག་བསྔལ་མ་འདྲཝ་ལེ་ཤ་མྱོང་དགོ་སྟེ་འབད་རུང་ ཨ་ནི་ཐར་པ་འདི་ ཁྱེད་ཀྱིས་ཐོབ་ནི་ཨིནམ་ལས་ དགའ་སྤྲོ་སྦོམ་སྦེ་འགྱུར།

⁷ ཨ་ནི་བཟུམ་སྦེ་བྱུང་མི་འདི་ ཁྱེད་ཀྱི་དད་པ་ལུ་ བརྟག་དཔྱད་འབད་དེ་ ཡིད་ཆེས་ཏོག་ཏོ་སྦེ་འཐོན་ནི་གི་དོན་ལུ་ཨིན་ གསེར་དེ་མེ་ནང་ཞུཝ་ད་ སྤུས་དག་ཏོག་ཏོ་འཐོན་རུང་ ཉིནམ་གཅིག་གི་ཚེ་མེདཔ་ཐལ་འགྱོ་རང་འགྱོ་འོང་ ཨིན་རུང་རང་ ཁྱེད་ཀྱི་དད་པ་བརྟན་ཏོག་ཏོ་འདི་ གསེར་ལས་ཡང་རིན་གོང་སྦོམ་ཨིན་ ཁྱེད་ཀྱི་དད་པ་ཆེ་ཏོག་ཏོ་གི་འབྲས་བུ་འདི་ ཡེ་ཤུ་ཁིརཱིས་འཛམ་གླིང་ནང་མངོན་སུམ་དུ་ལོག་འབྱོནམ་ད་ བསྟོད་པ་དང་ གཟི་བརྗིད་ སྙན་གྲགས་ ཁོ་ལུ་འོང་པའི་དོན་ལུ་ཨིན།

⁸ དེ་ལས་ཁྱེད་ཀྱིས་ ཧེ་མ་ཁོ་དང་མ་མཇལ་རུང་ ཁོ་ལུ་བརྩེ་གདུང་བསྐྱེད་དེ་འདུག་ དེ་མ་ཚད་ ད་ལྟོ་ཡང་རྩ་ལས་རང་མ་མཇལ་ཏེ་འབད་རུང་ ཁོ་ལུ་དད་པ་བསྐྱེད་དེ་ ཁྱེད་ཀྱི་སེམས་ཁར་ཡོད་རུང་ ཁ་ལས་ཚིག་འཐོན་ཏེ་སླབ་མ་ཚུགས་པའི་ ཧ་ལས་པའི་དགའ་སྤྲོ་མ་འདྲཝ་ཅིག་སྦེ་ར་བསྐྱེདཔ་ཨིན་མས།

⁹ ག་ཅི་སྨོ་ཟེར་བ་ཅིན་ ཁྱེད་ དད་པ་བསྐྱེད་མིའི་ མཐར་ཐུག་གི་དམིགས་དོན་གྱི་འབྲས་བུ་ དཀོན་མཆོག་གིས་ཁྱེད་རང་ལུ་གནང་མིའི་ཐར་པ་དེ་ ཁྱེད་ཀྱིས་ཐོབ་དོ།

¹⁰ ཧེ་མ་ཁོང་ལུང་སྟོན་པ་ཚུ་གིས་ ཁྱེད་ཀྱི་ནང་ན་བྱུང་མིའི་ཐར་པ་གི་སྐོར་ལས་ ལེགས་ཤོམ་སྦེ་དབྱེ་བ་དཔྱད་དེ་བལྟཝ་མ་ཚད་ ཐར་པ་དེ་ ཁྱེད་ལུ་གནང་ནི་འབད་མིའི་གསོལ་རས་ཨིན་ཟེར་བའི་སྐོར་ལས་ ལུང་བསྟན་བཤད་ནུག

¹¹ དེ་ལས་ དཀོན་མཆོག་གིས་ བཙག་འཐུ་མཛད་མི་ཁིརཱིས་ལུ་ འབྱུང་ནི་འབད་མི་སྡུག་བསྔལ་གྱི་སྐོར་ལས་དང་ དེ་གི་ཤུལ་ལས་འོང་ནི་འབད་མིའི་གཟི་བརྗིད་ཀྱི་སྐོར་ལས་ མ་འབྱུང་ནིའི་ཧེ་མ་ལས་འཛོམ་དཔང་འབད་དེ་ ཁོང་གི་ནང་ན་ཡོད་མི་ ཁིརཱིས་ཀྱི་ཐུགས་ཉིད་ཀྱིས་ འདི་གི་སྐོར་ལས་སྟོན་གནང་མི་ དུས་ཚོད་དང་གནས་སྟངས་ ག་དེ་སྦེ་འབྱུང་ནི་ཨིན་ན་ འདི་ག་ར་ཁོང་གིས་དབྱེ་བ་དཔྱད་དེ་བལྟ་ནུག

¹² ཨིན་ཏེ་འབད་རུང་ ཨ་ནི་ལུང་བསྟན་འདི་ཚུ་ ཁོང་རང་གི་ཁེ་ཕན་གྱི་དོན་ལུ་མེན་པར་ ཁྱེད་ཀྱི་དོན་ལུ་ཨིན་ཟེར་ ཁོང་ལུ་སྟོན་གནང་ནུག་ ད་རེས་ནངས་པ་ ཞིང་ཁམས་ལས་གཏང་གནང་མིའི་ཐུགས་ཉིད་ཀྱི་དབང་ཤུགས་དེ་གིས་ ཁྱེད་ལུ་གཏམ་བཟང་བཤད་མི་ཚུ་གིས་ འདི་གི་སྐོར་ལས་རང་ ཁྱབ་བསྒྲགས་འབད་དེ་ཡོདཔ་ཨིན་ ཨ་ནི་ལོ་རྒྱུས་ལུ་ ཁོང་ཕོ་ཉ་དེ་ཚུ་གིས་ཡང་བལྟ་ནིའི་རེ་འདོད་བསྐྱེད་དེ་སྡོདཔ་ཨིན།།

སྤྱོད་ལམ་དམ་པ་སྦེ་སྡོད་དགོ་པའི་སྐོར།

¹³ ད་དེ་ལས་ཕར་ དང་ལེན་འབད་ནིའི་དོན་ལུ་ ཁྱེད་རང་གི་སེམས་གྲ་སྒྲིག་སྦེ་སྡོད་ ཁྱེད་རང་གི་སེམས་གསལ་ཏོག་ཏོ་སྦེ་ མཚམས་ཚོད་བཟུང་ ཡེ་ཤུ་ཁིརཱིས་ད་རུང་ལོག་མངོན་སུམ་དུ་འབྱོནམ་ད་ ཁོ་གིས་གནང་ནི་ཨིན་མིའི་ ཐུགས་རྗེ་དང་ལྡན་པའི་ཐར་པ་དེ་ལུ་ རེ་བ་བསྐྱེད་དེ་སྡོད།

¹⁴ དེ་ལས་ ཁྱེད་ཀྱིས་ཧེ་མ་ དཀོན་མཆོག་ངོ་མ་ཤེསཔ་ད་ འདོད་ཆགས་ཀྱིས་དབང་དུ་བཏང་སྟེ་སྡོད་ནུག་ དེ་འབདཝ་ད་ ད་རེས་ལས་ སླབ་ད་ཉན་ཁུག་བཏབ་མིའི་བུ་དང་བུམོ་བཟུམ་སྦེ་སྡོད་དེ།

¹⁵ ཁྱེད་འབོ་གནང་མི་འདི་ དམ་པ་ཨིནམ་ལས་ ཁྱེད་ཡང་ ག་ཅི་རང་འབད་རུང་ སྤྱོད་ལམ་དེ་དམ་པ་སྦེ་སྒྲིག་སྡོད་དགོ།

¹⁶ ག་ཅི་སྨོ་ཟེར་བ་ཅིན་ ང་དམ་པ་ཨིན་ ཁྱེད་ཡང་དམ་པ་སྦེ་འགྱུར་དགོ་ཟེར་ གསུང་རབ་ནང་ལུ་ བྲིས་ཏེ་འདུག

¹⁷ ཁྱེད་ཀྱིས་དཀོན་མཆོག་ལུ་ཡབ་ཟེར་ཞུ་རུང་ ཁོ་གིས་ཁྲིམས་ཕྱེ་གནངམ་ད་ ཆགས་སྡང་ཕྱོགས་རིས་མེད་པར་ཕྲང་སྟེ་མཛདཔ་ཨིན་ དེ་འབདཝ་ལས་ ད་ལྟོ་ནཱ་འཛམ་བུ་གླིང་ནང་ ག་གིས་ཡང་ངོ་མ་ཤེས་པའི་ མི་ཚུ་བཟུམ་སྦེ་སྡོད་པའི་སྐབས་ ཁོ་ལུ་བལྟ་སྟེ་འདྲོག་སྡོད་དགོ།

¹⁸ ཁྱེད་ ཁྱེད་རའི་ཕ་བརྒྱུད་ཚུ་ལས་རྒྱུད་དེ་ ཁུངས་ག་ནི་ཡང་མེད་པར་ སྡོད་མིའི་མི་ཚེ་འདི་ནང་ལས་ བླུ་རིན་སྤྲོད་གནང་སྟེ་ཉོཝ་ད་ མེདཔ་ཐལ་འགྱོ་མི་གསེར་དང་དངུལ་སྤྲོད་དེ་ ཉོ་དོཝ་བཟུམ་སྦེ་མེན།

¹⁹ དེ་འབདཝ་ད་ སྐྱོན་དང་ཐོ་ག་ནི་ཡང་མེད་མིའི་ལུག་གི་ཕྱུག་ཀུ་བཟུམ་ ཡེ་ཤུ་ཁིརཱིས་ཀྱི་སྐུ་ཁྲག་རིན་ཆེན་དེ་གིས་ བླུ་རིན་གཏང་གནང་སྟེ་ ཁྱེད་ག་ར་ཉོ་ཉོཝ་ཨིན།

²⁰ ཁོ་ལས་རྒྱུད་དེ་ བླུ་རིན་གཏང་ནི་གི་དོན་ལུ་ འཇིག་རྟེན་མ་མཛད་པའི་ཧེ་མ་ལས་ ཁིརཱིས་བཙག་འཐུ་མཛད་གནང་གནངམ་ཨིན་མས་ ད་ མཐའན་མཇུག་གི་དུས་ཚོད་འདི་ཁར་ ཁྱེད་ཀྱི་དོན་ལུ་ ཁོ་མངོན་སུམ་དུ་ཕྱི་ཁར་བཏོན་གནངམ་ཨིན།

²¹ ད་ཁྱེད་ཁིརཱིས་ལས་རྒྱུད་དེ་ དཀོན་མཆོག་ལུ་དད་པ་བསྐྱེད་ཚུགས་ཅི་ དེ་སྦེ་རེ་བ་དང་དད་པ་བསྐྱེད་ཚུགས་མི་འདི་ ག་ཅི་ལས་བརྟེན་ཏེ་ཨིན་ན་ཟེར་བ་ཅིན་ དཀོན་མཆོག་གིས་ཁིརཱིས་གཤགས་ས་ལས་ལོག་གསོན་པོ་སྦེ་བཞེངས་གནང་སྟེ་ ཁོ་ལུ་གཟི་བརྗིད་གནང་ནི་འདི་གིས་ཨིན།

²² ད་ཁྱེད་ཆ་ཁྱབ་བདེན་པའི་གསུང་ལུ་ཉན་ནི་དེ་གིས་ ཁྱེད་རྣམ་པར་དག་པ་འཐོན་ཏེ་ ཁྱེད་རང་གི་སྤུན་ཆ་ཚུ་ལུ་ དོན་ལས་རང་ ཁྱེད་ཀྱིས་བྱམས་པ་འབདཝ་ཨིན་མས་ ད་འཕྲོ་མཐུད་དེ་རང་ རྫུས་མ་མེན་པར་ སེམས་ཀྱི་གཏིང་ལས་རང་ གཅིག་གིས་གཅིག་ལུ་ བྱམས་པ་འབད།

²³ ག་ཅི་སྨོ་ཟེར་བ་ཅིན་ དུས་རྒྱུན་དུ་འགྱུར་བ་མེད་པར་ གསོན་པོ་སྦེ་བཞུགས་ཡོད་མི་ དཀོན་མཆོག་གི་གསུང་གི་ཐོག་ལས་ ཁྱེད་མེདཔ་འགྱོ་བའི་སོན་ལས་མེན་པར་ མེདཔ་ཐལ་ནི་མེད་པའི་སོན་ལས་ མི་ཚེ་གསརཔ་སྦེ་སྐྱེས་སྐྱེསཝ་ཨིན།

²⁴ ཤ་ཁྲག་ཕུང་པོའི་མིའི་ལུས་འདི་ ག་ར་རྩྭ་དང་འདྲ་ འདི་གི་གཟི་བརྗིད་འདི་ མེ་ཏོག་བཟུམ་ཨིན་ ཡུདཔ་ཐེངས་ཅིག་ལུ་རྩ་སྐམ་ དེ་ལས་མེ་ཏོག་བུད་དེ་འགྱོཝ་ཨིན།

²⁵ དེ་འབདཝ་ད་ གཙོ་བོའི་གསུང་འདི་ དུས་རྒྱུན་དུ་རང་བཞུགས་ཡོད། ཨ་ནི་གསུང་འདི་ ཁྱེད་ལུ་བཤད་མིའི་གཏམ་བཟང་འདི་ཨིན།