ཀོ་རཱིན་ཐི་དང་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ དཀོན་མཆོག་གི་ཐུགས་དགོངས་བཞིན་དུ་ ཁིརཱིས་ཡེ་ཤུ་གི་སྐུ་ཚབ་སྦེ་བཙག་འཐུ་མཛད་གནང་མི་ ང་ པའུལ་དང་ ང་བཅས་ཀྱི་སྤུན་ཆ་ སཱོས་ཐེ་ནཱེས་ལས།

² དཀོན་མཆོག་གིས་ཁིརཱིས་ཡེ་ཤུ་གི་ཐོག་ལས་སྦེ་གཙངམ་མཛད་ ཁོ་རའི་མི་སྦེ་བཙག་འཐུ་གནང་མི་ ཁྱེད་ ཀོ་རཱིན་ཐི་ནང་ཡོད་མི་ཆོས་ཚོགས་དང་ ཕྱོགས་སོ་སོ་ལས་ཕར་བཞུགས་ཡོད་མི་དདཔ་ཅན་ག་ར་ ང་བཅས་དང་ཁོང་རའི་གཙོ་བོ་ ཡེ་ཤུ་ཁིརཱིས་ཀྱི་མཚན་ནང་ཞུ་བ་ཕུལ་མི་ཚུ་ལུ་ ཡི་གུ་འདི་འབྲི་དོ།

³ ང་བཅས་ཀྱི་ཡབ་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ཀྱིས་ ཁྱེད་ཆ་ཁྱབ་ལུ་ཐུགས་རྗེ་དང་ཞི་བདེ་གནང་བཅུག།

དཀོན་མཆོག་ལུ་བཀའ་དྲིན་བསམ་པའི་སྐོར།

⁴ ང་རྟག་བུ་རང་ཁྱེད་ཀྱི་སྐོར་ལས་ངེ་གི་དཀོན་མཆོག་ལུ་ བཀའ་དྲིན་བསམ་ཨིན་ ག་ཅི་སྨོ་ཟེར་བ་ཅིན་ དཀོན་མཆོག་ཁོ་རའི་ཐུགས་རྗེ་དེ་ ཁིརཱིས་ཡེ་ཤུ་ལས་རྒྱུད་དེ་ཁྱེད་ལུ་གནང་སྟེ་ཡོད།

⁵ དེ་མ་ཚད་པར་ ཁྱེད་ཁོ་ལས་རྒྱུད་དེ་ བློ་དང་ཤེས་རབ་ དེ་ལས་ ག་ཅི་ནང་ལས་རང་འབད་རུང་ སྤུས་ཚད་ཡར་འཕར་འགྱོ་སྟེ་ཡོདཔ་ཨིན།

⁶ འདི་ནང་ལས་ ང་བཅས་ག་ཅི་ཧ་གོ་ཚུགསཔ་སྨོ་ཟེར་བ་ཅིན་ ང་གིས་ཁྱེད་ཆ་ཁྱབ་ལུ་ ཁིརཱིས་ཀྱི་སྐོར་ལས་བཤད་མི་འཛོམ་དཔང་འདི་ ཏན་ཏན་ཨིན་ཟེར་བའི་བདེན་ཁུངས་བཀལཝ་ཨིན།

⁷ དེ་འབདཝ་ལས་ ཁྱེད་ཆ་ཁྱབ་གཙོ་བོ་ཡེ་ཤུ་ཁིརཱིས་ མངོན་སུམ་དུ་མཇལ་བའི་ཉིནམ་འདི་ལུ་ རེ་བ་བསྐྱེད་དེ་བསྒུག་སྡོད་པའི་བར་དུ་ ཁྱེད་ནང་ཐུགས་ཉིད་ཀྱི་གསོལ་རས་འབོལ་མཆིས་ཆི་སྦེ་སྡོད་འོང་།

⁸ གཙོ་བོ་ཡེ་ཤུ་ཁིརཱིས་ལོག་མ་འབྱོན་པའི་ཉིནམ་ཚུན་ཚོད་ ཁྱེད་སྐྱོན་དང་འཛོལ་བ་ག་ནི་ཡང་མེད་པར་ མཐའན་མཇུག་ཚུན་ཚོད་རང་ སྒྲིང་སྒྲིང་སྦེ་བཟོ་སྟེ་བཞག་གནང་འོང་།

⁹ འདི་ཚུ་ག་ར་ བརྟན་ཏོག་ཏོ་ཨིན་མི་དཀོན་མཆོག་གིས་ ཁོ་རའི་སྲས་ ང་བཅས་ཀྱི་གཙོ་བོ་ཡེ་ཤུ་ཁིརཱིས་དང་གཅིག་ཁར་ མཉམ་འབྲེལ་བཞག་ནི་གི་དོན་ལུ་འབོ་གནང་ཡི།།

དདཔ་ཅན་ཚུ་ཁ་གཏོར་འགྱོ་མ་བཅུག་ནི་གི་སྐོར།

¹⁰ སྤུན་ཆ་ཚུ་ ཁྱེད་ག་ར་འཆམ་མཐུན་ཏེ་སྡོད་ཟེར་ ང་གིས་ཡེ་ཤུ་ཁིརཱིས་ཀྱི་མཚན་ནང་ ཁྱེད་ལུ་གསོལཝ་བཏབ་དོ་ ཁྱེད་ཀྱི་སྦུག་ལུ་འཐབ་འཛིང་བྱུང་སྟེ་ སོ་སོ་སྦེ་ཁ་གཏོར་འགྱོ་མ་བཅུག་ དེ་འབདཝ་ད་ ཁྱེད་ཆ་ཁྱབ་སེམས་གཅིག་དང་ མནོ་བསམ་གཅིག་སྦེ་གཏང་སྟེ་སྡོད།

¹¹ དབའེ་ ངེ་གི་སྤུན་ཆ་ཚུ་ ཁྱེད་ལ་ལུ་ཅིག་གི་བར་ན་མ་བསྒྲིགས་པར་ ཁ་ཤགས་བརྐྱབས་ཏེ་ཡོད་པའི་སྐོར་ལས་ ཁོལོའི་གི་བཟའ་ཚན་ཚུ་གིས་ ང་ལུ་རྣ་བ་སྐྱེལ་ཏེ་ཡོད།

¹² ང་གིས་སླབ་མིའི་དོན་དག་འདི་ ག་ཅི་སྨོ་ཟེར་བ་ཅིན་ ཁྱེད་ཀྱི་སྦུག་ལས་ ལ་ལུ་ཅིག་གིས་ ང་ པའུལ་གྱི་ཨིན་ ང་ ཨ་པོ་ལཱོས་ཀྱི་ཨིན་ ང་ ཀེ་ཕཱས་ཀྱི་ཨིན་ ད་རུང་གཅིག་གིས་ ང་ཁིརཱིས་ཀྱི་ཨིན་ཟེར་སླབ་མས།

¹³ ད་ཁིརཱིས་དེ་ བགོ་བཤའ་བརྐྱབས་ཏེ་ཡོདཔ་ཨིན་ན་ པའུལ་ ཁྱེད་ཀྱི་མཐའ་དོན་ལུ་ཁྲམ་ཤིང་གུ་བརྐྱངས་ཡི་ག་ ཡང་ཅིན་ པའུལ་གྱི་མིང་ནང་ཁྱེད་ཁྲུས་གསོལ་ཐོབ་ཐོབ་ཨིན་ན།

¹⁴ ང་གིས་ དཀོན་མཆོག་ལུ་བཀའ་དྲིན་ཆེ་ཟེར་ཞུཝ་ཨིན་ ག་ཅི་སྨོ་ཟེར་བ་ཅིན་ ང་གིས་ ཁྱེད་ཀྱི་གྲལ་ཁ་ལས་ ཀིརཱིས་པུས་དང་ གའི་ཡུས་མ་གཏོགས་གཞན་ག་ལུ་ཡང་ཁྲུས་གསོལ་མ་བྱིན།

¹⁵ དེ་བཟུམ་སྦེ་ ཁྱེད་ཀྱི་གྲལ་ཁ་ལས་ ག་གིས་ཡང་ ངེ་གི་མིང་ནང་ཁྲུས་གསོལ་ཐོབ་ཅི་ཟེར་སླབ་མི་ཚུགས།

¹⁶ (ད་རུང་ང་གིས་ ཨཱིས་ཏེ་ཕ་ནཱས་ནང་ཚན་ཚུ་ལུ་ཁྲུས་གསོལ་བྱིན་ཡི་ འདི་ལས་བརྒལ་ཏེ་ གཞན་ལུ་ཁྲུས་གསོལ་བྱིན་ཡོད་པའི་དཔྱད་རིག་གཏང་མ་ཚུགས།)

¹⁷ ག་ཅི་སྨོ་ཟེར་བ་ཅིན་ ཁིརཱིས་ཀྱིས་ ང་ལུ་ཁྲུས་གསོལ་བྱིན་པ་མེན་པར་ གཏམ་བཟང་བཤད་པ་བཏང་གནང་ཡི་ འདི་དགེ་བཤེས་ཚུ་གི་ལོ་རྒྱུས་བཟུམ་སྦེ་མེན་ དེ་བཟུམ་སྦེ་ཨིན་པ་ཅིན་ ཁིརཱིས་ཁྲམ་ཤིང་གུ་གཤགས་པའི་མཐུ་སྟོབས་དེ་ ག་ནི་ཡང་མེདཔ་སྦེ་འགྱོ་འོང་།།

ཁིརཱིས་དཀོན་མཆོག་གི་མཐུ་སྟོབས་དང་ཤེས་རབ་ཨིན་པའི་སྐོར།

¹⁸ མེདཔ་ཐལ་འགྱོ་མི་ཆ་ཁྱབ་ཀྱི་དོན་ལུ་ ཁྲམ་ཤིང་གི་ལོ་རྒྱུས་དེ་ ཁུངས་དོན་མེད་པའི་རྩ་རྒས་ཚུ་གི་ལོ་རྒྱུས་བཟུམ་སྦེ་ཨིན་ དེ་འབདཝ་ད་ ང་བཅས་སྐྱབས་མཛད་དེ་ཡོད་མི་ཚུ་གི་དོན་ལུ་ དཀོན་མཆོག་གི་མཐུ་སྟོབས་ཨིན།

¹⁹ ག་ཅི་སྨོ་ཟེར་བ་ཅིན། ང་གིས་མཁས་པ་ཅན་ཚུ་གི་རིག་པ་བརླག་སྟོར་གཏང་ནི་ དེ་ལས་བློ་རིག་ཅན་ཚུ་གི་ རིག་རྩལ་ཚུ་ཟུར་ཁ་བཀོ་བཞག་ནི་ཟེར་ བྲིས་ཏེ་འདུག

²⁰ ཤེས་རབ་ཅན་ཚུ་ག་ཏེ་སྨོ་ ཡོན་ཏན་ཅན་ག་ཏེ་སྨོ་ ད་རེས་ནངས་པ་གི་གྲུབ་མཐའ་མཁསཔ་ཚུ་ག་ཏེ་སྨོ་ དཀོན་མཆོག་གིས་ཨ་ནི་འཇིག་རྟེན་གྱི་རིག་པ་ལུ་ གླེན་མགོ་མཛད་མ་གནང་ག།

²¹ འཇིག་རྟེན་པ་ཚུ་གིས་ ཁོང་རའི་རིག་པ་ལས་རྒྱུད་དེ་ དཀོན་མཆོག་ལུ་ངོ་ཤེས་མ་ཚུགསཔ་ལས་བརྟེན་ཏེ་ དཀོན་མཆོག་གིས་ཁོ་རང་གི་ཤེས་རབ་དང་ཁྲིལ་ཏེ་ ང་བཅས་ཀྱིསབཤད་མི་གཏམ་བཟང་ མི་གཞན་གྱིས་གླེན་པ་ཟེར་སླབ་མི་དེ་ལུ་ དད་པ་སྐྱེད་མི་ཚུ་ སྐྱབས་མཛད་སྦེ་ ཐུགས་ཐག་བཅད་མཛད་ནུག

²² ཡ་ཧུ་ད་པ་ཚུ་ལུ་ཞིང་ཁམས་ཀྱི་རྟགས་མཚན་དགོ་ གིརིག་པ་ཚུ་གིས་རིག་རྩལ་འཚོལཝ་ཨིན།

²³ དེ་འབདཝ་ལས་ ང་བཅས་ཀྱིས་ཁྲམ་ཤིང་གུ་ གཤགས་མི་ཁིརཱིས་ཀྱི་སྐོར་ལས་ཆོས་བཤདཔ་ད་ ཁོང་ ཡ་ཧུ་ད་པ་ཚུ་ལུ་སེམས་ཁར་ཕོག་པའི་གཏམ་དང་ ཕྱིའི་མི་རིགས་ཚུ་ལུ་འབྱུང་ཁུངས་མེད་པའི་གཏམ་ལུ་འགྱུར་སོང་ཡི།

²⁴ དེ་འབདཝ་ད་ ཡ་ཧུ་ད་པ་ཨིན་རུང་མེན་རུང་ དཀོན་མཆོག་གིས་འབོ་གནང་མི་ཆ་ཁྱབ་ཀྱི་དོན་ལུ་ ཁིརཱིས་དེ་དཀོན་མཆོག་གི་མཐུ་སྟོབས་དང་ཤེས་རབ་ཨིན།

²⁵ ག་ཅི་སྨོ་ཟེར་བ་ཅིན་ དཀོན་མཆོག་གི་འཆར་གཞི་དེ་ མི་ཚུ་གི་དོན་ལུ་ཁུངས་མེདཔ་བཟུམ་སྦེ་ཨིན་རུང་ མི་ཚུ་གི་རིག་པ་ལས་ཡང་མཁས་ དེ་ལས་ཁིརཱིས་ཁྲམ་ཤིང་གུ་གཤགསཔ་ད་ མི་ཚུ་གིས་དཀོན་མཆོག་ལུ་མཐུ་སྟོབས་མེདཔ་སྦེ་བརྩིས་རུང་ མི་ཚུ་གི་ཁེ་རྒོ་ལས་ཡང་དཀོན་མཆོག་འདི་མཐུ་སྟོབས་ཅན་ཨིན།

²⁶ སྤུན་ཆ་ཚུ་ ཁྱེད་ལུ་འགོ་དང་པ་འབོཔ་ད་ ཁྱེད་མི་ག་བཟུམ་གཅིག་ཡོདཔ་ཨིན་ན་ དེ་གི་སྐོར་ལས་ མནོ་བསམ་གཏང་ཞིག་ མི་གི་རང་བཞིན་ལས་བལྟ་བ་ཅིན་ ཁྱེད་ཀྱི་གྲལ་ཁ་ལུ་ཤེས་རབ་ཅན་ལེ་ཤ་དང་ དབང་ཚད་ཅན་ལེ་ཤ་ དེ་ལས་ཕྱུགཔ་གི་བཟའ་ཚང་ནང་སྐྱེས་མི་ལེ་ཤ་མིན་འདུག

²⁷ དེ་འབདཝ་ད་ ཤེས་རབ་ཅན་ཚུ་ལུ་ངོ་ཚ་བཅུག་ནིའི་དོན་ལུ་ དཀོན་མཆོག་གིས་ ཁོང་འཛམ་གླིང་གི་མི་ཚུ་གིས་ རྩ་རྒས་སྦེ་བརྩིས་བཞག་མི་ཚུ་ལུ་བཙག་འཐུ་མཛད་གནང་ནུག་ དེ་ལས་དབང་ཚད་ཅན་ཚུ་ལུ་ ངོ་ཚ་བཅུག་ནི་གི་དོན་ལུ་ དབང་ཚད་མེད་མི་ཚུ་ལུ་བཙག་འཐུ་མཛད་གནང་ནུག

²⁸ ཁོང་འཛམ་བུ་གླིང་གི་མི་ཚུ་གིས་ ཁུངས་དོན་མེད་པར་བཀོ་བཞག་མི་ཚུ་དང་ ག་ནི་བ་ཁག་མ་ཆེཝ་སྦེ་བརྩིས་མི་ཚུ་ལུ་ དཀོན་མཆོག་གིས་ བཙག་འཐུ་མཛད་གནང་ནུག་ དེ་ལས་འདི་ཚུ་གི་ཐོག་ལས་ ཁག་ཆེཝ་སྦེ་བརྩིས་མི་དེ་ཚུ་ ཁོ་གིས་ག་ནི་ཡང་མེདཔ་སྦེ་མཛད་ནུག

²⁹ དཀོན་མཆོག་གིས་དེ་སྦེ་མཛད་གནང་མིའི་དོན་དག་དེ་ མི་ག་གིས་ཡང་ཁོ་གི་སྐུ་མདུན་ལུ་རང་བསྟོད་རྐྱབ་མ་བཅུག་ནི་སྦེ་ཨིན་མས།

³⁰ དཀོན་མཆོག་གིས་ཁྱེད་ག་ར་ ཁིརཱིས་ཡེ་ཤུ་ནང་གཅིག་སྦེ་མཛད་གནང་སྟེ་ ང་བཅས་ཕན་ཐོགས་པའི་དོན་ལུ་ ཁིརཱིས་ཤེས་རབ་དང་ལྡནམ་སྦེ་འགྱུར་ཡི་ དེ་ལས་ཁིརཱིས་ལས་རྒྱུད་དེ་ དཀོན་མཆོག་གིས་ང་བཅས་ལུ་ ཁོ་རའི་ཐུགས་དང་ལྡན་པའི་ མི་ཕྲངམ་དང་ མི་གཙངམ་སྦེ་མཛད་དེ་ ང་བཅས་རའི་སྡིག་པ་ལས་དགོངས་ཡངས་གཏང་གནང་ནུག

³¹ དེ་འབདཝ་ལས་ ཁྱེད་ག་ར་ཨིན་རུང་ བསྟོད་པ་རྐྱབ་དགོ་མནོ་བ་ཅིན་ གཙོ་བོ་གི་སྐོར་ལས་རྐྱངམ་གཅིག་བསྟོད་པ་རྐྱབ་ཟེར་བྲིས་ཏེ་འདུག།