San Lucas 3 - DIOSPA QHELQACHISQ

Bautizaj Juanpa willasqan

¹ Chunka phishqayoj watataña kuraj kamachej Tiberio Roma jatun suyuta kamachishajtin, Poncio Pilato Judeapi kamachisharqa, Herodestaj Galileapi. Wawqen Felipetaj Itureapi, Traconitepiwan kamachisharqa, Lisaniastaj Abiliniapi kamachisharqa.

² Jinataj Anaswan, Caifaswan kuraj kaj sacerdotekuna karqanku. Chaypachataj Diosqa Zacariaspa churin Juanman parlarqa, ch'inpi kashajtin.

³ Chantá Juan tukuy Jordán mayu muyuynintinpi purispa, runaman willararqa bautizachikunankuta, ajinamanta yachayta qospa Diosman kutirikusqankumanta juchanku pampachasqa kananpaj.

⁴ Kayqa Diosmanta sut'inchaj Isaiaspa p'anqanpi qhelqasqaman jina junt'akorqa: Ch'innejpi uj runaj qhaparisqan uyarikun: Tata Diospaj ñanta pichaychej, purinantataj cheqanyachiychej.

⁵ Tukuy wayq'o junt'achisqa kanqa, jinataj tukuy orqokuna, moqokuna ima pampachakonqa. Wist'u ñankunaqa cheqanchasqa kanqa, moqo moqolla ñankunapis pampachasqa.

⁶ Chantá tukuy runaqa Diospa kachamusqan qhespichejta rikonqanku, nispa.

⁷ Bautizachikoj rejkunaman Juan nerqa: Katarikunaj miraynin. Pitaj nisorqachej Diospa jamoj k'araj phiñakuyninmanta ayqenaykichejtari?

⁸ Allinta puriychej ari, ajinamanta juchaykichejmanta Diosman kutirikusqaykichejta sut'ita rikuchinaykichejpaj. Amataj qankunapuralla ninakuychejchu: Mana ima llakiypis noqaykupaj kanqachu, imaraykuchus Abrahampa miraynin kayku, nispa. Noqarí niykichej: Dios kay rumikunatapis Abrahampa wawankunaman tukuchiyta atinman.

⁹ Jachaqa ñapis wakisqaña kashan sach'akunata saphinmanta k'utunanpaj. Chayrayku, mana allinta poqoj tukuy sach'aqa urmachisqa kanqa, ninamantaj enqhaykusqa, nispa.

¹⁰ Chay runakunataj taporqanku: Chantá imatataj ruwasqaykuri? nispa.

¹¹ Juantaj kuticherqa: Pichus iskay p'achayoj kajqa ujninta mana p'achayojman qopuchun. Mikhunayoj kajpis kikillantataj ruwachun mana mikhunayoj kajwan, nispa.

¹² Roma suyupaj impuestota cobrajkunapis bautizachikoj jamuspa, Juanta taporqanku: Yachachej, noqaykoqa imatataj ruwanayku tiyan? nispa.

¹³ Paytaj kuticherqa: Kamachisqaman jina maychus kajllata impuestota pagachiychej, amataj astawanqa, nispa.

¹⁴ Chantá wakin soldadokunapis tapullarqankutaj: Noqaykurí imatataj ruwasqaykuri? nispa. Juantaj kuticherqa: Ama pimantapis ni imanta qhechuychejchu, nitaj pitapis qhasimanta tumpaychejchu. Jinataj pagoykichejwan sonqo junt'asqa kaychej, nispa.

¹⁵ Chaypacha tukuy runakuna imata jina suyasharqanku Diospa kachamusqan Cristo chayamunanta. Chayrayku Juanmanta tapukusharqanku: Manachu pay Cristo kanman? nispa.

¹⁶ Juantajrí tukuyman kuticherqa: Noqaqa yakuwan bautizaykichej. Qhepaytatajrí waj jamushan, paytaj Santo Espirituwan, chantá ninawan ima bautizasonqachej. Payqa noqamanta aswan atiyniyoj, noqataj mana paypa wata runan kanaypaj jinallapischu kani.

¹⁷ Jorcapis makinpiña kashan, erapi trigota wayrachinanpaj. Chantá trigota pirwaman jallch'anqa, pajatatajrí mana thasnukoj ninawan kanaykonqa, nispa.

¹⁸ Ajinata Juan chay jina ashkha yuyaychaykunawan sumaj willayta runakunaman willarqa.

¹⁹ Chantá Juanqa kuraj kamachej Herodestapis k'amillarqataj, imaraykuchus Herodesqa wawqen Felipej warmin Herodiasta qhechuspa, paywan warmichakorqa. Paytaj waj millay imakunatapis ruwallarqataj.

²⁰ Chantá Herodesqa Juanta carcelman wisq'acherqa, chayta ruwaspataj, tukuy millay ruwasqanman astawan yapaykorqa.

Jesús bautizachikun

²¹ Herodes manaraj Juanta carcelman wisk'achishajtin, Juanqa runakunata bautizasharqa. Jinapis Jesús Juanwan bautizachikullarqataj. Chantá Jesús Dioswan parlarikushajtin, janajqa kicharikorqa.

²² Jinapitaj Santo Espíritu urpi jina paypa patanman urayk'amorqa, janaj pachamantataj Dios nimorqa: Qanmin munasqa Churiy kanki, qanwantaj sonqo junt'asqa kani, nispa.

Jesuspa ñawpa tatankunaj sutinku

²³ Jesusqa Diosmanta sumaj willayta willarayta qallarishaspa, kinsa chunka watayoj jina karqa. Runakunataj yuyarqanku Jesusqa Elíj churin Josejpa churin kasqanta.

²⁴ Paytaj Matatpa churin karqa, Levijpa churin, Melquijpa churin, Janaijpa churin, Josejpa churin,

²⁵ Matatiaspa churin, Amospa churin, Nahumpa churin, Eslijpa churin, Nagaypata churin,

²⁶ Matpa churin, Matatiaspa churin, Semeipata churin, Josejpa churin, Yodajpa churin,

²⁷ Joanajpa churin, Resaj churin, Zorobabelpa churin, Salatielpa churin, Nerijpa churin,

²⁸ Melquijpa churin, Adijpa churin, Cosanpa churin, Elmodampa churin, Erpa churin,

²⁹ Josuejpa churin, Eliezerpa churin, Jorinpa churin, Matatpa churin, Levijpa churin,

³⁰ Simeonpa churin, Judajpa churin, Josejpa churin, Jonanpa churin, Eliaquinpa churin,

³¹ Meleajpa churin, Mainanpa churin, Matatajpa churin, Natanpa churin, Davidpa churin,

³² Yesejpa churin, Obedpa churin, Boozpa churin, Salmonpa churin, Nasonpa churin,

³³ Aminadabpa churin, Arampa churin, Arnijpa churin, Esronpa churin, Farespa churin, Judajpa churin,

³⁴ Jacobpa churin, Isaacpa churin, Abrahampa churin, Terajpa churin, Najorpa churin,

³⁵ Serugpa churin, Ragaujpa churin, Pelegpa churin, Eberpa churin, Salaj churin,

³⁶ Cainanpa churin, Arfaxadpa churin, Sempa churin, Noejpa churin, Lamecpa churin,

³⁷ Matusalenpa churin, Enocpa churin, Yaredpa churin, Malalelpa churin, Cainanpa churin,

³⁸ Enospa churin, Setpa churin, Adanpa churin ima, paytaj Diospa churin karqa.