San Juan 3 - DIOSPA QHELQACHISQ

Nicodemo Jesuswan parlarikun

¹ Fariseokunamanta ujnin Nicodemo sutiyoj karqa. Payqa judiokuna ukhupi manchay uyarisqa karqa.

² Uj ch'isi Jesusta watukoj rispa, pay nerqa: Yachachej Wiraqochi, yachachinawaykupaj Diospa kachamusqan kasqaykita yachayku. Mana pipis, imatachus qan ruwanki, chay jina runaj mana jayk'aj rikusqan t'ukunata ruwayta atinmanchu, Dios mana paywan kajtenqa, nispa.

³ Jesustajrí kutichispa, nerqa: Kayta sut'ita niyki: Sichus pipis watej mana paqarinmanchu chayqa, Diospa kamachiyninta ni rikullanqapischu, nispa.

⁴ Nicodemotajrí payta nerqa: Imaynatataj pipis machu runaña kashaspa watej paqarinmanri? Watej paqarinanpaj, ujtawanchu mamanpa wijsanman kutiykunman? nispa.

⁵ Chantá Jesús kuticherqa: Sut'ita niyki: Sichus pipis yakumanta, chantá Espiritumanta ima mana paqarin chayqa, Diospa kamachiyninman mana yaykuyta atenqachu.

⁶ Runamanta paqarejqa runalla. Pillapis Diospa wawan kananpajrí Santo Espiritumin payman kawsayta qonan tiyan.

⁷ Ama t'ukuychu: Watej paqarinayki tiyan, nispa nisusqaymanta.

⁸ Wayraqa maymantachus munasqanmanta wayramun, sonasqantataj uyarinki, manataj yachankichu maymantachus jamusqanta, nillataj maymanchus risqantapis. Santo Espiritumanta kawsayta tukuy jap'ejkunapis ajinallataj kanku, nispa.

⁹ Chantá Nicodemo taporqa: Imaynataj chay kanmanri? nispa.

¹⁰ Jesustaj nerqa: Qan Israelpi manchay uyarisqa yachachej kashaspa, manachu chayta yachanki?

¹¹ Sut'ita niyki: Noqaykoqa yachasqaykuta parlayku, rikusqaykutataj willayku. Qankunatajrí willasqaykuta mana jap'ikunkichejchu.

¹² Sichus kay pachapi imachus kajmanta parlajtiy, nisqayta mana jap'ikunkichejchu chayqa, imaynatataj janaj pachapi kajmanta willajtiy, nisqayta jap'ikuwajchejri?

¹³ Mana pipis janaj pachaman rerqachu, manachayqa Runaj Churillan janaj pachamanta urayk'amorqa.

¹⁴ Imaynatachus ch'innejpi Moisés broncemanta katarita k'aspiman warkhuspa pataman oqharerqa, ajinallatataj Runaj Churinpis pataman oqharisqa kanqa.

¹⁵ Ajinamanta paypi tukuy atinikojkuna wiñay kawsayniyoj kanqanku.

Diosqa tukuy runata munakun

¹⁶ Dios chay jinatapuni kay pachapi kaj chhikata munakusqanrayku uj k'ata Churinta qorqa. Ajinamanta tukuy pichus paypi atinikojqa mana chinkanqachu, aswanpis wiñay kawsayniyoj kanqa.

¹⁷ Diosqa mana runakunata juchachananpajchu Churinta kay pachaman kachamorqa, manachayqa paynejta paykunata qhespichinanpaj.

¹⁸ Pillapis paypi atinikojqa mana juchachasqachu kanqa. Paypi mana atinikojrí ñapis juchachasqaña, Diospa k'ata Churinpi mana atinikusqanrayku.

¹⁹ Chantá kayraykumin runakuna juchachasqa kanqanku: Diospa k'anchaynin kay pachaman jamorqa. Runakunatajrí laqhata k'anchaymanta nisqa astawan munakorqanku, imajtinchus paykuna millayta ruwaspa purerqanku.

²⁰ Millayta ruwaspa purejkunaqa k'anchayta chejninku, manataj k'anchayman qayllamunkuchu, millay ruwasqanku ama sut'inchasqa kananpaj.

²¹ Cheqan kajta ruwaspa purejkunarí k'anchayman qayllamunku, ruwasqanku Diospa munasqanman jina kasqanta wajkuna yachanankupaj, nispa.

Bautizaj Juanqa Jesusmanta ujtawan parlan

²² Chantá Jesús, yachachisqankunawan ima Judea jap'iyman rerqanku. Chaypi paykunawan qhepakuspataj, Jesús runakunata bautizasharqa.

²³ Juanpis Enonpi, chantá Salín qayllapi ima runakunata bautizashallarqataj, imaraykuchus chaynejpi ashkha yaku karqa. Runakunataj bautizachikunankupaj payman risharqanku.

²⁴ Chay karqa manaraj Juan carcelman wisq'asqa kashajtin.

²⁵ Chantá Juanpa yachachisqankuna Diospa ñawpaqenpi llimphupaj qhawasqa kanapaj mayllakunamanta uj judiowan churanakorqanku.

²⁶ Juanman rispataj, yachachisqankuna nerqanku: Yachachej Wiraqochi, Jordán mayu chimpapi pichus qanwan kasharqa, pimantatajchus willarqanki, chay runa bautizashan, tukuytaj payman k'askapushanku, nispa.

²⁷ Chantá Juan kuticherqa: Runaqa mana imatapis jap'iyta atinmanchu, manachus Dios qonman chayqa.

²⁸ Qankuna kay nisqayta yachankichejña: Mana noqachu Cristo kani, manachayqa paypa ñawpaqenta kachamusqa kani, tukuy imata wakichinaypaj, nispa.

²⁹ Noqaqa casarakoj qharejpa kawsaqen jina kani. Casarakupi noviayojqa qharilla jinataj casarakoj qharej kawsaqen paypa parlasqanta uyarispa, paywan khuska kusikun. Ajinata noqapis Jesuspa ruwasqanmanta kusikushani.

³⁰ Payqa astawan, astawan kurajpaj qhawasqa kanan tiyan, noqatajrí pisillapajña qhawasqa, nispa.

Janaj pachamanta jamoj

³¹ Janaj pachamanta jamojqa tukuymanta aswan kuraj. Noqanchejrí kay pachamanta kaspa, kay pachapi imachus kajllamanta parlanchej. Janaj pachamanta jamojrí tukuymanta aswan kurajmin.

³² Payqa imatachus janaj pachapi uyarisqanta, chantá rikusqanta ima parlan. Chaywanpis pisilla imatachus nisqanta jap'ikunku.

³³ Tukuy pichus sut'inchasqanta jap'ikojqa sut'ita nin Dios cheqatapuni parlasqanta.

³⁴ Diospa kachamusqanqa Diospa simi nisqanmanta parlan, imajtinchus Diosqa Santo Espiritunta mana mich'akuspa payman qon.

³⁵ Diostaj Churinta munakuspa, tukuy imata makinman churan.

³⁶ Pichus Diospa Churinpi atinikojqa wiñay kawsayniyoj. Churipi mana atinikuyta munajrí mana wiñay kawsayman yaykonqachu, aswanpis Diospa phiñakuynin paypa patanpi kashan.