Judas 1 - DIOSPA QHELQACHISQAN DEUTEROCANONICAL

Judas wawqe panakunata napaykun

¹ Noqa Judas kani, Jesucristoj wata runan, chantá Santiagoj wawqen. Kay cartatataj Tata Diospa wajyasqankunaman apachimuni, pikunatachus Tata Dios munakun, Jesucristotaj waqaychan, chaykunaman.

² Diospa khuyakuynin, sonqo tiyaykuynin, munakuynin ima qankunapi may jinapuni kachun.

Mana cheqanta yachachejkuna

³ Munasqa wawqe panakuna, qankunaman maytapuni qhelqamuyta munarqani Dios imaynatachus qhespichiwasqanchejmanta. Chaywanpis kunanqa munaspa mana munaspa mayta niykichej: Sinch'ita kallpakuspa, allinta qhawaychej, imatachus Diosmanta yachachiwasqanchej ama q'ewisqa kananpaj. Chaytamin Dios uj kutillata wiñaypaj paypa ajllakusqankunaman qorqa.

⁴ Chayta niykichej, imaraykuchus wakinkuna iglesiaman mana reparayllata yaykuykamunku. Paykunaqa Dioswan churanakojkuna kanku, imajtinchus Diospa qhasilla k'acha yanapayninta q'ewinku, munasqankuman jina millayta ruwaspa purinankupaj. Chaywanpis paykuna juchachasqa kanankoqa ñawpajmantapachaña nisqa kashan, imaraykuchus Tukuyta Kamachej Jesucristota qhesachanku.

⁵ Qankuna kayta yachankichejña. Chaywanpis uj kutitawan yuyarichiyta munaykichej: Tukuyta Kamachej Dios israelitakunata Egiptomanta orqhomuspa qhespicherqa. Payta wasanchajkunatarí chinkarparicherqa.

⁶ Jinallataj wakin angelkunapis Tata Dios qosqan kamachinapaj atiyta mana waqaychasqankuchu. Manachayqa maynejmanchus churasqa karqanku, paykuna chayta saqesqanku. Diostajrí chay angelkunata tuti laqhayaypi wiñaypaj wisq'aykusqa, jatun juicio p'unchaypi juchachasqa kanankupaj.

⁷ Jinallataj ama qonqaychejchu Sodomamanta, Gomorramanta, chantá chay qayllapi kaj llajtakunamanta ima. Chay llajtakunapi tiyakojkuna khuchiriyoman, chantá tukuy imaymana millay ch'ichita purinaman qokusqanku. Chayrayku Dios chay llajtakunata wiñaypaj lawraj ninawan ruphaykuchisqa. Chay llajtakunawan imachus kasqanqa wanananchejpaj k'amiy jina kashan, ama paykuna jina kayta munananchejpaj.

⁸ Ajinallataj yuyasqankupi musphaj runakunawan kanqa. Paykunaqa khuchiriyopi purispa, ukhunkuta ch'ichichanku, jinataj kamachejkunata qhesachanku, chantá janaj pachapi atiyniyojkunapajpis sajrata rimanku.

⁹ Chaywanpis arcángel Miguelqa Moisespa ayanrayku Kuraj Supaywan churanakushaspa, mana munarqachu Kuraj Supayta maldicispa juchachayta. Manachayqa pay kayllata nerqa: Tukuyta Kamachej Diosmin k'amisuchun, nispa.

¹⁰ Chay runakunatajrí mana yachasqanku imakunamanta thawtispa alqorakunku. Mana yuyayniyoj animalkuna jina, paykuna sonqonkoj nisqallanta ruwanku, ajinata ruwaspa purisqankuraykutaj juchachasqa kanankuta paykunallataj mask'akushanku.

¹¹ Ay mana cheqanta yachachejkunamanta imallachus kanqapis. Paykuna Cainpa ruwasqanta ruwaspa purinku. Jinallataj qolqerayku Balaam jina runata q'otiyanku, Chantá Coré jina Diospa contranpi oqharikullasqankupitaj chinkachisqa kanqanku.

¹² Jinallataj chay runakunaqa k'acha kawsakuy tantakusqaykichejta manakajpi rikhurichinku, imaraykuchus paykuna mana p'enqakuspa, qankunawan khuska mikhunku. Diospa iglesianta michinankutaqa, paykuna kikillanku michikunku. Paykunaqa wayraj apaykachasqan ch'aki phuyu jina kanku. Jinallataj iskay kuti wañusqa kanku, poqoy tiempopi mana poqoyniyoj sach'a jina, jinataj saphinmantapacha t'irasqa.

¹³ Jinallataj imaynatachus mama qochaj qhollchoqeyasqan phosoqota wijch'un, ajinallatataj paykunapis p'enqay millay ruwasqankuta sut'iman orqhonku. Jinallataj paykuna mana ñanniyoj purej ch'askakuna jina kanku. Chaywanpis paykunapaj wiñaypaj tuti laqhayay wakichisqa kashan.

¹⁴ Adanmantapacha qanchis kaj runa Enocqa chay jina runakunamanta kay jinata sut'incharqa: Tata Diosta waranqa waranqa angelninkunawan jamushajta rikorqani

¹⁵ tukuyta juzgananpaj. Payqa Diosman mana kutirikojkunata juchachanqa tukuy millay ruwasqankumanta, chantá Diosta turiyaspa mana allinta parlasqankumanta ima, nispa.

¹⁶ Jinallataj chay mana cheqanta yachachejkuna wasamanta rimakojkuna kanku, thutojkunataj. Paykuna sonqonkoj munasqanta ruwanallankupaj kawsanku, wapuykachaspataj may kasqankumanta parlanku. Chantá paykunallapaj imatapis tariyta munaspa, runata llosq'onku.

Diosmanta mana karunchakunapaj yuyaychaykuna

¹⁷ Qankunarí, munasqa wawqe panakuna, yuyarikuychej Tukuyta Kamachej Jesucristoj kuraj kachankuna imatachus nerqanku, chayta.

¹⁸ Paykuna ajinata nispa, yuyaychasorqachej: Qhepanejman tukuy imamanta alqochakojkuna rikhurimonqanku, chaykunataj sonqonkoj millay munasqanman jina purenqanku, nispa.

¹⁹ Paykuna qankunata phiñanachispa, t'aqanachisunkichej, imajtinchus juchallinaman aysaj sonqonkoj munasqanman jina purinku. Paykunapitaj Diospa Espíritun mana kanchu.

²⁰ Qankunarí munasqa wawqe panakuna, Diospi sinch'ita atinikuyniykichejpi wiñaychej. Dioswan parlarikuspaqa, Santo Espíritu imatachus yuyaychasonqachej, chayta parlaychej.

²¹ Chantá Diospa munakuyninpi kallaychejpuni, jinallataj Tukuyta Kamachej Jesucristo wiñay kawsayman pusanawanchej p'unchayta suyaychej, imaraykuchus pay may jinata khuyakuwasunchej.

²² Jinallataj qankuna iskayrayajkunamanta khuyarikuspa yanapaychej.

²³ Wakinkunatarí, qhespichiychej ninapi ruphaykunanmantapis orqhoshawajchej jinata. Wajkunamanta khuyakushaspapis, allinta qhawarikuychej, ama millay ch'ichi kajta ruwasqankuwan chimpachikunaykichejpaj.

Diosta jatunchaspa yupaychana

²⁴ Uj k'ata Dios yupaychasqa kachun. Paymin qankunata waqaychasunaykichejpaj atiyniyoj ajinamanta ama urmanaykichejpaj, chantá may jina kusiywan jatun kayninpa ñawpaqenpi mana k'aminata rikhurichisunaykichejpaj ima.

²⁵ Tukuyta Kamachej Jesucristonchejnejta uj k'ata Qhespichej Dios jatunchasqa kachun, yupaychasqataj. Chantá pay wiñay wiñaynintinpaj jatun atiyniywan tukuy imapi kamachichun. Ajina kachun.