San Juan 1 - DIOSPA QHELQACHISQAN DEUTEROCANONICAL

Diospa Simi Nisqan runaman tukun

¹ Qallariypeqa Simi Nisqa sutiyoj karqapuni. Chay Simi Nisqaqa Dioswan kasharqa, chay Simi Nisqataj Diospuni karqa.

² Paymin qallariypi Dioswan karqa.

³ Diostaj tukuy imata paynejta ruwarqa, ruwasqa kajmantataj mana paywanqa mana imapis ruwasqachu karqa.

⁴ Simi Nisqa sutiyojtaj tukuy ima ruwasqa kajman kawsayta qorqa, chay kawsaynintaj k'anchay jina runakunaman Diosmanta sut'ita rikuchin.

⁵ Chay k'anchaytaj laqhapi lliphipin, laqhataj k'anchayta mana jayk'ajpis wañuchiyta atenqachu.

⁶ Dios uj runata kachamorqa, sutintaj Juan karqa.

⁷ Payqa chay k'anchaymanta runakunaman willananpaj testigo jina jamorqa, paypa nisqannejta tukuy runakuna chay k'anchayta jap'ikunankupaj.

⁸ Mana Juanchu chay k'anchay karqa, manachayqa pay k'anchaymanta willanallanpaj kachamusqa karqa.

⁹ Cheqa k'anchayrí tukuy runaman k'anchananpaj kay pachaman jamusharqa.

¹⁰ Simi Nisqa sutiyojqa paypa ruwasqan kay pachaman jamorqa. Chaywanpis runakunaqa pay pichus kasqanta mana rejserqankuchu.

¹¹ Payqa llajta masinkunaman jamorqa, paykunatajrí payta qhesacharqanku.

¹² Aswanpis tukuy pikunachus paypi atinikuspa mana qhesacharqankuchu, chaykunaman pay atiyta qorqa Diospa wawankuna ruwasqa kanankupaj.

¹³ Paykunataj Diospa wawankuna kanku mana qharej yumasqanraykuchu, nitaj runa munasqanraykuchu, nillataj pi qharej munayninmantachu, manachayqa Dios munasqanrayku.

¹⁴ Chay Simi Nisqaqa runaman tukorqa, jinataj noqayku ukhupi tiyakorqa. Chantá noqayku jatun kayninpa lliphipiyninta rikorqayku, chaytaj Tata Diospa uj k'ata Churin jatun kayninpa lliphipiynin karqa. Paypitaj munakuywan, chantá cheqa kajwan ima may jinapuni karqa.

¹⁵ Paymanta jatunmanta parlaspa, Bautizaj Juan nerqa: Kaymá qhepayta chay jamojqa. Chaywanpis payqa noqamanta aswan kurajmin, imaraykuchus manaraj noqa kashajtiy, pay karqañapuni, nispa.

¹⁶ Simi Nisqa sutiyojpa may chhika k'acha kayninwan Diosqa kutin kutinta may jinata saminchawanchej.

¹⁷ Diosqa kamachisqankunata Moisesnejta qorqa. Chaywanpis Diospa mana tukukuyniyoj munakuyninta, cheqa kaynintawan Jesucristonejta qowanchej.

¹⁸ Mana pipis Diosta jayk'ajpis rikorqachu. Chaywanpis uj k'ata Churin, pichus Diosmin, pitajchus Tata Dioswan ujchasqa kawsan, paymin Tata Diosta rejsichiwanchej.

Bautizaj Juanqa Jesucristomanta willan

¹⁹ Chaypacha Jerusalenmanta judiokunaj kurajninkukuna kacharqanku sacerdotekunata, chantá levitakunata ima Juanta tapunankupaj: Pitaj qan kanki? nispa.

²⁰ Juantaj sut'ita willarqa: Mana noqachu Diospa kachamusqan Cristo kani, nispa.

²¹ Tapullarqankutaj: Chantá, pitaj kankiri? Eliaschu? nispa. Juantaj nerqa: Mana paychu kani, nispa. Jinapis sacerdotekuna, chantá levitakuna ima tapullarqankupuni: Pichus jamunan karqa, Diosmanta chay sut'inchajchu kanki? nispa. Juantaj kuticherqa: Manapuni, nispa.

²² Chantá nerqanku: Pipunitaj qan kankiri? Niwayku ari, pikunachus kachamuwarqayku, chaykunaman willanaykupaj. Qanmanta imá niwaykumantaj? nispa.

²³ Chantá Juanqa Diosmanta sut'inchaj Isaiaspa nisqanman jina kuticherqa: Noqaqa ch'innejpi qhaparej kani: Tukuyta Kamachej Dios jamunanpaj ñanta pichaychej, nispa.

²⁴ Chantá Juanwan parlanankupaj kachasqa karqanku, chay fariseokuna

²⁵ tapullarqankutaj: Sichus mana Cristochu kanki, nitaj Eliaschu, nillataj Diosmanta sut'inchajchu chayqa, imaraykutaj runakunata bautizankiri? nispa.

²⁶ Jinapi Juan kuticherqa: Noqa runata yakuwan bautizani. Chaywanpis qankuna ukhupi uj runa tiyan, qankunataj mana payta rejsinkichejchu.

²⁷ Paymin qhepayta jamushan. Noqarí mana paypa wata runan kanaypaj jinallapischu kani, nispa.

²⁸ Chayqa Jordán mayu chimpapi, Betaniapi karqa, maypichus Juan runakunata bautizasharqa, chaypi.

Jesusqa Diospa churasqan Cordero

²⁹ Q'ayantin, Bautizaj Juan Jesusta payman jamushajta rikuspa, nerqa: Kaymá Diospa Corderonqa, pichus runakunaj juchankuta pampachaj.

³⁰ Paymanta noqa nerqani: Payqa noqamanta aswan kurajmin, imaraykuchus manaraj noqa kashajtiy, pay karqañapuni, nispa.

³¹ Noqataj mana yacharqanichu pipunichus kasqanta. Chaywanpis israelitakunata yakuwan bautizasharqani payta rejsinankupaj, nispa.

³² Juan willallarqataj: Santo Espirituta urpita jina janaj pachamanta urayk'amojta rikorqani, chaytaj Jesusman tiyaykorqa.

³³ Noqa manaraj payta rejsishajtiy, pichus yakuwan bautizajta kachamuwaj niwarqa: Pimanchus Santo Espíritu urayk'amuspa tiyaykojta rikunki, chaymá Santo Espirituwan runakunata bautizanqa, nispa.

³⁴ Noqataj ajina kasqanta rikorqani, sut'inchanitaj Jesusqa Diospa Churin kasqanta, nispa.

Jesuspa ñawpaj kaj yachachisqankuna

³⁵ Q'ayantenqa Bautizaj Juan iskay yachachisqankunawan chayllapitaj kasharqa.

³⁶ Juantaj chaynejpi Jesusta purishajta rikuspa, nerqa: Rikuychej, Diospa Corderon kaypi kashan, nispa.

³⁷ Chay iskay yachachisqankunataj Juanpa nisqanta uyarispa, Jesuspa qhepanta rerqanku.

³⁸ Jesustaj qhepanta jamushasqankuta rikuspa, paykunata taporqa: Imatataj mask'ashankichejri? nispa. Paykunataj kuticherqanku: Yachachej, pejpa wasinpitaj tiyakushankiri? nispa.

³⁹ Chantá Jesús kuticherqa: Jaku rikumunkichej, nispa. Chantá Juanpa yachachisqankuna rispa, maypichus Jesús tiyakushasqanta rikorqanku. Chaypacha yunta phaskaray jinaña kasqanrayku, paykuna Jesuswan parlarikuspa qhepakorqanku.

⁴⁰ Pikunachus Juanpa nisqanta uyarispa Jesuswan risqanku, chaykunamanta ujnin Simón Pedroj wawqen Andrés karqa.

⁴¹ Paytaj ñawpajta wawqen Simonta mask'arqa. Tarispataj, nerqa: Mesiasta tariyku, nispa. Hebreo rimaypi Mesías ninku, griego rimaypitaj Cristo.

⁴² Chaymantá Andresqa Simonta Jesusman pusamorqa. Jesusrí payta allinta qhawarispa, nerqa: Qanqa Jonaspa churin Simón kanki. Kunanmantarí sutiykeqa Cefas kanqa, nispa. Arameo rimaypi Cefas ninku, griego rimaypitaj Pedro.

Jesusqa Felipeta, Natanaeltawan ima wajyan

⁴³ Q'ayantenqa Jesús Galileaman rishaspa, Felipeta tarerqa, nerqataj: Jaku, noqawan rina, nispa.

⁴⁴ Felipeqa Betsaida llajtamanta karqa. Andreswan, Pedrowanpis chayllamantataj karqanku.

⁴⁵ Chantá Felipe Natanaeltañataj mask'aj rerqa, tarispataj, nerqa: Nazaret llajtamanta Joséj churin Jesusta tariyku, pimantachus Moisés kamachisqa qhelqapi nerqa, chayta. Diosmanta sut'inchajkunapis paymanta parlallarqankutaj, nispa.

⁴⁶ Natanaeltajrí kuticherqa: Nazaret llajtamanta allin runa rikhurimunmanchuri? nispa. Felipetaj nerqa: Jamuy ari, chantá qan kikiyki rikunki, nispa.

⁴⁷ Chantá Jesús Natanaelta payman qayllaykushajta rikuspa, nerqa: Kay runaqa israelitapuni, imaraykuchus payqa mana pitapis q'otiyanchu, nispa.

⁴⁸ Natanaeltajrí taporqa: Maypitaj noqata rejsiwarqankiri? nispa. Jesustaj kuticherqa: Manaraj Felipe wajyashasojtin, noqa rikorqayki higo sach'a urapi kashajtillaykiraj, nispa.

⁴⁹ Chaymanta Natanael, nerqa: Yachachej, qanqa Diospa Churin kanki, Israelpa Kuraj Kamachejnintaj, nispa.

⁵⁰ Jesustajrí kutichispa, nerqa: Higo sach'a urapi kashajtiyki rikorqayki, nispa nisusqayraykuchu noqapi atinikushanki? Chaymantapis aswan t'ukuna ruwaykunataraj rikunki, nispa.

⁵¹ Jesús nillarqataj: Kayta sut'ita niykichej: Kunanmanta ñawpajmanqa qankuna janaj pachata kicharisqata rikunkichej, Diospa angelninkunatataj Runaj Churinman urayk'amushajta, wicharishajtataj, nispa.