Nugana 27 - Buki Tabu Lowaenei 1919

‘UPWA 27.

¹ Ta gete ‘i apwesa, ni‘atu Isaako ‘i e tai sinabwa, ta matana ‘i umauma, ta ‘enega nigea ‘i da ‘ita kapekapeana, ga natuna tomatua Esau ‘i bwauiena, ta ‘ena ‘i ona, Natugu: ta ‘i ona ‘enaia, ‘Abo‘agu.

² Ta ‘i gwae, Gete ‘enega u ‘ita, ‘abo‘agu ia e tai sinabwa, ‘igu mwawasa ‘ana ‘asiata nigea ia mwaratoni.

³ Gete ‘enega ia sideio, ‘imu ‘ebeunuunu, ‘imu gita ta ‘imu tupu, ‘u da ‘ewa, ta mitawaia ‘u da tauia, ta ‘agu esio ‘u da ‘ewa;

⁴ ta masura maina bobo‘ana ‘eguia ‘u da bubuna, nadigega nuagu i ‘ewena, ta ‘eguia ‘u da me‘ena, be ia da ‘e‘ai; be ‘enega iaruiaruagu ‘i da onaobobomeio nugana ga muriega ia da mwawasa.

⁵ Ta ‘ena Isaako ‘i onaona natuna Esau ‘enaia Rebeka ‘i nonona. Ta Esau ‘i tauia mitawaia sabi ‘ai iobai esio manuna, be ‘i da me‘ena.

⁶ Ta Rebeka natuna Iakobo ‘ena ‘i ona, ‘i gwae, U ‘ita, tamaio ia nonona tasio Esau ‘ena ‘i ona, ‘i gwae,

⁷ Esio ‘eguia ‘u da me‘ei ta masura maina bobo‘ana ‘eguia ‘u da bubuna, be ‘enega ia da ‘ai, ta Ieoba matanaia ia da onaobobomeio ‘igu mwawasa nuganinaia.

⁸ ‘Enega gete tuga, natugu, ‘enagu ‘u da nono na‘ieana iage ia eonaio.

⁹ Gete tuga iau ‘ena ‘u da tauia, ta gote ‘enega gota menonoiadi ‘e rua bobo‘adi ‘eguia ‘u da ‘ewedima; ta tamaio manuna masura maina bobo‘ana ‘ediega ia da bubuna, nadigega nuana i ‘ewena:

¹⁰ ta tamaio ‘ena ‘u da me‘ena, be ‘enega ‘i da ‘e‘ai, be ‘enega ‘ina mwawasa nuganinaia ‘i da onaobobomeio.

¹¹ Ta Iakobo sinana Rebeka ‘ena ‘i ona, U ‘ita, Tasigu Esau tai bwarana maunuununa, ta ‘abo‘agu bwaragu ‘i nonokwaikwaina.

¹² ‘Abona nai tamagu ‘i da gitoogu, ta ‘abo‘agu ‘atua to kabo ‘enaia; ta ‘eguia elia ia da me‘ena, ta nigea onaoboboma.

¹³ Ta sinana ‘ena ‘i ona, ‘Amu elia ‘eguia ‘i da mai, natugu: ‘enagu ‘u da ematamatana tuga, ta ‘u da tauia be ‘eguia ‘u da ‘ewedima.

¹⁴ Ta ‘i tauia, ta i ‘ewedi, ta sinana ‘ena ‘i me‘edi: ta sinana masura maina bobo‘ana ‘i bubuna, nadigega tamana nuana i ‘ewena.

¹⁵ Ta Rebeka natuna me sinabwana Esau ‘ana ‘oama bobo‘adi i ‘ewedi, taudi ma‘ieana anuaia si miamiana, ta natuna me goamana Iakobo ‘ediega i ‘otena:

¹⁶ ta gota menonoiadi bwaradi nimanaia, ta ‘otona nonokwaikwaina ‘enaia, ‘i sa‘udi:

¹⁷ ta masura maina bobo‘ana ta palaua, taudi ‘i bubuna, natuna Iakobo nimanaia i ‘ebwaena.

¹⁸ Ta tamana ‘ena ‘i mai, ta ‘i ona, Tamagu: ta ‘i gwae, ‘Abo‘agu; iaita ‘oio, natugu?

¹⁹ Ta Iakobo tamana ‘ena ‘i ona; ‘Abo‘agu Esau ‘imu tomatua; ni‘atu ia guinua nadigega ‘u eonegu: ia sideio, ‘u da tooro, ‘u da miatoa be ‘igu esio ‘u da ‘ani, be ‘enega iaruiaruaio ‘i da onaobobomegu.

²⁰ Ta Isaako natuna ‘ena ‘i ona. Natugu, mwa‘adega ‘u loba maninina nadigega? Ta ‘i ona, Ieoba ‘imu Eaubada ‘i leme‘ai‘iligu.

²¹ Ta Isaako Iakobo ‘ena ‘i ona, Ia sideio, ‘U da mai serabeguia, be ia da gitooio, natugu, nai ‘oio natu‘ai‘ailigu Esau nai nigea.

²² Ta Iakobo tamana Isaako ‘ena ‘i doro serabenaia; ta ‘i gitoona, ta ‘i ona, ‘Enana Iakobo ‘enana, ta nimana Esau nimana.

²³ Ta nigea ‘i mwaratonina, nimana maunuununa ta ‘enega, na‘ieana tasina Esau nimana: ta ‘enega ‘i onaobobomena.

²⁴ Ta ‘i ona, ‘Oio natu‘ai‘ailigu Esau? Ta ‘i ona, ‘Abo‘agu tauna.

²⁵ Ta ‘i ona, Serabeguia ‘u da me‘ena, ta natugu ‘ina esio ‘enega ia da ‘e‘ai, be ‘enega iaruiaruagu ‘i da onaobobomeio. Ta ‘i me‘ena serabenaia ta i ‘e‘ai: ta oine ‘i me‘ena ta ‘i numa.

²⁶ Ta tamana Isaako ‘ena ‘i ona, Gete ‘enega ‘u da mai serabeguia, ta ‘u da ‘awamuigu, natugu.

²⁷ Ta ‘i mai serabenaia, ta i ‘awamuina: ta ‘ana ‘oama maina ‘i muina, ta ‘i onaobobomena, ta ‘i ona, Wa ‘ita, natugu maina ‘Atua mitawa Ieoba ‘i onaobobomena maina:

²⁸ Ta garewa ‘ina gagunega Eaubada ‘i da ‘ebwaemu, Ta bare‘u ‘ana iapega, Ta witi ta oine iauna:

²⁹ Tomota emuia si da guinua, Ta ‘asa ‘emuia si da bwagobwago: Tasimuao ‘edia ‘u da e ‘inapwana, Ta sinaio natunao me‘olotodi ‘emuia si da bwagobwago: Iauiauna ‘i eliemu si da eliena, Ta iauiauna ‘i onaobobomeio si da onaobobomena.

³⁰ Ta gete ‘i apwesa, ni‘atu Isaako Iakobo ‘i onaoboboma saronina, ta Iakobo tamana Isaako matanega ‘i apweapwesa, ga tasina Esau ‘ina ulatupuiega ‘i ruguma.

³¹ Ta tauna wate masura maina bobo‘ana ‘i bubuna, ta tamana ‘ena ‘i me‘ena; ta ‘i ona tamana ‘ena, Tamagu ‘i da tooro, ta natuna, ‘ina esio ‘enega ‘i da ‘e‘ai, be ‘enega iaruiaruaio ‘i da onaobobomegu.

³² Ta tamana Isaako ‘i ona ‘enaia, Iaita ‘oio? Ta ‘i ona, Abo‘agu natuio me‘olotona, ‘imu tomatua, Esau.

³³ Ta Isaako ‘i dededera sinabwana, ta ‘i gwae, Ga iaita tauna esio ni‘atu i ‘ewa, ta ‘eguia ‘i me‘ena, ta iauna ‘enega ia ‘e‘a nugana ta muriega ‘u mai, ta ni‘atu ia onaobobomena? tamo, ta onaoboboma ‘i da loba.

³⁴ Ni‘atu Esau tamana ‘ina ona ‘i nonodi, ga dedoi to sinabwa sana ta darerena ‘enega ‘i dedoi, ta tamana ‘ena ‘i ona, Tamagu ie, ‘u da onaobobomegu, ‘abo‘agu wate.

³⁵ Ta ‘i ona, Tasio kaboega ‘i mai, ta ‘amu onaoboboma ni‘atu i ‘ewena.

³⁶ Ta ‘i ona, nigea nai ‘ana esana ‘ai‘aila Iakobo? tuta ‘e rua getedi i kaboegu: ‘igu tomatua i ‘ewena; ta, wa ‘ita, gete ‘enega ‘agu onaoboboma ni‘atu i ‘ewena. Ta ‘i gwae, Nigea nai ‘e bweu onaoboboma ‘u egagare manugu?

³⁷ Ta Isaako ‘i onalimana ta Esau ‘ena ‘i ona, U ‘ita, ni‘atu ia bubuna be ‘i da e ‘imu ‘inapwana, ta tasinao iauiaudi ia ‘ebwaea‘edi ‘ena toguinuao manuna; ta witi ta oine ‘ediega ia lemena: ga to‘ase ia da guinua manuio, natugu?

³⁸ Ta Esau tamana ena ‘i ona, Onaoboboma ‘e bweuna tuga ‘emuia, tamagu? Tamagu ie, ‘u da onaobobomegu, ‘Abo‘agu wate. Ta Esau ‘i bwau, ta ‘i dedoi.

³⁹ Ta tamana Isaako ‘i onalimana ta ‘ena ‘i gwae, U ‘ita, bare‘u ‘ina iapa ‘enega ‘imu anua ‘i da miami, Ta garewa etanega ‘ina gaguna ‘enega;

⁴⁰ Ta ‘imu sisi‐saiega iawasio ‘i da bobo‘ana, ta tasio ‘ena ‘u da guinua; Ta gete ‘i da apwesa ‘ena ‘u da ‘upwa iaulei, Ga ‘ina ‘ebe‘a‘ara ‘u da ‘ewaiaulei ‘otomuiega.

⁴¹ Ta Esau nuana ‘i to‘umalina Iakobo ‘enaia onaoboboma ‘enega tamana ‘i onaonaobobomena manuna: ta Esau ‘atenega ‘i ona, ‘Asiata ‘ewabamu tamagu manuna ‘i abe; ga tasigu Iakobo ia da loemwawasina.

⁴² Ta natuna me sinabwana Esau ‘ina ona Rebeka ‘ena si simanena; ta i ‘etune ta natuna me goamana Iakobo ‘i bwauiena, ta ‘ena ‘i ona, U ‘ita, tasio Esau, manuio, ‘atena ‘i giepa‘arina, ‘aene ‘i da loemwawasio.

⁴³ ‘Enega gete tuga, natugu, ‘enagu ‘ena ‘u da ematamatana; ta ‘u da tooro, nuugu Labana ‘ena ‘u da dena Arana ‘enaia;

⁴⁴ ta asiata ‘aina ‘ena ‘u da miami, ga tasio ‘ina egamwagamwagu ‘i da ‘ilawa bemi;

⁴⁵ Ga tasio ‘ina gamwasoara ‘emuiega i ‘ilawa, ta iage ‘ena ‘u guinuena ‘i da nuapupure: ga ia da ‘etune, ta gote ‘enega ia da ‘au‘ewemumo: to‘ase manuna ‘asiata ‘e bweunega ia da loseemi ruarua?

⁴⁶ Ta Rebeka ‘i ona Isaako ‘enaia, ‘Abo‘agu Eta natunao me wainedi manudi ia lo‘ame‘ame: ‘abo Iakobo Eta natunao ‘ediega mwanena i ‘ewena, getedi nadigega, ‘asa natunao me wainedi ‘ediega, iawasigu to‘ase ‘ana bobo‘ana ‘eguia?