Isaia 9 - Buki Tabu Lowaenei 1919

‘UPWA 9.

¹ Ta tauna lowa elo‘uia ‘ena ‘i miami nigea ‘e bweu guguioi ‘i da miami ‘enaia. Tuta nuganega ‘asa Sebulona ‘asa Napatali ‘adi ‘ebesinara ‘i sa‘u, ta tuta bogamo ‘ana esaesa ‘i sa‘una, ora ‘ana ‘edega, Ioridana mariesenaia, ‘ebeloinao ‘idi Galili.

² Tomota guguioi ‘ena si lopilidadana ni‘atu ma‘edana sinabwana si ‘itena: taudi mwawasa ‘ana iauiaukwa ‘ina ‘asa ‘ena si miami, ma‘edana ‘edia ‘i sae.

³ ‘Asa ni‘atu ‘u gieiau, ‘idi guausoara ni‘atu ‘u giesinabwena: si eguausoara matamuia na‘ieana guausoara sesoi ‘ena, na‘ieana tai si eguausoara ‘ena gwegwe ‘oae‘oaena si ‘eguiai.

⁴ ‘Ana ‘a‘ara ‘ana ‘ebe‘a‘ara, ta ‘arana ‘ina guna, ‘ana to didiga ‘ina keweliwelili, ni‘atu ‘u lasedi ta ‘enega na‘ieana Midiana ‘ana asiata.

⁵ Tai ma‘ina ‘ebelosaia egogona toila ‘ena ‘ina ‘ebelosaia iauiauna, ta ‘oama si pwasa rarega, si da miami ‘arata manuna ta ‘enega, awe sabelulu ‘ana kaiwe manuna.

⁶ Goama ‘i tubua ‘edaia ta ‘enega, natuda me‘olotona si ‘ebwaeda ta ‘enega; ta loina ‘i da miami ‘a‘aranaia: ta ‘ana esana si da eesena ‘Ebenuaowana, To E‘ita, Eaubada Waiwai, Tuta ‘ataia Tamana, Guguia ‘ana ‘Inapwana.

⁷ ‘Ina Loina ‘ana sinabwa ta guguia ‘ana sinabwa nigea ‘e bweu ‘ana ‘ebelosaroni, Dabida ‘ina ebemi‐esaesa ‘enaia, ta ‘ina ‘ebeloina ‘enaia, sabi giepa‘arina, ta sabi giiaina etaraiega ta bubuna paruparuiega gete ‘enega ga tuta ‘ataiamo. Bodao ‘idi Ieoba ‘ina waiwai iage gete ‘i da guinuena.

⁸ ‘Inapwana ona ‘i etunena Iakobo ‘ena, ta Iseraela ‘ena ‘i toa.

⁹ Ta tomota iauiaudi si da mwaratoni, tuga Eparaima ta to mia Samaria, taudi gagasega ta ‘atepatuiega si gwae,

¹⁰ Gurewa‐gabugabuna ni‘atu si be‘u, ta ‘a da ‘abi gurewa si taretarena ‘enega: sukomore ni‘atu si ‘upwedi, ta ‘a da gibunidi maruanao ‘edia.

¹¹ Ta ‘enega Ieoba Resina ‘ana tarauwarao ‘i da sa‘u tu‘e matanaia, ta ‘ana tarauwarao ‘i da giniuiedi;

¹² Me Siria nuganaia, ta me Pilisitia murinaia; ta Iseraela si da ‘enina ‘awa ‘eebarinega. Ga iage maibo‘ana gete ‘i apwesa ta ‘ina gamwasoara nigea i ‘ilawa, ta nimana ‘i iasitoto ‘ataena.

¹³ Ta tomota nigea si sana‘ila tauna ‘i unuunudi ‘edia, nai bodao ‘idi Ieoba si ‘ebesa.

¹⁴ Ta ‘enega Ieoba deba ta iuiu, magimagi narina ta sita, ‘i da ‘upwedi Iseraela ‘enega asiata ‘e bweunega.

¹⁵ Gimi taina ma‘ana ‘amaiaba, tauna deba; ta paropita tauna ona kabokaboiao ‘i e‘ita, tauna iuiu.

¹⁶ Taudi tomota gete ‘idi tonuganao si gieloegesiedi; ta taudi nuganuganidi si saoora.

¹⁷ Ta ‘enega ‘Inapwana gea‘abo ‘i da guausoara ‘idi tubuau manudi, nai ‘i da ‘atenua‘ole‘ole ‘idi pesiedao ta ‘idi kwaburao ‘edia; iauiaudi ‘e bweuna ‘e bweuna ‘i ona besobeso ta ‘i to‘umali ‘ina to‐guinua, ta ‘awa iauiauna si ona euwauwa. Ga iage maibo‘ana gete ‘i apwesa ta ‘ina gamwasoara nigea i ‘ilawa, ta nimana ‘i iasitoto ‘ataena.

¹⁸ Bubuna to‘umalina i ‘ara‘arata awe sabelulu na‘ieana ta ‘enega; kaiwe taritaridi ta kwakwakwara i ‘arasidi: tamo, mitawa o‘enina badodi ‘edia i ‘ara‘arata, ta si tu‘e ‘asu ‘ina poana badodi ‘edia.

¹⁹ Bodao ‘idi Ieoba ‘ina gamwasoarega ‘asa ni‘atu i ‘arasi: tomota wate awe na‘ieana; nigea ‘e bweu tai tasina ‘i lobobo‘anena.

²⁰ Ta ‘e bweu ‘atainega ‘i da ‘oae, ta ‘i da botana; ta gegeuminaia ‘i da ‘e‘ai, ta gea‘abo gamwadi ‘i da pawa: taudi tai ‘e bweuna ‘e bweuna tauna nimana esiona ‘i da ‘e‘ani:

²¹ Manase, Eparaima; ta Eparaima, Manase: ta siterua ruarua Iuda si da guitoasena. Ga iage maibo‘ana gete ‘i da apwesa ta ‘ina gamwasoara nigea i ‘ilawa, ta nimana ‘i iasitoto ‘ataena.