Isaia 2 - Buki Tabu Lowaenei 1919

‘UPWA 2.

¹ Ona nina Isaia Amosa natuna i ‘itena Iuda ta Ierusalema manudi.

² Ta asiata muriega gete ‘i da apwesa, ‘aene Ieoba ‘ina anua ‘ana ‘oea ‘i da mia pa‘ara ‘oea debadia, ta ‘i da mia tu‘e ‘oea ‘etanidia; ta ‘ebeloina iauiaudi si da daudau ‘enaia.

³ Ta tomota iauiauna si da tauia ta si da ona, Wa da mai, be ta da tu‘e Ieoba ‘ina ‘oea ‘enaia, Iakobo ‘ina Eaubada ‘ina anua ‘enaia; ta ‘ina ‘edao manudi ‘i da e‘iteda, be ta da tautauia ‘ina ‘edao ‘edia: Sionega loina ‘i da apwesawa ta ‘enega, ta Ieoba ‘ina ona Ierusalemega.

⁴ Ta ‘i da etara ‘ebeloinao gamwagamwanidia, ta tomota iauiauna ‘i da ba‘edi: ta ‘idi sisi‐saiao si da ‘elotutudi be si da e‘ebegesoalisilisi matana, ta ‘idi gita be si e‘ebe‘upwawiti: ‘asa gea‘abo sisi‐saia ‘i da gilagasi ‘asa ‘enaia, ta gea‘abo wate losaia si da panapana‘ite.

⁵ Iakobo ‘ina susu ie, wa da mai, be ta tautauia Ieoba ‘ina ma‘edana ‘enaia.

⁶ ‘Imu tomota Iakobo ‘ina susu ni‘atu ‘u e‘idi‘idiedi ta ‘enega, si maa bubuna bomatuiega ‘ediega ta ‘enega, ta si ‘e to‐barau me Pilisitia ‘atua, ta si enima‘abi to‘u‘umara natudiao ma‘edi.

⁷ ‘Idi ‘asa wate ‘i maa sileba ta gola ‘ediega, ta ‘idi oesi nigea ‘adi ‘ebelosaroni; ‘idi ‘asa wate ‘i maa ose ‘ediega, ta ‘idi wagalisilisiao nigea ‘adi ‘ebelosaroni.

⁸ ‘Idi ‘asa wate ‘i maa tokwarui ‘ediega; nimadi taudi ‘idi ‘ebeguinua ‘ena si bwagobwago, tauna iage nina nimamatagigidi taudi si bubuna.

⁹ Ta gomabeso i ‘opu‘opu, ta tai sinabwana ‘i mia mwa‘uta; ta ‘enega gea‘abo ‘idi bubuna to‘umalina ‘i da kweu.

¹⁰ Gurewa ‘ena ‘u da rugu, ta kau ‘ena ‘u da ‘akwaiemu, Ieoba ‘ina didigega, ta ‘ina sinabwa ‘ana esaesa ‘enega.

¹¹ Ta tai ‘ana ‘itatu‘eiao si da mia mwa‘uta, ta tai ‘idi gagasa ‘i da mia ‘opu‘opu, ta Ieoba tebweuna ‘i da miatu‘e asiata gote ‘enega.

¹² Ieoba ma‘ina bodao ‘ana asiata ‘i da apwesa ta ‘enega iauiaudi si gagasa ta si gigino ‘edia, ta iage maibo‘ana ‘i miatu‘e ‘enaia: ta ‘i da mia mwa‘uta:

¹³ Ta Lebanona ‘ina maruana iauiaudi ‘edia, taudi si kesora ta si miatu‘e, ta Basana ‘ina keigwana iauiaudi ‘edia;

¹⁴ Ta ‘oea kesora iauiauna ‘edia, ta ‘oea iauiaudi si miatu‘e ‘edia;

¹⁵ Ta anua ‘ebe‘ita‘i‘isi ‘etosora iauna ‘enaia, ta ‘ari gurewa iauna ‘enaia;

¹⁶ Ta waga Tasisa iauiauna ‘edia, ta eiara iauiauna ‘adi ‘ita bobo‘ana ‘edia.

¹⁷ Ta tai ‘ina miatu‘e ‘i da mia‘opu‘opu, ta tai ‘idi gagasa ‘i da miamwa‘uta: ta Ieoba tebweuna ‘i da miatu‘e asiata gote ‘enega.

¹⁸ Ta tokwaruiao si da sawara ‘ai‘aila.

¹⁹ Ta tai gurewa gaulidi ‘edia si da rugu, ta bwa‘a gaulina ‘edia, Ieoba ‘ana didiga matanega, ta ‘ina lo‘etana ‘ina esaesa ‘enega, tuta ‘enega ‘i tooro be bare‘u ‘i gieniu sinabwana.

²⁰ Asiata gote ‘enega ‘ina tokwarui sileba ta ‘ina tokwarui gola, taudi si mwerurua be ‘edia ‘i da bwagobwago, ‘i da ‘ula iauledi kokolaka be meiaweda ‘edia;

²¹ Sabi tauia gurewa gaulidi ‘edia, ta gurewa dakadakadi sa‘aridi ‘edia, Ieoba didigana matanega, ta ‘ina lo‘etana ‘ina esaesa ‘enega, ‘ena ‘i tooro be bare‘u i gieniuie sinabwana.

²² Tai ‘enega wa da sa‘u, tauna iawasina ubusugaugaulina ‘edia: mane ‘enega ta nuena ta ‘enega?