Isaia 1 - Buki Tabu Lowaenei 1919

‘UPWA 1.

¹ Isaia Amosa natuna ‘ina madawara, tauna i ‘itena Iuda ta Ierusalema manudi, Osia be, Iotama be, Aasa be, Esekia be, Iuda ‘ana kiniao, ‘idi tutao ‘ediega.

² Garewa ie, ‘u da nono, ta ‘u da enonotenasi, bare‘u ie, Ieoba ni‘atu ‘i ona ta ‘enega: gogama ia e‘enidi ta ia amwamwedi, ta si loguitoasa ‘eguia.

³ Bulomakau ‘ana toosi ‘i mwaramwaratoni, ta ase ‘ina ‘inapwana ‘ina iobai ‘adi ‘ebe‘e‘ai: ta Iseraela nigea si mwaramwaratoni, ‘igu tomota nigea si nuanua.

⁴ Ie ‘asa ma‘imi to‘umalina, tomota ‘imi ‘a‘ara bubuna bokobokona, to‐guinua to‘umalina tubudi, gogama to bubu geiogeioi: ni‘atu Ieoba si e‘idi‘idiena, Iseraela ‘ina Tabu Tebweuna ni‘atu si sinarina, si mia dumaduma ta si ‘ilawa.

⁵ To‘ase manuna wa esilae ‘ataia, ga wa loguitoasa wawasae? deba maibo‘ana ‘i le‘oasa, ta ‘ate maibo‘ana ‘i mwawamwawasa.

⁶ ‘Aeiapeiapega ga deba ‘enaia nigea ‘e bweu bobo‘ana ‘enaia; ta ‘abiamaiao, ‘au‘eumula be, bonu be: nigea si bodebodedi nai si paimidi, nai si ‘e‘enuadi bunamega.

⁷ ‘Imi esena ‘i waborebore; ‘imi ‘asa si e‘arasi aweiega; ‘imi bwa‘a, to‘u‘umara si ‘enina matamia, ta ‘i waborebore, ‘atua to‘u‘umara si ‘ulamwa‘utena.

⁸ Ta Siona natuna me wainena si pilisinena ‘atua ioeioe baguraoine ‘enaia, ‘atua miakabo ‘ana anua bagura‐pai ‘enaia, ‘atua ‘asa si sakowasiena.

⁹ ‘Abo bodao ‘idi Ieoba nigea ‘i gisine ‘edaia tupwana gidarasedaina, ‘abo ta da ‘e Sodoma, ‘abo ta da ‘e Gomora.

¹⁰ ‘Omi Sodoma ‘ina to‐loinao, Ieoba ‘ina ona wa da nono; ‘omi Gomora ‘ina tomota, ‘ida Eaubada ‘ina e‘ita ‘ena wa da enonotenasi.

¹¹ ‘Imi tariao ‘adi iau to‘ase ‘ana bobo‘ana ‘eguia? Ieoba ‘i gwae: ‘Abo‘agu gamwagu ‘i pawa sipi me‘olotodi ‘ebwaea‐daita gabugabudi manudi, ta iobai e‘enidi iapadi manuna; ta bulomakau nai lamiao, nai gota‐me‘olotodi raradi nigea manudi ia guausoara.

¹² ‘Ena wa mai sabi ‘apwesama mataguia, iaita nimamiega gete ‘i eonena, be ‘igu ‘atamanaia wa ‘abutubutu?

¹³ Gea‘abo wate ‘ebwaeadaita besobeso wa me‘eme‘ena; mu‘ana ‘i gadilulu ‘eguia; nawarae auauna, deriegogona ‘adi bwau, — bubuna bokobokona deriegogona mwaumwau ma‘ieana nigea kapekapeana ia ‘ewa iaulena.

¹⁴ ‘Imi nawarae auaudi ta ‘imi sagari a‘aseiadi iaruiaruagu ‘i guitoasedi: si mwaumwau ‘eguia; ‘a‘aranidi manuna ia lo‘ame‘ame.

¹⁵ Ta ‘ena nimami wa gilagata, matagu ia da e‘etokwaiedi ‘emiega: tamo, ‘ena wa sidasida iauna, gea‘abo ia da nono: nimami si maa rarega.

¹⁶ Wa da lo‘utumi, wa da gie‘esasemi; ‘imi guinuao ‘idi to‘umalina wa da ‘ewaiaulei matagu ‘ediega; guinua iage to‘umalina wa da sa‘u:

¹⁷ Guinua bobo‘ana wa da pana‘itena; loina wa da ‘ebesa, to mia mwa‘uta wa da lemedi, pesiedao ‘adi etara wa da gieparuparu, kwabura wa da ona lemena.

¹⁸ Gete ‘enega wa da mai, be ta da eonaona, Ieoba ‘i gwae; ‘abo imi bubuna to‘umalidiao si bweabweara ‘atua, si da wakewakeke sinou ‘atua; ‘abo si bweabweara rara ‘atua, si da wula ‘atua.

¹⁹ ‘Abo wa nuabobo‘ana ta ematamatana, ‘asa ‘ina bobo‘ana ‘enega wa da ‘e‘ai:

²⁰ Ta ‘abo wa guitoasa ta wa nuapa‘ara, wa da lo‘egumwara sisisaiega; Ieoba ‘awana ni‘atu i ‘inana ta ‘enega.

²¹ ‘Asa bubuna ‘ai‘aila ni‘atu ‘i esogara! Tauna lowa loinega ‘i maa! bubuna paruparu ‘ena ‘i miami, ta gete to‐loemwawasaiao.

²² ‘Imu sileba ni‘atu ‘i ekainumu besobeso, ‘imu oine maboasina.

²³ ‘Imu ‘inapwanao si nuapa‘ara, ta to‐anawarao gosediao; iauiauna ‘ebwaeadaitao nuanuadi, ta e‘isao si muria; pesiedao nigea ‘adi etara si gieparuparu, wate kwabura ‘ina iage nigea ‘edia ‘i mai.

²⁴ Ta ‘enega ‘Inapwana ‘i gwae, bodao ‘idi Ieoba, Iseraela ‘ina Toewaiwai, ‘Abo‘agu to loguitoasao ia da ‘ewa‐iauledi, ta ia da e‘isegu ‘agu tarauwarao manudi:

²⁵ Ta nimagu ia da gibunina ‘emuia, ta ‘imu kainumu besobeso ia da ‘utuiaule‘ai‘aile, ta ‘imu tini iauiauna ia da ‘ewaiaulei:

²⁶ Ta ‘imu to loinao ia da sa‘u limedi ‘atua tuta ‘e bweunega, ta ‘imu to‐onaonaiao ‘atua nuganaia: muriega si da eesemu, Bubuna paruparu ‘ina ‘asa, ‘asa bubuna ‘ai‘aila.

²⁷ Siona si da e‘isa limena etaraiega, ta ‘ina to‐nuaebuniao bubuna paruparuiega.

²⁸ Ta to‐li‘oa‐loinao ta to‐to‘umalidi ‘adi weara ‘i da erererea, ta taudi Ieoba si e‘idi‘idiena ‘i da‘arata ‘e gumwaridi.

²⁹ Keigwanaiao taudi nuanuami manudi si da omaiamaia ta ‘enega, ta bagura wa ‘esinuedi manudi nuami ‘i da soa.

³⁰ ‘Omi wa da nadigega keigwana tauna iawana ‘i medarina, ta na‘ieana bagura nigea boasi namo.

³¹ Ta to ewaiwai ‘i da nadigega imo, ta ina guinua nadigega kaiwe ‘ara‘arata matana; ta si da ‘arata ruarua, ta nigea ‘e bweu ‘i da giekweudi.