Iona 1 - Buki Tabu Lowaenei 1919

‘UPWA 1.

¹ Ta Ieoba ‘ina ona ‘i mai Iona Amitai natuna ‘enaia, ‘i gwae,

² ‘U da tooro, ta Ninebe ‘ena ‘u da tauia, ‘asa sinabwana gote, ta ‘u da bwau ‘enaia: ‘idi to‘umalina ‘i tu‘ema mataguia, ta ‘enega

³ Ta Iona ‘i tooro sabi dena Tasisa ‘enaia Ieoba matanega; ta Iopa ‘ena ‘i mwa‘uta, ta waga ‘e bweuna ‘i lobena Tasisa ‘ena ‘i tautauia: ga ‘ina geru ‘i e‘isena, ta ‘ena ‘i geru, sabi tauia ma‘edi Tasisa ‘ena Ieoba matanega.

⁴ Ta Ieoba iagila sinabwana i ‘ulena oraia, ta wedilia waiwai oraia ‘i towatowa, ta ‘enega waga ‘i abe ‘i weari.

⁵ Ga to gerugeru si matauta, ta ‘e bweuna ‘e bweuna ‘i bwau ‘ina eaubada ‘enaia; ta waga ‘ana eusana si ‘e‘ulamwa‘ute oraia, be ‘enega si da giekapekapeanena ‘edia. Ta Iona ni‘atu ‘i mwa‘uta waga soranaia; ta i ‘eno‘eno, ta i ‘enomwataia.

⁶ Ga kapiteni ‘ena ‘i mai, ta ‘i eonena, ‘Oio to ‘eno‘eno, To‘ase ‘u nuena? ‘u da tooro, ‘imu Eaubada ‘ena ‘u da bwau, nai Eaubada ‘i da nuanua manuda, be ‘enega gea‘abo ta da saosaoora.

⁷ Ta si gwae ‘e bweuna ‘e bweuna gosiana ‘enaia, Wa da mai, ta da ‘ula ‘esinua, be ‘enega ta da mwaratoni iaita manuna to‘umalina gete ‘edaia ‘i mai. Ga si ‘ula ‘esinua, ta ‘ana ‘esinua Iona ‘ena ‘i be‘u.

⁸ Ga si eonena, ‘A sideio, ‘u da eonema, iaita manuna to‘umalina gete ‘edaia ‘i mai; to‘ase ‘imu guinua? ta mwa‘adega ‘u mai? to ‘asa ‘imu ‘asa? ta to tomota ‘ediega ‘oio?

⁹ Ta ‘i eonedi, ‘Abo‘agu Eberu; ta Ieoba ia matautena, garewa ‘ina Eaubada, tauna ora ta bwa‘a iadaiadana ‘i mweruruidi.

¹⁰ Ga tai nidi si matauta sinabwana, ta si eonena, To‘ase gete ni‘atu ‘u guinuena? Tai nidi si mwaratonina ‘i dena Ieoba matanega ta ‘enega, ‘i simana ‘edia ta ‘enega.

¹¹ Ga si eonena, To‘ase ‘a da guinua ‘emuia, be ‘enega ora ‘i da siwaroa ‘emaia? ora ‘ina gamwasoara ‘i sinabwa wawasae ta ‘enega.

¹² Ta ‘i eonedi, Wa da ‘a‘arigu, ta wa da ‘ulamwautegu oraia; ta ‘enega ora ‘i da siwaroa ‘emia: ia mwaratoni ta ‘enega manugu wedilia sinabwana gete ‘emia ‘i mai.

¹³ Ta tai nidi si neanea pa‘arina be si da ‘iledi ‘asaia; ta si soi ioge: ora ‘ina gamwasoara ‘i sinabwa wawasae ‘edia ta ‘enega.

¹⁴ ‘Enega Ieoba ‘ena si bwau, ta si gwae, Ieoba ie, ‘a sideio, ‘a sideio, gea‘abo ‘a da saoora tai gete iawasina manuna, ta rara nigea to‘umalina gea‘abo ‘emaia ‘u da sa‘u: ‘oio ta ‘enega, Ieoba ie, ni‘atu ‘u guinua na‘ieana ‘i bobo‘ana ‘emuia.

¹⁵ Ga Iona si ‘a‘arina, ta si ‘ula mwa‘utena oraia: ta ora ‘ina gamwasoara ‘i losa‘u.

¹⁶ Ga tai nidi Ieoba si matautena wawasae; ta taria Ieoba ‘ena si ‘ebwaea, ta si ona‘upa‘upa.

¹⁷ Ta Ieoba iana sinabwana ‘i me‘ena be Iona ‘i da tonena; ta Iona iana gamwanaia ‘ena ‘i miami asiata ‘e toi ta guguioi ‘e toi.