2Timotius 1 - ALLAH NEN WENE NGGET MENDE WAROGO WOKNINAKIKE WENE

Keyagi wakike wene

^1-2 Timotius naʼbut nendainggen kunik o. Allah nen, “Kit Kristus Yesus kinom kunik werekma kinilugut kinabigogo,” yiluk, abok yoknisasike mende eti, an Paulus nen yogisilik noko dogowagaluk, akla ambasike paga, Kristus Yesus nen nayonggo ʼbiluk laʼbani wagikemo, yoma dogolik wene yi kolal mbalogo koba laʼbi wagi o. Ninombae Allah inom, ninewe Endaganggok Kristus Yesus inom, imbisak inobabut pano etnogo nen, pano mende wokigik, kaʼbuwa kigik, kendainggen kambugut dagigik, kagako dogowak o.

Timotius endainggen Allah oba panggot diluk dogowagaluk, asuk warogo yogokike wene

³ An nakombalak, Allah apma dogolik, inenggaerek inendainggen omanggiat pano mondok dogolik, at ake kagakik, pogorakik, kagako laguka kak, an esigit dilugat kagako dogolik, kat koba mondok eberegat, kat kake dinggagane kibanggone sembayan yisi mondogat dogolik, Allah keyagi warigogo o.

⁴ Kat de akigin etnogo nen, nimbisak abuk atluk, kakla pano agonem, nakla arlenggen nggokogo kagaluk, “Nimbisak abuk atlep o,” yiluk, koba eberek werek o.

⁵ Dogolik, kendainggen Allah oba eberogonat panggot diluk werek yiluk, nakla eberegat werek. Alebagik kagona Lois inom, kagoya Eunike inom, inendainggen Allah oba panggot diluk welaguka kak, kat kendainggen esigit dilugat werek yiluk didagaligogo o.

⁶ Esigit diluk panggot diluk werek eti paga, an nen ninggi kunggulowak oba sebelkonem, Allah obabut pano nen, “Kat esigit dilugat Allah eyabu kagako dogono o,” yiluk kobabut wokokike mende eti kindu nagulagonem kunigogi kak, kakla aganggen atluk dogonok nen yiluk kakla nggagalogo yokigi o.

⁷ Allah nen ninobabut woknisiligogo eti, ninayuk weyak dogowagaluk woknisiligogo ʼbuk. At te, ninobatnerogo welagik, akoni amberek inaʼbuwarogo welagik, ninendainggen sebekogo welagik, kagako dogowagaluk woknisiligogo o.

⁸ Eti paga, ninewe Endaganggok abok akoni amberek yogisausak kenggarli dekogo ʼbukakogonat yogisigik, nen, an at pasigat ninggi kerle warogo ʼbanggama werek yi pasik, kenggarli dek kalon togo welagik, kagako dogono o. Esigit diluk kagako dogolik, akoni amberek nen pano wene eti pasik, yi aik ndi aik kagat ninako nggorlegat, an Allah obatne paga werek kagat, kobakanini kambuk yiluk dogono o.

⁹ At Allah nen ninebe ndil ninakik, at enggaerek aʼburi asuwagaluk ninayonggo ʼbigik, kagakike eti, nit nen omanggi kagakugu paga ninayonggo ʼbinanggike ʼbuk. At te, Allah obabut pano nen, ebe-alep yi mende ndi mende awan winamet digidek dogolik, yabunggane Kristus Yesus kagasigin oba panot ninabigiluk, enggaerek akla ambalok ninayonggo ʼbinanggike o.

¹⁰ Esigit diluk ambasike mende limago werekma, yabunggane Kristus Yesus ndil ninabigogo mende ebe selekma wagike eti paga enggagat agike o. At ane pano wene eti paga, watlarigogi erlo eti, kai digik, watlagidek niniluk mondok dogogun mende eti, winamet digik, kagakike.

¹¹ Esigit diluk kagakikesik nen, an pano wene etiat yogisigik, yanggul isigik, yogisilik noko dogowagaluk nayonggo ʼbiluk laʼbani wagikemo noko dogoligogo o.

¹² Esigit diluk laʼbani wagikemo liligogo eti paga, it akoni nen yi aik ndi aik kagat nako nggorlegat, nendainggen ebe nilu mende oba panggot diluk werek yiluk, nenggarli agidek, nakla mbugat werek. At nen, “An mende yi paknarek dogono. Paknarek werekma, kurli an nebeat wisigin o,” yiluk, noba ʼbiluk nayonggo ʼbanggike mende eti enggaerek obatne paga erlok paknarek dogogin o, yiluk nakla nen didiligogo o.

¹³ Wene an nen yanggul kikigimo waganggigin etnogo, an nobabut waganiluk, nit Kristus Yesus ninom kunik dogolik, ninendainggen at oba panggot digik, akoni amberek inaʼbuwa kigik, kagarigogi kak kagako dogolik, kakla nen, “Panot ninabigogo mende wene ebe yiat o,” yiluk, aʼbetogo paʼbiluk yanggul isasi dogono o.

¹⁴ Allah nen, “Wene pano mende eti akoni amberek nen weyagat dunogo yiluk, panorogo paknarek dogono o,” yiluk, ninoba ʼbisike mende eti, at Agurengge ninakla ʼbisikemo werek eti, obatne paga panorogo pago dogono o.

¹⁵ It akoni o propinsi Asia yi ai ndi ai mende yomenogo inebe taʼbokogonat an togot daniluk lo dukisi dogolik, at Figelus inom, Hermogenes inom, inomat duki lagaka eti kat kiluat werek o.

¹⁶ Esigit dilugat mende, at Onesiforus aʼburi inom inarligat, kibitngge-yogongge nakla panorogo nendainggen sebeli wirigogi eti, ninewe Endaganggok nen inaʼbuwarogo pagisek dogowak o. An ninggi kerle warek werekma noba wisu enggarli degat,

¹⁷ O Roma wagasik nen, ibat kinok woknako lagasik, nebe kweyak nabi waga o.

¹⁸ Ninewe Endaganggok obabut pano nen motogonat kagasigin etinem, at Onesiforus eti ebe aʼbuwa kowak o. At paganeat nen, o Efesus dogolik, an nggokogo yamak niyasi lagike etnogo, kat dikogo kiluat o.