FAA WULOAI KƐNƐ MA 1 - DEƲE NIINƐI

Faa wuloai kɛnɛ ma Jɔ̃ ɣaazu

¹ Nii ɣa é ga Ziizɛ Kolai na faa‐wulo ʋai kɛnɛ ma. Gala ge ná ʋeeni zéea ga fai é vaazu ɣɛɛzu ga maa ʋilea é dɛ ga ná tii‐ɣɛɛ veaitiɛ. É nii ɣaa wodoni ná keelai leve pele ma bɛ́ pɔ̀, nài gè ga ná tii‐ɣɛɛ nui Jɔ̃.

² Nà ɣa gè Gala daa woi mazeele woo ʋeeni gè Ziizɛ Kolai mazeele woo ʋe wɔnɔ. Gè seele woi ʋeeni faitiɛ ɣaazɔ zu gè te vɛtɛni.

³ Tuuyiɛ ɣa ɣɛ nui ma yá Gala daa woi mawɔlɔi nii lodo ga woo wala. Tuuyiɛ ɣa ɣɛ niitiɛ ma ta mɛni tiɛ ziɛ ga nii ponɛi su. Ƃɔvɛlaale siɛgi maa ƃuovɛ sa.

Gala pɛlɛ lɔfelaitiɛ ta laali‐ma

⁴ Nài gè ga Jɔ̃, gà kɔlɔi nii wonɛzu Gala pɛlɛ lɔfelaitiɛ wɔ te Eezia yui zu. Maa‐wõi‐ɣaa ƃɔ‐bai ƃɔga zii‐lai ta ɣɛ wo ʋaa ma fãa. Na ɣa ga kpɔ‐bai ƃɔga zii‐lai kuloai nui nii ya é na, é wɔnɔ ga nui é ɣɛni na é ga nui nii é vaazu vaazu, ta gaa‐ƃaa ŋɛni lɔfelaitiɛ te ná masa kpɔkpɔgi laa wu.

⁵ Te wulovɛ kɔnɔ Ziizɛ Kolai nii ya é ga seelei nu ɣa laa la. Towa kɔnɔ é ga nu maa wũgi é wu ziɣini saa ya. Towa é ga ɣalasoga maazu‐ʋaa‐wo nui zui ɣa. Nui é de wõini, na ɣa ga nii é de wũ maa woga da ʋaa yowũitiɛ zu ga máŋamai

⁶ ƃɔɔlɔlai ɣa li pɔ́ fãa, gaa‐ƃaa ɣɛ zéea wɔlɔ‐wɔlɔ ta wɔlɔ‐wɔlɔ. Nà nɔ yá ɣɛ. Towaa é de ɣɛɛ ga masada zei‐zu ɣila é de ɣɛ ga laa‐ʋaalega ná Galagi ʋaa ma nii é ga kéea.

⁷ A wɛlɛ! Tɔ vaazu yɛsu tine ƃiligi va ta tɔ te va. Nu pɛ gaazu ɣa la má, niitiɛ ƃalaa te kpãi lɔɔni bá. Na ɣa ɣɛɛ na zii ɣaazɔ é zui ɣa ta nui nii maƃee loo. Towaa ɣɛ ŋɛ na. Nà nɔ yá ɣɛ.

⁸ De maliɣii Gala ka ɣɛɛzu tea, “Nà ɣa gè ga faa pɛ tɔɔ‐zei‐zu gè ga faa pɛ mawɛ̃ɛ‐pele‐ma.” Towaa é na, tɔ wɔ nɔ ɣa é ɣɛni na, tɔ nɔ ɣa kɔnɔ é vaazu vaazu, gaa‐ƃai ƃɔgɔpɛ ge zéea.

Kolai maʋaa‐wuu ʋai Jɔ̃ ɣaazu

⁹ Nài gè ga Jɔ̃, gà ga wo wɔi ta. Pɛ̀ɛvɛ wo va faa ƃoei zu de ɣɛɛ vele ma su ɣilekpu da Ziizɛni. Pɛ̀i wo va wɔnɔ a de ɣɛ masadai zu, pɛ̀i wo vɛ zii‐lɔɔ‐wuloa zu. Gè ɣɛni ziɛ ligi nii zu ta na lili ga Patimɔ. Gala daa woi‐wo fai bɛ̀ ta Ziizɛ mazeele woi gè feeni, nà mazaƃui ɣa te liini la gàazu na.

¹⁰ Gala baa ŋinɛgi ná wuuni gàazu foloi nii ma kuloai su de maliɣii ʋaa ma. Tei na ɣɛɛni, gè woo ta mɛnini wuluvɛ ga woo wala è ɣɛ puu woo.

¹¹ É ɣɛni ɣɛɛzu tea, “Nii è vaazu pɛtɛsu ponɛ kɔlɔ zu è teve Gala pɛlɛ lɔfelaitiɛ wɔ te Ɛfɛsɔ, Simɔɔna, Pɛɛgamɔ̃, Tayataila, Saadi, Filadɛɛfia é vɛɛ Laodisia va.”

¹² Tìte pele ɣa na é ɣɛ ga gè wɛlɛ nii va gói ɣɛni lɛɛzu. Tei gè liteni, gè wɛlɛni labo‐zei ŋɛni lɔfela va te ƃɛtɛi ga zɛni.

¹³ Labo‐zei ŋɛni lɔfelai niitiɛ zaamavɛ, ŋɛni ta ɣɛni na kuloai ga nu ƃuse. Ʋɛɛ sɔkpɔ ɣa é ɣɛni ma, zɛni pulu‐ɣili kpitigɛi kpakpa bu.

¹⁴ Wũ deɣai ɣɛni welezu è ɣɛ baala deɣa wele yíɛ wele è ɣɛ dɛɣɛ. Ɔ̀ gáazu ɣɛzɛgitiɛ vɛtɛ è ɣɛ ŋabu‐zo.

¹⁵ Kɔ́wɔitiɛ wuloai ɣɛ è ɣɛ kpaaʋa ɣalagi nii maa ɣizigɛi ɣɛ yíɛ ʋolo nii maa ziɣiai ga ŋabu. Gói wuloai ɣɛ è ɣɛ ziɛ lamaa zulu ti.

¹⁶ Sɔmɔ deka lɔfela ɣa é ɣɛni zée‐zagi ɣa. Na ɣa ɣɛɛ na gaa‐fele boa zɔkpɔ ɣaa‐liɛ‐liɛ ge wuloni dáavɛ. Gáazuvɛ ɣɛni ʋolozu è ɣɛ folo ɣa ɣɛ toozu ga ná kee ɣaa‐ƃai ɣaazɔ.

¹⁷ Tei gè wɛlɛni bá, gè looni kɔ́wɔ wu è ɣɛ gà za. Kɛ̀ é yee‐zagi vɛɛni bà é ɣɛ mà, “Mɛ lɛ luo. Nà ɣa gè ga nu maa wũgi gè ga nu ɣaa‐ƃelagi.

¹⁸ Gà ga nui zɛʋui zéea. Gè zaani. Tɔwɔ wɛlɛ! Zɛ̀ʋui ɣa yɛ sa zèea wɔlɔ‐wɔlɔ ta wɔlɔ‐wɔlɔ. Saa ƃɔga saa vea ɣɛɛ‐zuvɛ te mayiliɣii ɣa zèea.

¹⁹ Na ma nii nɛpɛ è wɛlɛzu bá, ponɛ. Na ɣa ga nii sa é ɣɛɛzu ta nii é vaazu ɣɛɛzu na wulu.

²⁰ Sɔmɔ deka lɔfɛlai niitiɛ è te vɛtɛni zèe‐zagi ɣa é vɛɛ labo‐zei ŋɛni lɔfelaitiɛ va te maʋaa zu‐wulo‐zuvɛ ná loowugɛi yɛga towaa: Sɔmɔ deka lɔfelaitiɛ ta ga Gala ta ɣeelaitiɛ te Gala pɛlɛ lɔfelaitiɛ ʋaa ma. Labo‐zei ŋɛni lɔfelaitiɛ wɔ te maʋai zu‐wulo‐zu ɣa ga Gala pɛlɛ lɔfelaitiɛ.”