MAKI 1 - DEƲE NIINƐI

Bataize‐ɣɛɛ Jɔ̃ na Gala goo‐wogai

¹ Woo niinɛ vagɔi lɔɔ‐zei‐zuvɛ ɣa é vile Ziizɛ Kolai va, nii é ga Gala dui.

² È ɣɛ velei Gala daa woo‐wo nui Aizeea ponɛni la Gala kɔlɔi zu, é boni ga Gala ka ɣɛɛzu tea, “Wɛlɛ! Gà nà keela woo‐wo nui levesu è luo, nui yá pelei ɣavele ɓɛtɛ yìɛ.

³ Nu ta ɣa lobasu kpooʋei zu yíɛ bo ga, ‘A de maliɣii na pelei ɣavele ƃɛtɛ. A ná pelei lete to.’ ”

⁴ Bataize‐ɣɛɛ Jɔ̃ vaani kpooʋei zu yíɛ Gala goi wo é vile bataize‐yɛɛ ʋai nii va pilegɛi pulu‐ɣaa‐ʋe faa va faa yowù va su‐ʋaa‐yɛ faa ma.

⁵ Yudiiya yui yaazɔ pɛ é vɛɛ Yɛlusulɛɛ lai va te liini pɔ́ vɛ te ta ʋaa yowũitiɛ wulo sa la te bo, tɔwɔ é bataize ɣɛ ga tiɛ ziɛ walai Jɔdɛ̃ wu.

⁶ Seɣei Jɔ̃ ɔ́ tɛ ma kpɛtɛi ɣɛ ga suoi daa ga “keeamɔ” maleɣai yíɛ zaama ɣili ga suo wɔlɔ zaama‐ɣili. Koto kpɔga kõei gulo ɣa ɔ́ te mi.

⁷ Tɔwɔ é Gala goi woni yíɛ ɣɛ tea, “Nui é pùlu é vaazu kée ɣaa ƃaavɛ é leve bà. Tɔ ga nui gɛ̀ lɛ kuloni bu ga gè maa yii gè ná savala tokoi laa ʋũi.

⁸ Gè bataize ɣɛɛ ga wiɛ ga ziɛ. Kɛ̀ towaa bataize ɣɛ ga wiɛ ga Gala baa ŋinɛgi.”

Bataize‐ɣɛɛ ʋai ga Ziizɛ ta tɛ‐gai é woni da

⁹ Nà maziɛgi zu Ziizɛ ziɣini Nazɔi lai zu Geealali yui zu, Jɔ̃ bataize ɣɛɛ la Jɔdɛ̃ wu.

¹⁰ É ɣɛni ƃɔɔ nɔ wulozu ziɛi wu é wɛlɛ sa Gala ta va ná laa laogɛi, Gala baa ŋinɛgi yíɛ sa yii ma maʋaa wuloai è ɣɛ ƃiiƃɔku.

¹¹ Woo ta wɔ ge wuloni gee wɔlɔgi zu yíɛ ɣɛ tea, “Yà ɣa è ga ẁõila lui. Zìi wala laavɛ è maʋai vɛ.”

¹² Gala baa ŋinɛgi kɛɛni é li kpooʋei zu ga maa ʋilea.

¹³ É kɛɛni kpooʋei zu ga folo yee naagɔ, Seeta yíɛ tɛ gá. É ɣɛni dɔƃɔ zuoitiɛ zaama, kɛ̀ Gala ta ɣeelaitiɛ te báa ʋaa ɣɛɛni.

Ziizɛ ƃele‐ʋili bea naagɔitiɛ lilini

¹⁴ Jɔ̃ zogɛi sa ma ɣɛ, Ziizɛ vaani Geealali yui zu yíɛ woo niinɛ vagɔi wo kuloai Gala zeea.

¹⁵ É ɣɛni ɣɛɛzu tea, “Kui ziitia. Gala na masadai maa ƃua. A wulu ɣaa ʋe faa yowũ va wo woo niinɛ vagɔi ziɣi ga gaama.”

¹⁶ Tei sa Ziizɛ ɣɛni ziɛzu Geealali yiɛ walai wukũi ba, é wɛlɛni Saimɔ va ta déɣei Ɛĩdulu tiɛ ta ƃele walai vili ziɛi ma, ƃɔvɛlaale te ɣɛni ga ƃele‐vili bca.

¹⁷ Ziizɛ ɣɛ te ma, “A vile pùlu. Gà kɛ wo ɣɛ ga nu‐mai bea Gala ma.”

¹⁸ Te ƃeni sa ta ƃeleitiɛ va ga maa ʋilea te vile púlu.

¹⁹ Tei sa é liini kɔnɔ ga ta wolo, é wɛlɛni Zɛbɛdi duu Jĩi va ta déɣe Jɔ̃. Te ɣɛni ta ŋeegi zu tiɛ ta ƃele walaitiɛ zu zɔlɔ.

²⁰ É Jĩi lilini sa ta Jɔ̃ ga maa ʋilea. Natiɛ te te ɣeea Zɛbɛdi yɛ kẽegi zu é vɛɛ tii‐ɣɛɛ veaitiɛ va te vile púlu.

Zunui gɔʋɛ yowũi ɣɛni pulu

²¹ Te liini taa ta zu daa ga Kapɔɔnia. Tei doowo foloi ziitini, Ziizɛ lɛɛni Gala‐feli wɔtai wu é numaitiɛ ɣala bo na.

²² Ziizɛ na kala‐bogi wala vilini numaitiɛ ma ga ki‐gaa‐ziɛ, ƃɔvɛlaale é te ɣala boni è ɣɛ nui gaa‐ƃaa zéea, ɛ́ lɛ ŋɛni kɛɛni ga tɔ‐dɛɛ ɣala‐mɔitiɛ ta dɛi ɣavele.

²³ Zunu ta ɣɛni ta Ɣala‐feli wɔtai wu gɔʋɛ yowũ púlu. É lobani

²⁴ yĩɛ ɣɛ tea, “Nazɔi Yiizɛ, yà ʋaa zɛƃɛ ɣa é gá ʋaa zu? È vaa ga è gé zu ŋala‐ŋala? Gè kwɛ̃ni ga nui è le. Yà ɣa è wuloai su leelaa ga Gala na dɔ.”

²⁵ Kɛ̀ Ziizɛ yii ɣaa wãlani gɔʋɛ yowũi ma é ɣɛ ma, “Ná ɣɛ ƃu, è ziɣi púlu!”

²⁶ Gɔʋɛ yowũi tooni yíɛ ƃeli. Nà ɣɛɛzu é loba ga woo wala é ziɣi pulu.

²⁷ Ziizɛ maʋai wuloni ga tiɛ ga tamaa. Na ʋaa ma te ɣiini gaa zaɣa kɛɛni tiɛ ɣɛ tea, “Nii zu‐wulo‐zu ɣa ga minɛ? Kala‐bo niinɛ ɣa! É gɔʋɛ yowũitiɛ pɛ deʋea ga gaa‐ƃaa natiɛ te goo mɛni.”

²⁸ Dáa wuloni ga maa ʋilea Geealali ligi zu ɣaazɔ.

Ziizɛ nu lamaa ʋaloni

²⁹ É wuloni Gala‐feli wɔtai wu ga maa ʋilea, Jĩi ƃɔga Jɔ̃ te vɛɛ ba te li Saimɔ ƃɔga Ɛĩdulu ta vɛlɛi wu.

³⁰ Saimɔ mɔɛ ɣɛni laani kɔɔlɛ ʋile yiiyai la. Te maʋai wo sa má ga maa ʋilea.

³¹ Ziizɛ liini pɔ́ vɛ é kpalo ga zee é bu ziɣi. Kɔɔlɛ ʋilei ɣaa yiini sa ma ga maa ʋilea. É te wɔ̃nɔ zeke kɛ.

³² Folo ɣai too‐zuvɛ sa kpɔkɔi na, te vaani ga seeƃɛ veaitiɛ ɣaazɔ pɔ́ é vɛɛ taitiɛ va gɔʋɛ yowũ ɣɛni te wulu.

³³ Taa pɛ ge ɣaa lɛɛni ba pɛlɛi la.

³⁴ É seeƃɛ zii laali‐taali tamaa valoni kɛɛ vea ma. É gɔʋɛ yowũ ƃɛ kɛɛ vea wulu. Ɛ́ lɛ ƃɛga ƃe gɔʋɛ yowũitiɛ va tɔ laa wɔlɔ, ƃɔvɛlaale te ɣɛni ga kwɛ̃ɛga ga nui é le.

Ziizɛ Gala goi woni Geealali

³⁵ Su woozai ɣɛ dɛ gela ɔ́ vɛɛ bosu, Ziizɛ wu ziɣini é li tɔ ɣilekpu ŋada laa. É Gala feli na.

³⁶ Saimɔ ta baitiɛ te daɣani ba.

³⁷ Te pɛtɛni te ɣɛ ma, “Nu pɛ ka è ɣaa ziɛzu.”

³⁸ É ɣɛ te ma, “A dii na wulu laitiɛ zu kɛɛ ʋaa ma gè Gala goi wo nátiɛ. Ƃɔvɛlaale nà ɣa gè mawulo woga ŋetea.”

³⁹ É leveni sa Geealali yui wɔlɔ‐kɔlɔ ma ɣaali yíɛ Gala goi wo ta Ɣala‐feli wɔtaitiɛ wu yíɛ gɔʋɛ yowũa ƃɛ numaa wulu.

Ziize gee nui ʋaloni

⁴⁰ Gee keea nu vaani pɔ́ é vɛɛ kɔwɔ wu é pee ʋe bé é ɣɛ ma, “Ani yà ʋaa na bu, yà zoo è bàlo màa ziɣi.”

⁴¹ Gaazu‐maa‐wõi Ziizɛ zoni é yee zakpa é ʋowũ ba é ɣɛ ma, “Daavɛ zìi ma. Valo è maa ziɣi.”

⁴² Gee zeeƃɛi ziɣini sa na va ga maa ʋilea, máa ziɣi.

⁴³ Ziizɛ teveni ga su ʋilea é ɣaazu ɣili boga va ma

⁴⁴ yíɛ ɣɛ ma, “Kɛsɛ ga è mɛ lɛ ta wo nu ta nɛpɛ ma. Kɛ̀ li è ƃɔɔ lɛ ga laa‐ʋaalegi. Na ɣa ɣɛɛ na è faa‐nɛi nii ɣɛ Mooze maʋaa leʋeni é da wo ya dɛɛ ʋaa ma ga numaitiɛ ga seele ga è valoa.”

⁴⁵ Kɛ̀ é wuloni é vɛɛ ga laa wu ziɣia ma yiɛ bo. É Ziizɛ maa woo ziɛni ŋada zii ƃɔgɔpɛ. Na ma Ziizɛ lɛ ƃega sa kɔnɔ lɛ taa zu numaa ɣaazu. Kɛ̀ kuloai ɣɛ tai va. Numaitiɛ wɔ te ziɣini ŋadɛi ɣaazɔ te va pɔ́.