JƆ̃ 1 - DEƲE NIINƐI

Zɛʋui mawoi

¹ Ŋetea lɔɔ‐zei‐zuvɛ woi ɣɛni na. Woi ɣɛni Gala ba. Woi ɣɛni ga Gala.

² É ɣɛni Gala ba ŋeteai lɔɔ‐zei‐zuvɛ.

³ Ŋɛni ƃɔgɔpɛ ge wuloni ŋetea sáala zu. Ɔ́ ƃe ɣɛɛzu na, ŋɛni nɛpɛ gɛ lɛ ƃega wulo ŋetea. Ŋɛnii é wuloni ŋetea

⁴ sáala zu é ɣɛni ga zɛʋui. Zɛʋui nii wɔ ka é ɣɛni ga ŋada wodoai nu ƃuse ʋaa ma.

⁵ Ŋada wodoai ɣa ʋolozu kpidii zu. Kpidii yee lɛ leveni ba.

⁶ Gala ge nu ta leveni daa ga Jɔ̃.

⁷ Jɔ̃ vaani ga é seele woo ʋe. Na ɣa ga é seele woo ʋe ŋada wodoai ʋaa ma, kɛɛ ʋaa ma nu ƃɔgɔpɛ ge siɣi ga gaama sáala zu.

⁸ Jɔ̃ lei ɣɛ ɔ́ ɣɛ ga ŋada wodoai, to mu é vaani ga é seele woo ʋe ŋada wodoai ʋaa ma.

⁹ Ŋada wodoai ƃɔɔƃɔɔgi nii yá nu pɛ ki daa wodo é ɣɛni vaazu zui zu.

¹⁰ É ɣɛni zui zu. Zui maʋaa wuloni ŋetea sáala zu. Na ƃalaa ɣɛɛvɛ zui lɛ kwɛ̃ɛni.

¹¹ É vaani kpɔɔ yui zu. Kpɔɔ veaitiɛ tɛ lɛ yee zeini bu.

¹² Kɛ̀ niitiɛ ɣaazɔ te yee zeini bu te ná daa‐zeigi ʋaa ziɣi ga gaama, é gaa‐ƃaa ʋeeni te ya ga te ɣɛ ga Gala dea.

¹³ Te ɣɛɛni ga Gala dea. Su‐wulo‐zu lɛ ga te ɣaavɛ ga velei ta nu ƃuse ɣaa la ɔ́ nɔ ɣɛ ga te ɣaavɛ ŋii‐pɛlɛ‐wu mavele ma. Ɛ́ lɛ wɔnɔ ga te ɣaavɛ nu ƃuse yaa leʋe zu. Kɛ̀ Gala ka é te ɣɛɛ ga dea.

¹⁴ Woi ɣɛɛni ga nu ƃuse é zei gé wɔwɔ ma daa ʋegɛi ga gaazu‐maa‐wõi‐ɣaa ƃɔ‐ba ta gaama. Gé wɛlɛɛ ná saala‐malai va. Na ɣa ga saala‐malai nii solowogɛi de ɣeea Gala duu ɣilekpugi nɔ ʋaa ma.

¹⁵ Jɔ̃ mazeele woo ʋeeni ga seeze yíɛ ɣɛ tea, “Nii ɣa gè ɣɛni maʋaa wosu gìɛ ɣɛ tea,‘Nui é pùlu é vaazu tɔ màazu, ƃɔvɛlaale é ɣɛni ŋetea tɔ vɛɛ kàazu.’ ”

¹⁶ De pɛ de wɔɔ laa zɔlɔ woga ná kpɔ‐ba walai zu ta ná gaamai. De kpɔ‐ba zɔlɔ woga de wote de sɔlɔ wo.

¹⁷ Gala na tɔgi lɛɛni Mooze zaala zu. Gaazu‐maa‐wõi‐ɣaa ƃɔ‐bai ta gaamai te va Ziizɛ Kolai zaala zu.

¹⁸ Nu nɛpɛ gɛ lɛ dɛ wɔlɔ wɛlɛni Gala ba. Kɛni nui tɔ ɣagi é ga Gala é Gala koba, towa é Gala maʋaa ɣaa wodoa.

Bataize‐ɣɛɛ Jɔ̃ na keela woi

¹⁹ Dusiitiɛ te ta laa‐ʋaalegitiɛ wuloni Yɛlusulɛɛ é vɛɛ Liiʋaitiɛ va te te leve ga te Jɔ̃ ɣaa zaɣa kɛ ga, “Ƃɛ ɣa ga yiɛ?” Seele woi Jɔ̃ feeni é ɣɛni ga nii.

²⁰ É laa wu ziɣini ma é bo ɛ́ lɛ ná ta nɛpɛ zɛni wulu. É ɣɛni tea, “Nà lei gɔ̀ ɣɛ ga nui Gala zee ƃadogɛi ba, na ɣa ga Kolai.”

²¹ Te gaa zaɣa kɛ te ɣɛ ma, “Ƃɛɛ mu ka ga yìɛ? Yà ga Yiilaija?” Jɔ̃ ɣɛ tea, “Nà laale.” Te ɣɛ ma kɔnɔ,“?Yà ɣa è ga Gala daa woo‐wo nui?” É gaa wote é ɣɛ tea, “Ƃa.”

²² Te ɣɛ ma, “Ƃɛ ɣa ga yìɛ? Maɣaa‐wotegi ʋe gé ya gé lii la niitiɛ wɔ te gé levega. È ɣɛ le é vile ƃɔɔ va?”

²³ Jɔ̃ ɣɛ tea, “Nà ɣa gè ga nui é lobasu kpooʋei zu yíɛ ɣɛ tea, ‘A de maliɣii na pelei lete to,‘ è ɣɛ velei Gala daa woo‐wo nui Aizeea boni la.”

²⁴ Tɔwɔ niitiɛ te levegɛi ɣɛ te wuloni Favilesiitiɛ wɔ vɛ.

²⁵ Te Jɔ̃ ɣaa zaɣa kɛɛni te ɣɛ ma, “Aƃɛ ʋaa zu mu yà bataize ɣɛ ani ɛ̀ lɛ ga Kolai, ɛ̀ lɛ ga Yiilaija, ɛ̀ lɛ wɔnɔ ga Gala daa woo‐wo nui?”

²⁶ Jɔ̃ gaa woteni te ya é ɣɛ tea, “Gà bataize ɣɛ ga ziɛ, kɛ̀ nu ɣa loni wo zaama wɛ lɛ kwɛ̃ni.

²⁷ Towa ʋɔlɔ é pùlu é vaazu, nui gɛ̀ lɛ kuloni bu ga gè ná savala tokoi laa ʋũi.”

²⁸ Nii ɣɛɛni Bɛtani lai zu Jɔdɛ̃ yiɛi wuluvɛ, vɛ Jɔ̃ ɣɛni bataize ɣɛɛzu na.

Gala na baala zuwui

²⁹ Na wulu ʋoloi Jɔ̃ wɛlɛni Ziizɛ va nà yìɛ va ga pɔ́ vele. É ɣɛ tea, “Wɛlɛ! Gala na baala zuwui ɣa, nii yá faa yowũi ziɣi zui va.

³⁰ Nii ɣa gè ɣɛni maʋaa wosu gìɛ ɣɛ tea, ‘Nui é pùlu é vaazu tɔ màazu, ƃɔvɛlaale é ɣɛni ŋetea tɔ vɛɛ kàazu.’

³¹ Nà kagi gɛ̀ lɛ ŋɛni kwɛ̃ni. Kɛ̀ nii yá kɛ Yezɔitiɛ te kwɛ̃ɛ mazaƃui ɣa gè vaa la gìɛ bataize ɣɛ ga ziɛ.”

³² Jɔ̃ seele woo ʋeeni é ɣɛ tea, “Gè wɛlɛni Gala baa ŋinɛgi va é wulo gee‐zuvɛ é yii má è ɣɛ ƃiiƃɔku. É yɛni bá.

³³ Nà kagi gɛ̀ lɛ ŋɛni kwɛ̃ni. Kɛ̀ Galagi nii é tèvega ga gè bataize ɣɛ ga ziɛ é ɣɛni mà, ‘Nui yà wɛlɛ bàa ŋinɛgi va é yii ma é yɛ ba towa yá bataize ɣɛ ga bàa ŋinɛgi.’

³⁴ Nà wɔ gè ná vɛtɛga gè mazeele woo ʋe ga nii ɣa é ga Gala dui.”

Ziizɛ na kala dopo maa wũgitiɛ

³⁵ Na wulu ʋoloi Jɔ̃ ƃɔga ná kala dopoi felegɔ te ɣɛni loni.

³⁶ É wɛlɛni sa Ziizɛ va yíɛ leve yíɛ ɣɛ tea, “A wɛlɛ! Gala na baala zuwui ɣa!”

³⁷ Kala dopo felegɔitiɛ te nii mɛnini te vile Ziizɛ wulu.

³⁸ Ziizɛ liteni é wɛlɛ te va te pulu é ɣɛ te ma, “Zɛƃɛ ɣa wo gaa ziɛzu?” Te ɣɛ ma, “Loabai, minɛ ɣa è na?” (Loabai zu‐wulo‐zu ɣa ga kala‐mɔi.)

³⁹ É ɣɛ te ma, “A va wo wɛlɛ ná va.” Te vaani sa te wɛlɛ vɛ va é ɣɛni na. Ta tiɛni te foloi matai ƃeani sa na nà maɣee, ƃɔvɛlaale kpɔkɔ ʋolo daani sa sɔ̃ɔ.

⁴⁰ Kala dopo felegɔitiɛ te Jɔ̃ woo mɛnini te vile Ziizɛ wulu, gilagi ɣɛni ga Saimɔ Pite deɣei Ɛĩdulu.

⁴¹ Ɛĩdulu diɛ Saimɔ ɣaa ziɛni ga ma wũ é pɛtɛ é ɣɛ ma, “Gé wɛlɛɛ nui va Gala ge yee ƃadoga ga masagi.” Na ɣa ga Kolai.

⁴² Ɛidulu vaani la Ziizɛ wɔ. Ziizɛ wɛlɛ ba é ɣɛ ma, “Ya ɣa è ga Jɔ̃ dui Saimɔ. È laa ɣa ɣɛ ga Siifɛ.” Na ɣa ga Pite. Su‐wulo‐zuvɛ wɔ ge ga fasa.

Ziizɛ Fele linini t Nataania

⁴³ Na wulu ʋoloi Ziizɛ deʋeni ga é li Geealali yui zu. É Fele ɣaa ziɛni é pɛtɛ é ɣɛ ma, “Va è vile pùlu.”

⁴⁴ Fele ɣɛni ga Bɛseeda nu. Na ɣa ga Ɛidulu ƃɔga Pite te wɔ taa‐zuvɛ.

⁴⁵ Fele é Nataania ɣaa ziɛni é pɛtɛ é ɣɛ ma, “Gè Nazɔi lai zu Yiizɛ vɛtɛni, nii é ga Zoosɛ dui. Ziizɛ nii ɣa Mooze faa woni é vile ba tɔ kɔlɔi zu é ga Ziizɛi nii Gala daa woo‐wo beaitiɛ pɛ te faa wonɛni é vile ba.”

⁴⁶ Nataania ɣɛni ma,“?Faa vagɔ nɛpɛ ka wulo Nazɔi lai zu?” Fele ɣɛ ma, “Va è pɛtɛ.”

⁴⁷ Ziizɛ wɛlɛni Nataania va yìɛ va pɔ́. É ƃɔɛni é vile ba yíɛ ɣɛ tea, “A wɛlɛ! Yezɔi yui zu nu ƃɔɔƃɔɔ ka, nii pɛɛ lɛ ná tuoi zu!”

⁴⁸ Nataania ɣɛ ma, “È kẁɛ̃ɛni ɣɛ le?” Ziizɛ gaa woteni zéea é ɣɛ ma, “Fele ɔ́ vɛɛ è lilisu, na ɣa ga è ɣɛi ma gɔɔva wului wu, gè è vɛtɛni.”

⁴⁹ Nataania gaa wote zéea é ɣɛ ma, “Kala‐mɔi, yà ɣa è ga Gala dui! Yà ɣa è ga Yezɔi masagi!”

⁵⁰ Ziizɛ goi ɣaa wote é ɣɛ ma,“?È siɣia ga gaama kɛ̀ɛ ʋai ma è ma, ‘Gè wɛlɛni yìɛ gɔɔva wului wu?’ Yà vaazu wɛlɛzu faa ƃaaza ba é leve niitiɛ va.”

⁵¹ Ziizɛ ɣɛ tea, “Gè bo wiɛ ga gaama, wa wɛlɛ Gala ta va ná laa laogɛi Gala na keelaitiɛ tiɛ lɛ tiɛ yii vɛ nu ƃuse lui na.”