GALEESIAITIƐ 1 - DEƲE NIINƐI

Daali‐mai

¹ Nài gè ga Pɔɔ, gà ga Ziizɛ na keelai ta. Ɛ́ lɛ ga nu ƃuse ɣa é kɛ̀ɛ ga ta ɔ́ nɔ ɣɛ ga é ɣɛ nu ta zaala zu. Kɛ̀ kɛ̀ɛvɛ ga ta Ziizɛ Kolai zaala zu ta de ɣeea Gala nii é Ziizɛ wu ziɣini saa ya.

² Bàitiɛ ɣaazɔ gá tiɛni gé vɛ te vɛɛvɛ bà gíɛ kɔlɔi nii wonɛ Galeesia Ɣala pɛlɛitiɛ wɔ.

³ Gaazu‐maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta de maliɣii Ziizɛ Kolai ta ɣɛ wo ʋaa ma fãa.

⁴ Ziizɛi nii ɣa é ɣi kuloni ƃɔɔ zu da ʋaa yowũitiɛ ʋaa zu, kɛɛ ʋaa ma é de wulo zei‐za ŋeteai zu luƃo vele yowũi zu de ɣeea Gala zii‐mai mavele ma.

⁵ De ɣeeai nii ɣa saala ɣa la ma wɔlɔ‐wɔlɔ ta wɔlɔ‐wɔlɔ. Na nɔ yá ɣɛ.

Woo niinɛ vagɔi ɣa nɔ ɣilekpu

⁶ Piligɛ mà ga ki‐gaa‐ziɛ ga velei wo yee wulozu la nui nii maʋaa zu ga maa ʋilea é wo liliga Kolai na maa‐wõi‐ɣaa ƃɔ‐bai zu wiɛ wui to woo niinɛ vagɔ ta ƃɔnɔ ma.

⁷ To mu ɛ́ lɛ ga woo niinɛ vagɔ ta ƃɔnɔ ka na. Kɛ̀ nui taniga ɣa te na tiɛ wo yii wu ziɣi tiɛ wõi ɣɛ ga te Kolai mawoo niinɛ vagɔi maa wote.

⁸ É ɣɛni ga gé ta, ƃaa Gala ta ɣeela ta ƃalaa ɔ́ wulo na gee wɔlɔgi zu é va é woo niinɛ vagɔ ta ƃɔnɔ bo wiɛ maa ʋeligɛi nii va gé boga wo ma, pagɛ koto ɣɛ bá.

⁹ È ɣɛ velei nɔ gé boga la vele nɔ na kɔnɔ gè bosu la. Ani nu ta nɛpɛ ka woo niinɛ vagɔ ta wosu wo ma maa ʋeligɛi nii va wo maa zɔlɔ woga, pagɛ koto ɣɛ manui va.

¹⁰ ?Nu ƃuse na to‐pulu ɣa gè gaa ziɛzu ʋaa ve, ƃaa Gala na to‐pulu ɣa gè gaa ziɛzu? ?Ɔɔ gà pele ɣaa ziɛzu ga gè nu ƃuse yii la ʋaa ve? È ɣɛ gè ɣɛni dɛ nɔ nu ƃuse yii laazu, gɛ̀ lɛ ƃega ɣɛ ga Kolai na tii‐ɣɛɛ nu.

Pɔɔ ɣɛɛ ʋai ga Ziizɛ na keelai

¹¹ Nà numaa, kɛni gà kɛ wo kwɛ̃ɛ ga woo niinɛ vagɔi gè boni ɛ́ lɛ ga nu ƃuse yaa ʋaa mawoo niinɛ vagɔ.

¹² Ƃɔvɛlaale gɛ̀ lɛ maa zɔlɔ woni nu ƃuse ya ɔ́ nɔ ɣɛ ga nu dɛ gàazu. Kɛ̀ gè maa zɔlɔ woni Ziizɛ Kolai wulo vele ma kɛnɛ ma gàazu.

¹³ Toku ge zei ga wo faa mɛniga é vile tùo velei va wɔlɔ é ɣɛ Dusi yekegi zu. Na ɣa ga velei gè Gala na pɛlɛi ƃɔɔlani la ga ná ŋala‐ŋala pele gìɛ ɣaa ƃaa ga gè su ŋala‐ŋala.

¹⁴ Tɔwɔ gwàla lɛi ɣɛ Dusi yekegi zu é leve tìi‐tií tamaa va gá numaitiɛ zaama. Vele ɣa na gwàla wɔɔlɔi ɣe la màma gwɔlɔni te yaa ʋaitiɛ zu.

¹⁵ Kɛ̀ nui nii é kùloni su leelaa é ziɣi ƃɔɔ kàa ʋolo ma é zɛba wɔnɔ é tìli ná maa‐wõi‐ɣaa ƃɔ‐bai mavele ma,

¹⁶ tei ná zíi laani ga é dúi wulo kɛnɛ ma gàazu kɛɛ ʋaa ma gè mawoi wo zii ƃalaagitiɛ ma, gɛ̀ lɛ sa tɛnɛ goo ɣaa ziɛni nu ƃuse la,

¹⁷ ɔ́ nɔ ɣɛ ga gè li Yɛlusulɛɛ niitiɛ wɔ vɛ te ɣɛɛni ga Kolai na keelaa gɔ̀ teɣa ɣɛ ɣɛɛzu ga ta. Kɛ̀ gè ziɣini na gè li Aleebia yui zu, gè gale kɔnɔ ma gè li wulu Dimasikɔ lai zu.

¹⁸ Tei sa kwena saagɔ leveni, gè liini Yɛlusulɛɛ ga gè laali Siifɛ ma, na ɣa ga Pite. Gá tɔ gé kɛɛni na ga folo puugɔ kai loolu.

¹⁹ Kɛ̀ é wulo Pite wulu gɛ̀ lɛ wɛlɛni Ziizɛ na keelai zɔitiɛ ta nɛpɛ ba. De maliɣii deɣei Jĩi ɣa gè pɛtɛni.

²⁰ Nii gè ponɛzu wo wɔ, gà bosu Gala gaazu ga gɛ̀ lɛ zɛɛ ʋaa wosu su.

²¹ Gè liini sa ɣɛ Siilia ligi zu ta Seliisia.

²² Tɔwɔ Kolai na Gala pɛlɛitiɛ te Yudiiya yui zu te wu veaitiɛ tɛ lɛ ŋɛni dɛ kẁɛ̃ni ga gàazuvɛ.

²³ Woi nɔ te mɛnini é vile bà é ɣɛni ga “Nui wɔlɔ é de ƃɔɔlani tɔ sa Gala goo wosu é vile Gala zekegi nii va é ɣaa ƃaani wɔlɔ ga é kãla‐ŋala.”

²⁴ Te Gala daa maa lɛɛni sa màzaƃu ma.