2 PITE 1 - DEƲE NIINƐI

Daali‐mai

¹ Nài gè ga Simiã Pite, gè ga Ziizɛ Kolai na tii‐ɣɛɛ nu gè ga ná keelai ta, gà kɔlɔi nii wonɛzu wo wɔ, wai zee‐la‐ma liigoi é gé ya wo tiigo maa zɔlɔ woga da Ɣalagi nii é ga de maliɣii Ziizɛ Kolai na tele‐bo tuoi maa vele ma.

² Maa‐wõi‐ɣaa ƃɔ‐bai vɛɛ zii‐laa va te zu ɣa wɔɔlɔ ma wo ya fãa Gala kpɔga de maliɣii Ziizɛ te maʋaa ɣaa‐ɣai zu.

Wa lili fai ta wo wulo ʋai

³ Ná Gala gaa‐ƃai ʋaa bu de ŋɛni ɣaazɔ maa zɔlɔ wo pilegɛi zɛʋu va ta Gala tuo‐wogai. Nii ɣɛɛvɛ nui nii maʋaa ɣaa‐ɣai zaala zu nii é de liliga kpɔɔ zaala‐malai ma ta maʋai nii gwala vagɛi.

⁴ Nii zaala zu ɣa é tɔnɔ‐ba ɣi‐to gwalaitiɛ laa ziitia la de ma, kɛɛ ʋaa ma wo wulo su‐ƃɔnɔ‐wo fai yee wu ŋɛni‐wõi‐leve‐mai kɛɛ é ɣɛ ŋeteai nii zu, na ɣa ɣɛɛ na velei Gala ge la wo wɔɔ laa ɣɛ maʋai va.

⁵ Nii ƃɔɔƃɔɔ mazaƃui ma, a ɣaa ƃaa ga pelei ɣaazɔ wo wa yee‐la‐mai laa wulo ga faa vagɔ‐ɣɛɛ. A faa vagɔ‐ɣɛi laa wulo ga faa‐ɣaa‐ɣaa,

⁶ wo faa‐ɣaa‐ɣai laa wulo ga ƃɔɔ zu‐zoga faa ma, wo zu‐zo‐faa‐mai laa wulo ga loga‐kpãa, wo to‐kpãagi laa wulo ga Gala tuo‐woga.

⁷ A Gala tuo‐wogai laa wulo wɔnɔ ga lua ga ɣiini è ɣɛ velei leɣe ƃɔga liɛ ta ɣiini maa‐wõi zo da. Leɣe ƃɔga liɛ te ɣiini maa‐wõi‐zo tuoi wɔ, wo nà laa wulo ga wõila.

⁸ Su‐wulo‐zu ɣa ga ani ŋɛnii niitiɛ ta ga wo wo te lamai wo ya, ta wo ƃe teve ɣɛɛ va ga nui kɛɛ ʋaa lɛ ɣɛɛ ma ta nui tɔnɔ lɛ ɣɛɛ ba de maliɣii Ziizɛ Kolai maʋaa ɣaa‐ɣai zu.

⁹ Toku ge zei ga nui nɛpɛ ŋɛnii niitiɛ valagɛi ma, manui ɣaazu wuuvɛ é ga nui ɛ́ lɛ faa yɛga põo ɔ́ maa ƃɛɛ. Na ɣa ɣɛɛ na manui yeemaa ga ná faa yowũ wɔlɔ‐zaɣagi wuovɛ ma.

¹⁰ Na ma, nà numaa, a wɔɔlɔ maʋai wala zu kɛɛ ʋaa ma tiligi bogɛi ga wiɛ ta wo wuloi bogɛi, wo ná wulu ƃaa. Ƃɔvɛlaale wa nii ɣɛɛ na, wɛ lɛ wɔlɔ‐wɔlɔ loa.

¹¹ Nii mavelei ma pelei nii yá li de maliɣii na masadai nii zu kwɛ̃ɛ gɛ lɛ ba, na ɣa ga de valo nui Ziizɛ Kolai na masadai, dáa ɣa lao wo luo ga su wɔɔlɔɔ.

¹² Na ma gè kpɛtɛɛ ɣigi zu ga gìɛ wo ɣi too fai niitiɛ zu ga ɣee nɛpɛ, velei ƃalaa wo te wɛ̃ni la, na ɣa ɣɛɛ na wo logɛi kpãa gaamai zu é wo ya.

¹³ Ani nɔ gà dɛ dɔtɔi nii zu, gà ɣi gaa ziɛ ma ga tɔ pele ma ga gìɛ wo yii wu ziɣi wo ɣi‐too vele ma bɛ̀ ná zu.

¹⁴ Ƃɔvɛlaale gè kwɛ̃ni ga kùlo ʋai dɔtɔi nii zu su lɛ sa woozani, è ɣɛ velei de maliɣii Ziizɛ Kolai dɛɛ la gàazu.

¹⁵ Tɔwɔ gà wɛlɛ na va ga gà ziɣi na ŋetea, wo zoo wo fai niitiɛ laa‐zu ɣɛ ɣi su ga siɛ nɛpɛ.

Tai te ɣaazu lɔɔ Kolai na saala‐malai zu

¹⁶ Ƃɔvɛlaale tei gé ɣɛni de maliɣii Ziizɛ Kolai na gaa‐ƃai ƃɔga páa ʋài te maʋaa ɣaa wodozu ga wiɛ, gɛ́ lɛ kɛɛni ga gbana wele‐too vele. Kɛ̀ gé ɣaazu lɔɔni ná bɔɔlɔlai zu.

¹⁷ Toku ge zei ga tei ƃaa‐la‐ma ƃɔga saala‐mala é te maa zɔlɔ woni de ɣeea Gala zeea, woi ziitini ma Gala na bɔɔlɔlai mazaala‐mai zu yíɛ ɣɛ tea, “Nii ɣa é ga ẁõila lui, nii zìi lai maʋai vɛ.”

¹⁸ Woi nii wuloni gee wɔlɔgi zu gé mɛni, ƃɔvɛlaale gé ɣɛni bá gizigi nii ma kuloai su ga tee Gala faa ma.

¹⁹ Nii ɣaazɔ dɛɛ sa ga diɛ ga kpaanaga ga Gala daa woo‐wo beaitiɛ woi ɣa ga gaama. Towaa ɣɛ ga faa vagɔ wo ʋaa ma ga wo wui to woi nii ma ga towa maʋaa wuloai ga labo ɣa ɣɛ ʋolozu ŋada ƃidi zu é yɛsu gela bo, gusu zɔmɔ dekai wulo sa é wo ɣi daa wodo.

²⁰ Mamaa wũgi pa kɛni wo nii ɣaa ɣa. Na ɣa ga Gala daa woo‐wo fai Gala kɔlɔi zu ɛ́ lɛ ga fai nu ɣa kɛ ga ƃɔɔ woo,

²¹ ƃɔvɛlaale Gala daa woo‐wo fai maʋaa ta lɛ dɛ wɔlɔ‐wɔlɔ ɣɛɛni ga nu ƃuse na deʋe. Kɛ̀ Gala baa ŋinɛgi ɔ́ numaa yii wu ziɣi tiɛ woi nii wo ɔ́ wulo Gala da.