2JƆ̃ 1 - DEƲE NIINƐI

Daali‐mai

¹ Nài gè ga Gala pɛlɛ lo‐tuoi gà kɔlɔi nii wonɛzu è wɔ, yài è ga dee nui nii Gala zee ƃakogɛi bá è vɛɛ è leaitiɛ va. Wa ɣa gè wo wõini gaamai mavele ma. Ɛ́ lɛ nɔ ga nà ɣilekpu, kɛ̀ taitiɛ te gaamai wɛ̃ni te vɛɛvɛ bà ƃalaa pɛ.

² Toku ge zei gaamai va katagɛi de ɣigi zu. Towaa yɛ de ɣigi zu wɔlɔ‐wɔlɔ ta wɔlɔ‐wɔlɔ.

³ Maa‐wõi‐ɣaa ƃɔ‐bai vɛɛ gaazu‐maa‐wõi‐ɣaa va ta zii‐lai yá wulo de ɣeea Gala zeea ta Ziizɛ Kolai nii é ga de ɣeea Gala dui ta ɣɛ de ʋaa ma gaamai zu ta wõilai.

A ɣata Kolai na kala‐bogi ʋaa va

⁴ Gè kuu‐zu‐nɛɛ wuloni ga kpakpaa kwɛ̀lɛ ʋai ma na va ga è lui taniga ta gaamai wulu, è ɣɛ velei nɔ de ɣeea Gala ge deʋea la é da de ya.

⁵ Na ɣa ɣɛɛ na, ŋàzá nu, gà bosu yìɛ ga maa‐nɛɛnɛ pele ga è fai nii ɣɛ. Ɛ́ lɛ ga tɔ niinɛ ɣa gè ponɛzu gè da è ya, kɛ̀ nii veede de maa zɔlɔ woni é ziɣi ƃɔɔ tɔɔ‐zei ʋolo ma. Na ɣa ga de wõi ga ɣiini.

⁶ Nii wɔ ka é ga wõilai. Na ɣa ga de vile Gala na tɔgi laa woi wulu. Nii ɣa é ga tɔgi, è ɣɛ velei wo mɛniga la wɔlɔ é ziɣi tɔɔ‐zei ʋolo ma. Na ɣa ga wo vile wõila wulu.

⁷ Ƃɔvɛlaale nu ɣaa‐wɔlɔ bea lamaa vilegɛ zui zu. Ta ga numaitiɛ tɛ lɛ kɛɛ tɔ laa wu ziɣi Ziizɛ Kolai vaa ʋai ma nu ƃuse lɔtɔi zu. Nà ɣavele nui ɣa ga nu ɣaa‐wɔlɔ nu é ga Kolai wɔɔ yɔ̃wɔ.

⁸ A ƃɔɔ wũ maazu vɛtɛ ga wo mɛ lɛ vala nii ma wo maa lii ɣɛɛ, kɛ̀ to mu wo su‐lɔnɔ maa zɔlɔ wo ga daa‐ʋega.

⁹ Nui nɛpɛ yá li nɔ ga wũ maa vele lɛ ɣatani Kolai na kala‐bogi va, Gala fai lɛ ɣɛɛ manui va. Nui nɛpɛ yá ɣata Kolai na kala‐bogi va, de ɣeea Gala pɛ, dúi pɛ, ta ɣɛ zíi zu.

¹⁰ Ani nu ta nɛpɛ ka vaa na wo wɔ ɛ́ lɛ vaani ga kala‐bogi nii, a mɛ lɛ daa‐zu vɛɛ ɔ́ nɔ ɣɛ ga wo túo pele mazii ta nɛpɛ su.

¹¹ Ƃɔvɛlaale nui yá túo manui wɔɔ‐laa‐loa ɣa na ná tuƃo‐vele‐yowũ‐wuloai va.

Daali‐ma ɣaa‐ƃelagi

¹² Velei ƃalaa faa lamai la na ga gè ponɛ wo wɔ, pagɛ to mu gè ƃe tii‐ɣɛɛ ʋai va ga kɔlɔ wele ta kɔlɔ‐wonɛ yiɛ. Kɛ̀ nà mu kì ka na ga gè va gè wɛlɛ wo va a de yɛpɛ ɣii wɔ ɣaazu ma, kɛɛ ʋaa ma a da wuu‐zu‐nɛi maʋaa wolo wulu ma.

¹³ È wɔɔ ŋaza nui nii Gala zee ƃakogɛi bá, déaitiɛ te è luoni.