1JƆ̃ 1 - DEƲE NIINƐI

Zɛʋui mawoi

¹ Fai nii ɣɛni ŋetea é ziɣi tɔɔ‐zei ʋolo ma. Gé mɛnini gé wɛlɛ bá ga ɣaazu. Gé pɛtɛni gé yee ʋowũ ba. Pilegɛ zeʋui mawoi va.

² Zɛʋui maʋaa wuloni kɛnɛ ma gé wɛlɛ bá gíɛ mazeele woo ʋe. Na ɣa ɣɛɛ na zɛʋui nii kwɛ̃ɛ gɛ lɛ ba, gá maʋaa wosu wiɛ ga woo maa zeezea. Towa é ɣɛni de ɣeea Gala ba máʋai wulo kɛnɛ ma gé ɣaazu.

³ Nii gé mɛniga gé pɛtɛ towa gé bosu wiɛ ƃalaa pɛ, kɛɛ ʋaa ma a da wani de ɣɛ siɛ‐pulu zu. Tɔwɔ da de ɣeea Galani ka de siɛ‐pului zu é vɛɛ dúi Ziizɛ Kolai va.

⁴ Gá nii wonɛzu wo wɔ kɛɛ ʋaa ma gá wuu‐zu‐nɛɛ‐wuloai maʋai wolo wulu ma ƃɔɔ kpowũ.

Gala ka ga ŋada wodoa

⁵ Keela woi nii ɣa gé mɛnini Gala dui la gé bo wiɛ ga woo maa zeezea. Na ɣa ga Gala ka ga ŋada wodoa. Ŋada ƃidi ʋaa ta nɛpɛ gɛ lɛ maʋai va.

⁶ Ani da bo na ga da tiɛni da siɛ‐pulu zu, tɔwɔ diɛ ziɛ kpidii zu, a kɛ tii da zɛɛ ʋaa wosu.

⁷ Kɛ̀ ani da ɣɛ na ziɛzu ŋada wodoai zu è ɣɛ velei é la ŋada wodoai zu, de ɣile‐giledai da ɣɛ siɛ‐pulu zu. Na ɣa ɣɛɛ na dúi Ziizɛ Kolai maŋamai ɣa faa yowũ ɣaazɔ wuo de ma.

⁸ Ani da bo na ga faa yowũ lɛ de va, da ɣɛ ƃɔɔ ɣaa wɔlɔsu, gaamai lɛ ɣɛɛ de yii zu.

⁹ Ani da laa wu ziɣi na da ʋaa yowũitiɛ ma de bo, tɔ ga nui nu ɣa laa la, tele bogɛi. Towaa da ʋaa yowũitiɛ zu ʋaa yɛ é de wulo da lele‐bo tala luoi ɣaazɔ zu.

¹⁰ Ani da bo na ga dɛ lɛ faa yowũ ɣɛɛni, a da ɣɛ Gala kɛɛzu ga zɛɛ ʋaa nu. Nà wɔ ka ɣɛɛ na, gói ɣa na lɛ ɣɛɛ de ɣigi zu.