1KƆLĨITIƐ 1 - DEƲE NIINƐI

Daali‐mai

¹ Nai gè ga Pɔɔ, tìligɛi Gala zii‐mai mavele ma ga gè ɣɛ ga Ziizɛ Kolai na keelai ta, a de wɔi Sɔsitɛni vɛɛvɛ bà,

² gíɛ kɔlɔi nii leve Gala na pɛlɛi wu veaitiɛ wɔ te Kɔlĩ lai zu. Tɔ numai niitiɛ ʋaa ma te wuloai su ga tee Gala faa ma te ɣɛɛ vele ma su ɣilekpu ta Ziizɛ Kolaini, te liligɛi ga te vɛɛ numai zɔitiɛ ɣaazɔ va te ɣɛ ga Gala na dɔ numaa. Na ɣa ga niitiɛ ta ɣɛ ŋada mazii ta nɛpɛ tiɛ de maliɣii Ziizɛ Kolai laa lili, Ziizɛ Kolai nii é ga te maliɣi é wɔnɔ ga de maliɣii.

³ Gaazu‐maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta de maliɣii Ziizɛ Kolai ta ɣɛ wo ʋaa ma fãa.

Gala mama‐fee ʋai baa ŋinɛgi na faa‐nɛi ʋaa ma

⁴ Gà nà Galagi mamasu wo ʋaa ma ga ɣee nɛpɛ toku ge zei ná maa‐wõi‐ɣaa ƃɔ‐bai va é boga ga wiɛ wo ɣɛɛ vele ma su ɣilekpu wa Ziizɛ Kolaini.

⁵ Gà mama feezu bɛ́ ƃɔvɛlaale é kuu nɛɛ wo ma pelei ɣaazɔ zu wɔnɔ wo ɣɛɛ vele ma su ɣilekpu wa Kolaini. É kuu nɛɛ wo ma faa‐zu‐wulo faa ɣaazɔ zu é nɛɛ wo ma faa‐ɣaa‐ɣaa ʋaa ɣaazɔ zu.

⁶ Seele woi gé feeni Kolai maʋaa ma, vele ɣa na maa viini la wo zaama.

⁷ Na ma wa ɣɛ na ná maa kpowũsu ga de maliɣii Ziizɛ Kolai wulo kɛnɛ ma, Gala baa ŋinɛgi na faa‐nɛi mavala ta nɛpɛ gɛ lɛ wo ma.

⁸ De maliɣii Ziizɛ Kolai ɣa yee ka wo va kpãa é yɛsu wo ziiti daa‐wulo‐zuvɛ, ná kui ɣa ziiti na é faa ziɣi wo va.

⁹ Gala ka ga nui nu ɣa laa la. Towaa é wo liliga wo ɣɛ dúi Ziizɛ Kolai na siɛ‐pululai zu, Ziizɛi nii é ga de maliɣii.

Gaa‐wɛɛ ʋai Gala pɛlɛi wu

¹⁰ Nà numaa, gà daazu wiɛ de maliɣii Ziizɛ Kolai na daa‐zeigi mavele ma ga wo ɣaazɔ wo woo la ma, goo ɣaa laɣa‐laɣa ge mɛ lɛ ɣɛ wo zaama. Kɛ̀ to mu wo ƃɔ su ki‐gaa‐ziɛ gilagi zu wa ɣi‐gaa‐ziɛi nɔ ɣilekpu.

¹¹ Nà numaa, Kelooɣii na numaitiɛ te boga mà ga wa ƃɔɛzu.

¹² Nii gè bosu tɔ ga wo ɣile‐giledai wa ɣɛɛzu tea, “Gà ga Pɔɔ wulu nu,” ta yìɛ ɣɛ tea, “Gà ga Apɔɔla wulu nu,” ɔɔ “Gà ga Siifɛ wulu nu,” ƃaa “Gà ga Kolai wulu nu.”

¹³ ?Kolai ɣaa wɛi ɣa bogɛi ʋaa ve? ?Te Pɔɔ ƃakoni wo ʋaa ma? ?Ɔɔ te bataize ɣɛɛni ga wiɛ Pɔɔ na daa‐zei su?

¹⁴ Gala mama ga tei gɛ̀ lɛ bataize ɣɛɛni ga wo ta nɛpɛ é wulo Kolisipɔ wulu ta Geea,

¹⁵ nu ta mɛ lɛ va bosu ga bataizei ɣɛɛni ga wiɛ nà daa‐zeigi zu.

¹⁶ To mu gè bataize ɣɛɛni wɔnɔ ga Setiifana wɔ pɛlɛ wu veaitiɛ. É wulo na wulu gɛ̀ lɛ kwɛ̃ni ga ani gè bataize ɣɛɛni ga nu ƃɔnɔ.

¹⁷ Ƃɔvɛlaale Kolai lɛ tèveni ga gè bataize ɣɛ, kɛ̀ é tèveni ga gè woo niinɛ vagɔi wo. Tɔwɔ ɛ́ lɛ ga gè kɛ ga daa‐ɣele‐kɛ‐ba ɣele‐ɣele, Kolai ƃako gului maɣaa‐ƃai mɛ lɛ ƃea ba ɔ́ yɛ ga mayãka.

Kolai ɣa ga Gala na gaa‐ƃai ta ná kele‐ɣelegi

¹⁸ Ziizɛ ƃako gului mawoi ɣa ga titi faa numai niitiɛ ɣaazu te zu vaazu ƃɔnɔ wosu. Kɛ̀ daitiɛ de vaazu valozu tɔ de ɣaazu ga Gala na gaa‐ƃaa.

¹⁹ Ponɛvɛ Gala kɔlɔi zu Gala giɛ ɣɛ tea, “Gà kele‐ɣele beaitiɛ ta ɣele‐ɣele tuoi zu ŋala‐ŋala, na ɣa ɣɛɛ na gè ƃesa gbana veaitiɛ ta gbana luoi zu gè maʋaa ɣɛ ga faa yãka.”

²⁰ Minɛ mu ka sa kele‐ɣele nui na? Minɛ ɣa kɔlɔ‐wɛ̃ɛ nui na? Zaa ŋeteai zu ɣele‐ɣele faa‐zu‐wulo nui ɣa minɛ? Kɛ̀bɛ Gala ge ŋeteai nii zu ɣele‐ɣele fai ɣɛɛ ga titi faa, kɛlɛɛ?

²¹ Su‐wulo‐zu ɣa ga tei tɔwɔ ŋeteai nii zu ɣele‐ɣelegi lɛ zooni ɔ́ kɛ nu ƃuse ɔ́ Gala kwɛ̃ɛ ná kele‐ɣelegi mavele ma, é Gala zii laani ga titi goi nii gé bosu taitiɛ ta siɣi ga gaama é maveaitiɛ valo.

²² Dusiitiɛ ta faaniga maa lili bosu ga maʋaitiɛ te ɣɛ ga seelea, Geliikiitiɛ wɔ tiɛ kele‐ɣele gaa ziɛ.

²³ Da wɔ diɛ Gala goi wo pilegɛi Kolai na kpako fai va gului ma. Kpesagɛ Dusiitiɛ luo ga kɔɔwɔ é ga titi faa zii ƃalaagitiɛ ɣaazu.

²⁴ Kɛ̀ niitiɛ te liligɛi Dusia zu ta Geliikia, Kolai ɣa é te ɣaazu ga Gala na gaa‐ƃai ta ná kele‐ɣelegi.

²⁵ Ƃɔvɛlaale Gala zeea liti fai ɣa ga kele‐ɣele faa wala é leve nu ƃuse na kele‐ɣele ba, nii é zéea ga fii‐ƃɛɛ ʋaa nà ɣee ɣaa ƃai é leve nu ƃuse na su‐ƃaa va.

²⁶ Nà numaa, a ɣi gaa ziɛ wo lili fai ma. Ɛ́ lɛ ga wo lamaa wo ɣɛni ga numai niitiɛ nu ɣa te ziɣi ga ŋeteai nii zu ɣele‐ɣele bea. Ɛ́ lɛ ga gaa‐ƃaa ƃakpa ɣa bogɛi ɣɛ wo lamaa wo ya. Ɛ́ lɛ wɔnɔ ga wo lamaa wo ɣɛɛ ɣa bogɛi ɣɛ ga nu ɣaa wua lea.

²⁷ Kɛ̀ Gala ge yee ƃadoni nii va é ga titi faa ŋeteai nii zu ga é wũfe pili kele‐ɣele bea ma. Gala ge yee ƃadoni wɔnɔ fai nii va é ga fii‐ƃɛɛ ʋaa ŋeteai nii zu ga é wũfe pili su‐ƃaa vea ma.

²⁸ Gala ge yee ƃadoni nii va maʋaa loai bu ŋeteai nii zu, numaa ɣaazu wudɛgɛi maazu. É yee ƃadoni ƃalaa ʋɔlɔ ŋɛnii niitiɛ va tɛ lɛ ŋetea, kɛɛ ʋaa ma ŋɛnii niitiɛ te ŋetea é te maʋaa ɣɛ ga faa yãka.

²⁹ Nii ɣɛɛni ga nu ƃuse ta nɛpɛ ge mɛ lɛ yoka teve Gala gaazu.

³⁰ Towaa é ga wo yɛʋui lo‐kala‐suvɛ wo ɣɛɛ vele ma su ɣilekpu wa Ziizɛ Kolaini, nii é kɛɛ ga da ɣele‐ɣelegi. Kele‐ɣelegi ɣa ga da lele‐bo tuoi é ga de wuloi bogɛi su leelaa ga ná numaa sáala zu. Tɔ wɔnɔ ga de wũ‐maa‐wogi bogɛi sáala zu.

³¹ Na ma è ɣɛ velei ponɛi la Gala kɔlɔi zu, “Nui nɛpɛ yá ɣɛ é yoka teve, maa nɛɛvɛ é de maliɣii mayoka teve.”