Spreuke 31 - Die Bybel 2020-vertaling

Uitsprake van Lemuel

¹ Die woorde van Lemuel, 'n koning. 'n Uitspraak van God waarmee sy moeder hom opgevoed het.

² Moenie, my seun, ja, moenie, seun van my skoot, ja, moenie, seun van my geloftes,

³ moenie aan vroue jou lewenskrag bestee nie, of jou paaie daarop rig om konings uit te wis nie.

⁴ Dit is vir konings nie gepas nie, Lemuel, dit is vir konings nie gepas om wyn te drink nie, vir hooggeplaastes om te wees waar daar sterk drank is nie.

⁵ Anders drink hy, en vergeet wat as voorskrifte neergelê is, en skend hy die regte van al die magteloses.

⁶ Gee sterk drank aan die een wat ten gronde gaan, en wyn aan mense met verbitterde siele.

⁷ Laat hy drink en sy armoede vergeet, sy swaarkry nie meer onthou nie.

⁸ Maak jou mond oop vir die stemlose, vir die regsaak van almal wat wegkwyn.

⁹ Maak jou mond oop, oordeel regverdig, en handhaaf die reg van die magtelose en behoeftige.

Loflied oor 'n knap vrou א ALEF

א ALEF

¹⁰ 'n Knap vrou, wie sal haar vind? Ver bo korale is haar waarde.

ב BET

ב BET

¹¹ Die hart van haar man vertrou op haar, en aan besittings sal dit hom nie ontbreek nie.

ג GIMEL

ג GIMEL

¹² Sy doen goed aan hom en nie kwaad nie, al die dae van haar lewe.

ד DALET

ד DALET

¹³ Sy soek wol en linne uit, en werk met ywerige hande.

ה HE

ה HE

¹⁴ Sy is soos die skepe van 'n handelaar, van ver af bring sy haar brood in.

ו WAW

ו WAW

¹⁵ Sy staan op terwyl dit nog nag is; sy voorsien voedsel vir haar huisgesin, en porsies vir haar diensmeisies.

ז ZAJIN

ז ZAJIN

¹⁶ Sy dink na oor 'n stuk grond en koop dit; met die verdienste van haar hande plant sy 'n wingerd.

ח GET

ח GET

¹⁷ Daadkragtig omgord sy haar heupe; sy steek haar hande uit haar moue.

ט TET

ט TET

¹⁸ Sy merk dat sy goeie wins maak; snags gaan haar lamp nie dood nie.

י JOD

י JOD

¹⁹ Sy steek haar hande uit na die spinstok, en haar handpalms hou die spoel vas.

כ KAF

כ KAF

²⁰ Haar handpalms strek sy uit na magteloses; haar hande steek sy uit na behoeftiges.

ל LAMED

ל LAMED

²¹ Sy is nie bekommerd oor haar huisgesin wanneer dit sneeu nie, want haar hele gesin is geklee in karmosynrooi weefstof.

מ MEM

מ MEM

²² Sy maak vir haar dekens; haar bokleed is van linne en purperrooi wol.

נ NUN

נ NUN

²³ Haar man is bekend in die stadspoorte wanneer hy saam met die oudstes van die land sit.

ס SAMEK

ס SAMEK

²⁴ Sy maak klere van linne en verkoop dit; gordels lewer sy aan die handelaars.

ע AJIN

ע AJIN

²⁵ Krag en luister is haar bokleed; sy lag onbesorg oor die toekoms.

פ PE

פ PE

²⁶ Haar mond maak sy oop met wysheid, en liefdevolle onderrig is op haar tong.

צ TSADE

צ TSADE

²⁷ Sy hou haar oog op die werk in haar huis; brood van luiheid eet sy nie.

ק KOF

ק KOF

²⁸ Haar kinders tree na vore en noem haar gelukkig; haar man, hy besing haar lof:

ר RESJ

ר RESJ

²⁹ “Baie vroue het hulle knap gedra, maar jy, jy oortref hulle almal.”

שׁ SJIN

שׁ SJIN

³⁰ Sjarme is bedrieglik en skoonheid is nietig; 'n vrou wat vir die Here ontsag het, sy moet geprys word.

ת TAW

ת TAW

³¹ Gee aan haar 'n deel van die vrug van haar hande; mag hulle haar in die stadspoorte vir haar dade prys!