Psalms 62 - Die Bybel 2020-vertaling

¹ Vir die •musiekleier. Op Jedoetoen. 'n Psalm. Van Dawid.

² Net by God vind ek rus; van Hom kom my verlossing.

³ Net Hy is my rots, my verlossing, my toevlugsoord; ek sal beslis nie wankel nie.

⁴ Hoe lank nog gaan julle 'n man bly aanval, vermoor julle almal hom – asof hy 'n muur is wat oorhel, 'n tuinmuur wat omgestoot word?

⁵ Ja, hulle beplan om hom af te stoot van sy hoë plek, hulle hou van leuens. Met die mond seën hulle, maar in hulle binneste vloek hulle. •Sela

⁶ Vind rus by God alleen, my siel, want op Hom is my hoop gevestig.

⁷ Net Hy is my rots, my verlossing, my toevlugsoord. Ek sal nie wankel nie.

⁸ By God lê my verlossing, my eer. My sterk rots, my skuilplek, vind ek in God.

⁹ Vertrou te alle tye op Hom, o volk, stort julle hart voor Hom uit. God is vir ons 'n skuilplek. Sela

¹⁰ Net 'n asemteug is die mens, onbetroubaar is mense; op 'n skaal weeg hulle byna niks, saam is hulle ligter as 'n asemteug.

¹¹ Moet op afpersing nie staatmaak, op plunder julle ydele hoop nie vestig nie. Rykdom, as dit toeneem – moet julle hart nie daarop sit nie.

¹² Een saak het God bevestig, twee, wat ek gehoor het: Krag is by God;

¹³ by U, my Heer, is daar troue liefde, want U self beloon 'n mens volgens sy dade.