Psalms 130 - Die Bybel 2020-vertaling

¹ 'n •Pelgrimslied. Uit die dieptes roep ek na U, Here.

² My Heer, hoor tog my stem, laat u ore aandagtig luister na my smeekbedes.

³ As U sondeskuld toereken, Here – my Heer, wie kan dan staande bly?

⁴ Maar by U is daar vergifnis, sodat U ontsag afdwing.

⁵ Ek wag op die Here; my hele wese wag, en op sy woord vestig ek my hoop.

⁶ My hele wese wag op my Heer, meer as wagte op die môre, ja, wagte op die môre.

⁷ Israel, vestig jou hoop op die Here; want by die Here is troue liefde, by Hom is volkome bevryding.

⁸ Dit is Hy wat Israel bevry van al sy sondeskuld.