Psalms 126 - Die Bybel 2020-vertaling

¹ 'n •Pelgrimslied. Toe die Here die lot van Sion verander het, was ons soos mense wat droom.

² Daarna is ons monde met gelag gevul, ons tonge met jubelkrete. Toe is onder die nasies gesê: “Die Here het iets groots gedoen aan hierdie mense.”

³ Die Here het iets groots aan ons gedoen. Ons was verheug.

⁴ Verander weer ons lot, Here, soos stroombeddings in die Negev.

⁵ Dié wat met trane saai, sal met jubelkrete maai.

⁶ Die draer van die saadsak wat loop en huil, sal beslis terugkom met jubelkrete terwyl hy sy gerwe dra.