Prediker 11 - Die Bybel 2020-vertaling

Gedig oor risiko's

¹ Stuur jou graan oor die water, want ná baie dae kan jy dit terugkry.

² Gee 'n deel aan sewe, selfs aan agt, want jy weet nie watter ramp op die aarde sal gebeur nie.

³ As die wolke vol reën is, giet hulle dit uit op die aarde; en as 'n boom val, na die suide of na die noorde – waar die boom moet val, daar sal dit val.

⁴ Wie die wind dophou, sal nie saai nie; en wie na die wolke kyk, sal nie oes nie.

⁵ Soos wat jy nie weet watter weg die gees volg in die gebeente binne die buik van 'n swanger vrou nie, net so ken jy nie die werk van God wat alles doen nie.

⁶ Saai in die môre jou saad, en laat teen die aand jou hand nie rus nie; want jy weet nie watter een gaan slaag nie, hierdie of daardie, en of beide goed sal wees nie.

Slotgedig oor jonkwees en die dood

⁷ Soet is die lig; dit is goed vir die oë om die son te sien.

⁸ Ja, as die mens baie jare leef, moet hy hom in hulle almal verheug; maar hy moet onthou dat die donker dae baie gaan wees. Alles wat kom, is sinloos.

⁹ Verheug jou, jong man, in jou jeug; jou hart moet jou vrolik maak in jou jong dae. Volg die paaie van jou hart en waarheen jou oë jou lei; maar weet: Oor al hierdie dinge sal God jou voor die gereg bring.

¹⁰ Weer kwelling uit jou hart en hou lyding weg van jou liggaam, want die jeug en die bloei van die lewe is sinloos.