Jona 2 - Die Bybel 2020-vertaling

¹ Jona het uit die vis se maag tot die Here sy God gebid.

² Hy het gesê: “In my nood het ek na die Here geroep, en Hy het my geantwoord. Uit die ingewande van die •doderyk het ek om hulp geroep, en U het my stem gehoor.

³ U het my in die diepte gegooi, in die hart van die oseane. Seestrome het my omring, al u golwe en branders het oor my gespoel.

⁴ “ Ek self het gedink, ek is weggewerp, onder u oë uit. Maar ek sal weer u •heilige •tempel sien!

⁵ Water het my tot aan my keel omsluit, •oerwater het my omring; seewier het my kop omstrengel.

⁶ Na die basis van die berge het ek afgesak; die aarde – haar sluitbalke was vir altyd toe agter my. “Maar tog het U my lewe uit die grafkuil opgetrek, Here my God!

⁷ Terwyl die lewe uit my vloei, het ek net aan die Here gedink. My gebed het U in u heilige tempel bereik.

⁸ “ Wie nuttelose afgode dien, versaak hulle trou aan die verbond.

⁹ Maar ek, met 'n danklied wil ek aan U 'n offer bring, wat ek beloof het, sal ek betaal. Dit is die Here wat redding bring.”

¹⁰ Die Here het toe die vis beveel om Jona op die droë grond uit te spoeg.