2 Kronieke 11 - Die Bybel 2020-vertaling

¹ Toe Rehabeam in Jerusalem aankom, roep hy die hele huis van Juda en Benjamin byeen – honderd-en-tagtigduisend uitgesoektes wat kan oorlog maak – om teen Israel te veg en die koningskap vir Rehabeam terug te kry.

² Maar die woord van die Here het tot Semaja, die man van God, gekom:

³ “Sê vir Rehabeam, seun van Salomo, die koning van Juda, en vir die hele Israel in Juda en Benjamin,

⁴ ‘So sê die Here: “Julle mag nie optrek nie, en julle mag nie teen julle broers veg nie. Keer terug, elkeen na sy huis, want wat gebeur het, is deur my toedoen. ” ’ ” Hulle het die woorde van die Here gehoorsaam en teruggekeer van die veldtog teen Jerobeam.

Vestingstede van Rehabeam

⁵ Rehabeam het hom in Jerusalem gevestig en dorpe in Juda tot versterkte stede uitgebou.

⁶ Hy het Betlehem, Etam en Tekoa uitgebou,

⁷ ook Bet-Sur, Sogo en Adullam,

⁸ Gat, Maresa en •Sif,

⁹ Adorajim, Lagis en Aseka,

¹⁰ Sora, Ajalon en Hebron. Dit was stede wat versterk is in Juda en Benjamin.

¹¹ Hy het die vestingstede versterk en daarin leiers, voorrade kos, olyfolie en wyn geplaas,

¹² asook grootskilde en steekspiese in elke enkele stad. Hy het hulle tot die uiterste versterk, en Juda en Benjamin het vir hom behoue gebly.

Priesters en Leviete in Juda

¹³ Die priesters en Leviete in die hele Israel het hulle uit al hulle gebiede by hom geskaar.

¹⁴ Ja, die Leviete het hulle meent- en erfgronde agtergelaat en na Juda en Jerusalem gegaan, omdat Jerobeam en sy seuns hulle uit priesterdiens aan die Here uitgesluit het,

¹⁵ en vir homself priesters aangestel het vir die offerhoogtes en vir die •veldgode en die kalwers wat hy gemaak het.

¹⁶ Die Leviete is gevolg deur mense uit al die stamme van Israel wat hulle hart daarop gerig het om die Here, die God van Israel, te soek. Hulle het na Jerusalem gekom om vir die Here, die God van hulle voorouers, offers te slag.

¹⁷ Hulle het die koninkryk van Juda versterk en Rehabeam, seun van Salomo, drie jaar lank ondersteun, omdat hulle vir drie jaar die pad van Dawid en Salomo gevolg het.

Rehabeam se vroue en kinders

¹⁸ Rehabeam het vir hom Magalat as vrou geneem. Sy was die dogter van Jerimot, seun van Dawid en Abihajil, dogter van Eliab, seun van Isai.

¹⁹ Sy het vir hom seuns in die wêreld gebring: Jeüs, Semarja en Saham.

²⁰ Ná haar het hy Maäga, dogter van Absalom, as vrou geneem. Sy het vir hom Abia, Attai, Sisa en Selomit in die wêreld gebring.

²¹ Rehabeam het Maäga, Absalom se dogter, liewer gehad as al sy ander vroue en byvroue. Ja, hy het agttien vroue en sestig byvroue geneem. Hy het agt-en-twintig seuns en sestig dogters verwek.

²² Rehabeam het Abia, seun van Maäga, as hoof en leier aangestel oor sy broers, want hy wou hom koning maak.

²³ Hy was verstandig en het van sy seuns oor al die gebiede van Juda en Benjamin uitgeplaas, in al die stede wat versterk is. Hy het aan hulle kosvoorraad in oorvloed verskaf en 'n menigte vroue vir hulle uitgesoek.