Mateu 4 - Dhiata e Re në Gegnisht

Sprova e Jezusit

¹ Në atë kohë Jezusi u ngjit në shkretinë i shtymë prej Shpirtit të Shenjtë, për me u sprovue prej djallit.

² Agjënoi katërdhjetë ditë e katërdhjetë net e mandej pati uri.

³ Atëherë iu afrue sprovuesi e i tha: «Nëse je Bir i Hyut, urdhno që këta gurë të bahen bukë».

⁴ Por Jezusi u përgjigj e tha: «Asht e shkrueme: Je vetëm prej bukës jeton njeriu, por prej çdo fjale që del prej gojës së Hyut».

⁵ Atëherë djalli e mori në qytetin e shenjtë dhe e vuni mbi kulmin e tempullit.

⁶ Mandej i tha: «Nëse je Bir i Hyut, hidhu poshtë. Asht e shkrueme: Do të urdhnojë për ty engjëjt e vet e do të të mbartin ne duer,, që kamba jote të mos hasë në gur».

⁷ Jezusi i tha: «Ash e shkrueme: Mos e sprovo Zotin, Hyun tand!».

⁸ Rishtas djalli e mori në një mal të naltë dhe i shfaqi të gjitha mbretnitë e botës me lavdinë e tyne.

⁹ E i tha: «Të gjitha këto do të t'i jap, nëse më adhuron me përkulje»

¹⁰ Atëherë Jezusi i tha: «Hiqu, Satan! Ash e shkrueme: Zotin, Hyun tand adhuro e vetëm atij shërbeji».

¹¹ Atëherë djalli e la dhe, ja, iu afruen engjëjt dhe i shërbenin.

Lajmi i mirë

¹² Mbasi ndigjoi se Gjoni ishte dorzue, u tërhoq në Galile.

¹³ E la Nazaretin e u vendue në Kafarnum, pranë detit, në krahinën e Zabulonit e të Neftalimit,

¹⁴ që të plotësohej çka ishte thanë me anë të Isaisë profet:

¹⁵ Tokë e Zabuonit e tokë e Naftalimit, udhës së detit matanë Jordanit Galilea e kombeve,

¹⁶ populli që rrinte në errësinë kundroi një dritë të madhe, atyne që dirgjeshin në vendin e hijen e vdekjes u doli drita.

¹⁷ Qysh atëherë Jezusi nisi me predikue e me thanë: «Pendohuni, se u afrue mbretnia e qiejve».

Thirrja e nxanëseve të parë

¹⁸ Tue shëtitë pranë detit të Galilesë, vrejti dy vëllazën, Simonin e quejtun Pjetër dhe Andrenë, vëllanë e tij, tue hjedhë rrjetat në det. Ishin peshkatarë.

¹⁹ U tha: «Ejani mbas meje e unë do t'ju baj peshkatarë njerëzish».

²⁰ Ata i lanë fill rrjetat dhe e ndoqën.

²¹ Mbasi shkoi tej, vërejti dy vëllazën të tjerë, Jakobin e Zebedeut dhe Gjonin, vëllanë e tij, në lundër, me Zebedeun, atin e tyne, tue arnue rrjetat e veta, dhe i thirri.

²² Ata e lanë fill lundrën dhe atin e tyne dhe e ndoqën.

Takimi me turmat

²³ Ai endej nëpër mbarë Galilenë, tue mësue nëpër sinagogat e tyne, tue kumtue ungjillin e mbretnisë e tue shërue çdo sëmundje e çdo ligësim në popull.

²⁴ Atëherë i doli zani në mbarë Sirinë dhe i sollën të gjithë të lënguemit me sëmundje e mundime të ndryshme, të djallosunit, epileptikët e të paralizuemit dhe ai i shëronte.

²⁵ E ndiqnin turma të shumta prej Galilesë e Dekapojës, prej Jerusalemit e Judesë dhe prej matanë Jordanit.