Mateu 3 - Dhiata e Re në Gegnisht

Kumti i Gjon Pagëzuesit

¹ Në ato ditë u shfaq Gjon Pagëzuesi tue predikue në shkretinën e Judesë.

² Thoshte: «Ndërroni mendje, se asht afrue mbretnia e qiejve!».

³ Ky asht ai për të cilin asht folë me anë të Isaisë profet: Një za buçet në shkretinë: gatitni udhën e Zotit, drejtoni shtijet e tij.

⁴ Ky asht ai Gjoni, që petkun e kishte prej leshit të devesë, me një brez lëkure rreth ijëve. Për ushqim kishte karkaleca e mjaltë të egër.

⁵ Asokohe dilnin tek ai Jerusalemi, tanë Judeja e mbarë rrethina e Jordanit

⁶ dhe pagëzoheshin prej tij në lumin Jordan, tue rrëfye mëkatet e veta.

⁷ Tue pa se shumë farisej e saducej vinin për pagëzimin e tij, u tha: «Pjellë neperkash! Kush ju vuni në dijeni, me i ikë zemërimit që po vjen?

⁸ Prandaj, qitni frytin e denjë të pendimit

⁹ e mos t'ju shkojë mendja me thanë me vedi: "Kemi për atë Abrahamin". Unë po ju them: Hyu mundet me i qitë fëmijë Abrahamit prej këtyne gurëve.

¹⁰ Qysh tash u asht vue sëpata rranjëve të pemëve. Secila pemë që nuk jep fryt të bukur, pritet e hidhet në zjarr.

¹¹ Veçse, unë po ju pagëzoj me ujë, për pendimin, por ai që vjen mbas meje ash ma i fortë se unë e unë nuk jam i denjë as me i heqë sandalet. Ai do t'ju pagëzojë me Shpirtin e Shenjtë e me zjarrm.

¹² Ai e ka në dorë terploten e do ta dlirë lamin e vet. Do ta mbledhë grunin e vet në ahër e bykun do ta djegë në zjarrin e pashueshëm».

Pagëzimi i Jezusit

¹³ Atëherë mbërriti Jezusi nga Galilea në Jordan, te Gjoni, për me u pagëzue prej tij.

¹⁴ Por Gjoni e ndali e i tha: «Unë kam nevojë me u pagëzue prej teje, e ti po vjen te unë?».

¹⁵ Jezusi iu përgjigj: «Prano tash, se ne na takon me plotësue çdo drejtësi». Atëherë ai e pranoi.

¹⁶ Mbasi u pagëzue, Jezusi doli menjëherë prej ujit. E, ja, iu hapën qiejt e ai pa Shpirtin e Hyut tue zbritë porsi pëllumb e tue ardhë mbi të.

¹⁷ Dhe, ja, një za prej qielli thoshte: «Ky asht im bir, i dashtuni, ai që më pëlqen».