Mateu 2 - Dhiata e Re në Gegnisht

Mbërritja e të urtëve

¹ Mbasi Jezusi u lind në Betlehem të Judesë, në kohën e mbretit Herod, ja, disa magjistarë nga lindja mbërritën në Jerusalem

² dhe pyetën: «Ku ndodhet mbreti i judejve, që ka lindë. Pamë yllin e tij në lindje dhe erdhëm me e adhurue».

³ Kur mbreti herod mori vesh, u tremb ai e mbarë Jerusalemi me të.

⁴ Bashkoi të gjithë kryepriftënt dhe shkrojsat e popullit, që të hulumtonin ku duhej të lindte Krishti.

⁵ Ata i thanë: «Në Betlehem të Judesë. Kështu shkruen profeti:

⁶ E ti, Betlehem, truell i Judesë, s'je kurrsesi ma i vogli ndër prijësit e Judës, se prej teje do të dalë një prijës, që do ta kullosë popullin tim, Izraelin».

⁷ Atëherë Herodi, tinëz, thirri magjistarët dhe mori vesh prej tyne me hollësi kohën kur ishte dukë ylli.

⁸ I nisi në Betlehem e u tha: «Shkoni e hetoni imtësisht për foshnjen. Sapo ta gjeni, më njoftoni, që të vij edhe unë me e adhurue».

⁹ Ndigjuen mbretin e shkuen. Dhe, ja, ylli që kishin pa në lindje po u printe, derisa erdhi e u ndal sipër vendit ku ishte foshnja.

¹⁰ Kur panë yllin, u banë shend e verë.

¹¹ Hynë në shtëpi dhe panë foshnjen me Marinë, nanën e tij. Atëherë u përkulën dhe e adhuruen. Hapen thesaret dhe i parashtruen dhurata: ar, kem e mirrë.

¹² Të joftuem në andërr mos me u kthye te Herodi, u larguen drejt vendit të tyne nëpër një tjetër rrugë.

Arratisja në Egjipt

¹³ Mbasi u nisën, ja, një engjëll i Zotit iu duk në andërr Jozefit e i tha: «Çohu, merr foshnjen me nanën e tij, shko në Egjipt e rri atje der kur të them unë. Herodi po e kërkon foshnjen për me e vra».

¹⁴ Ai u çue, mori foshnjen me të amën që me natë dhe u largue për në Egjipt.

¹⁵ Ndejti atje deri ku i erdhi fundi Herodit, që të plotësohej çka kje thanë prej Zotit me anë të Profetit: Prej Egjiptit e thirra tim bir.

Therja e foshnjeve

¹⁶ Kur Herodi e kuptoi se magjistarët ishin tallë me të, u tërbue së tepri dhe nisi një dërgatë me vra të gjitha foshnjet dy vjeç e poshtë, në Betlehem e në të gjitha rrethinat e tij, në përkim me kohën që e dinte hollësisht prej magjistarëve.

¹⁷ Atëherë u plotësue çka kje thanë prej Jeremisë profet:

¹⁸ Një za u ndie në Ramah, vaj e gjamë e madhe. Rakela vajton fëmijët e vet e nuk don me u ngushëllue, se nuk janë ma.

Kthimi nga Egjipti

¹⁹ Kur Herodit i erdhi fundi, ja, një engjëll i Zotit iu duk në andërr Jozefit, në Egjipt,

²⁰ e i tha: «Çohu, merr foshnjen me nanën e saj dhe shko në Izrael. Ata që kërkonin t'ia merrnin shpirtin foshnjes kanë vdekë».

²¹ Ai u çue, mori foshnjen me të amën dhe hyni në dheun e Izraelit.

²² Kur ndigjoi se Arkelau mbretnonte në Jude në vend të atit të vet Herodit, drujti me shkue atje. Atëherë u njoftue në andërr me shkue në krahinën e Galilesë.

²³ Shkoi e banoi në qytetin e quejtun Nazaret, që të plotësohej çka kje thanë prej profetëve: «Do të thirret nazareas».