Mateu 1 - Dhiata e Re në Gegnisht

Prejardhja e Jezu Krishtit

¹ Libri i prejardhjes së Jezu Krishtit, birit të Davidit, birit të Abrahamit.

² Abrahamit i lindi Isaku, Isakut i lindi Jakobi, Jakobit i lindi Juda me vëllaznit e vet.

³ Judës i lindi Faresi dhe Zarai, prej Tamarës. Faresit i lindi Esromi, Esromit i lindi Arami.

⁴ Aramit i lindi Aminadabi, Aminnadabit i lidi Naasoni, Naasonit i lindi Salmoni.

⁵ Salmonit i liondi Boesi, prej Rahabës. Boesit i lindi Jobedi, prej Rutës. Iobedit i lindi Jeseu.

⁶ Jeseut i lindi mbreti Davit. Davidit i lindi Salomoni, prej grues së Urisë.

⁷ Salomonit i lindi Roboami, Roboamit i lindi Abijai, Abijait i lindi Asafi.

⁸ Asafit i lindi Josafati, Josafatit i lindi Jorami, Joramit i lindi Ozia.

⁹ Ozisë i lindi Joatami, Joatamit i lindi Ahazi, Ahazit i lindi Ezekia.

¹⁰ Ezekisë i lindi Manaseu, Manaseut i lindi Amosi, Amosit i lindi Josia.

¹¹ Josisë i lindi Jehonia me vëllazën, gjatë shpërnguljes në Babiloni.

¹² Mbas shpërnguljes në Babiloni, Jehonisë i lindi Salamieli. Salamielit i lindi Zorobabeli.

¹³ Zorobabelit i lindi Abiudi, Abiudit i lindi Eliakimi, Eliakimit i lindiu Azori.

¹⁴ Azorit i lindi Sadoku, Sadokut i lindi Akimi, Akimit i lindi Eliudi.

¹⁵ Eliudit i lindi Eleazari, Eleazarit i lindi Matani, Matanit i lindi Jakobi.

¹⁶ Jakobit i lindi Jezefi, burri i Marisë, prej të cilës u lind Jezusi, i quejtuni Krisht.

¹⁷ Të gjitha breznitë nga Abrahami deri te Davidi janë katërmbëdhjetë brezni. Nga Davidi deri tek shpërngulja në Babiloni, katërmbëdhjetë brezni. Nga shpërngulja në Babiloni deri tek Krishti, katërmbëdhjetë brezni.

Të lindunit e Jezu Krishtit

¹⁸ Të lindunit e Jezu Krishtit ndodhi kështu: nana e tij, Maria, që ishte e fejueme me Jozefin, u gjet shtatzanë prej Shpirtit të Shenjtë para se ata të bashkoheshin.

¹⁹ Por, Jozefi, burri i saj, tue kenë i drejtë e tue mos dashtë me e poshtnue, mori vendimin me e nda tinëz.

²⁰ Kur po shkoqitte këto, ja që iu duk në andërr një engjëll i Zotit, që i tha: «Jozef, bir i Davidit, mos ki frikë me e marrë Marinë, gruen tande! Çka asht përftue në të asht prej Shpirtit të Shenjtë.

²¹ Ajo do të lindë një bir e ti venja emnin Jezus, se ai do ta shpëtojë popullin e tij prej mëkateve të veta».

²² Gjithë kjo ndodhi që të kryhej çka ishte thanë prej Zotit me anë të profetit, që kumton:

²³ «Ja, vasha do të mbesë shtatzanë, do të lindë një bir dhe do t'ia vejnë emnin Emanuel, që e përkthyeme do me thanë "Hyu me ne"».

²⁴ Kur Jozefit i doli gjumi, veproi si e kishte urdhnue engjëlli i Zotit. E mori gruen e vet

²⁵ dhe nuk e preku, deri kur lindi birin. Atij ia vuni emnin Jezus.