Ezekiel 1 - KITAWO MALEŊ Catholic

Menyirok pa Were marapena ri Ezekiel

¹ K'abic ma dwe mar'aŋwen ma oro piero adek, kareno anitie i dier jotwec i thengi malawa Kebar, polo oyawere, aka aneno menyirok pa Were.

² K'abic ma dwe, oyido obedo oro mar'abic ma bedo i twec pa Kere Yehoyakin.

³ Wac pa Rwoth obino ri jacway ri Were i wi migam, Ezekiel wod pa Buzi, i lowo pa Jobabilon i thengi malawa Kebar; aka cingi Rwoth oyido nitie kwoŋ go.

⁴ Paka aŋiyo, neni koyo madwoŋ obino wok yumalo, pondeponde madwoŋ gi mac ma minyin kodi lero mere thoko, aka wok i dier mac oyido nitie gima cale gima pilin.

⁵ Wok i diere oyido nitie gima cale cwec makwo aŋwen. Cal pajo oyido obedo apa dhano.

⁶ Kisi acel oyido nitie gi nyime aŋwen kodi bwombe aŋwen.

⁷ Tiendi jo oyido otire, par tiendi jo oyido cal gi par tiendi nyathi dhiaŋ; aka oyido jopilin paka ywel m'oyuy.

⁸ I pendi bwombi jo aŋwen je, oyido nitie cingi dhano; aka cwec aŋwen je oyido jonitie gi waŋ jo aŋwen kodi bwombi jo aŋwen.

⁹ Bwombi jo ogeyere, aka kisi acel odhire tirtir makiwire, kareno kadho yu kama waŋe nitie iye.

¹⁰ Waŋ jo oyido cal waŋ dhano, aka yuracuc pajo oyido jonitie gi waŋ simbwor, yuracam waŋ dhiaŋ ma roya, kodi waŋ ango.

¹¹ Waŋ jo kodi bwombi jo oyido otiŋere malo, kisi cwec ogeyo bwombi nyawote gi bwombe ario, aka oumo delkwoŋe gi bwombe ario man.

¹² Jodhire tirtir i thenge ma waŋ jo ŋiyo, kadho yu kama cuny kadh'iye ma jokiwire.

¹³ I dier cwec makwo aŋwen oyido nitie gima cale cuk mac m'okur, paka talin ma idho malo aka loro piny, mac oyido ler swa aka lithkoth owok'iye.

¹⁴ Cwec makwo oyido joidho malo aka joloro piny paka lithkoth.

¹⁵ Paka aŋiyo cwec makwo aŋwen, aneno lipangala acel ocungo i lowo i thengi cwec makwo, acel ri kisi acel kwoŋ jo.

¹⁶ Cal kodi tim ma lipangala me oyido cale telin ma pilin; cwec aŋwen je oyido jonitie gi lipangala macale, aka tim mere oyido cale lipangala m'olwow i wi man.

¹⁷ Munyo jodhire, jodhire i thenge aŋwen je ma jokiwire.

¹⁸ Ligongolo pajo oyido bor aka bwoko jo, kwoŋbedo oyido opoŋ waŋ jo thoko.

¹⁹ Ka cwec makwo jodhire, lipangala bende jodhire, aka ka cwec joay malo wok piny, lipangala bende joay malo.

²⁰ Kama cuny okadh'iye ama bende cwec jokadho, aka lipangala oluwo jo; kwoŋbedo cuny pa cwec makwo oyido nitie i lipangala.

²¹ Ka jodhire, jodhire kiromo, ka jocungo, jocungo kiromo; aka ka joay malo, joay malo wok piny kiromo, aka lipangala bende joay kwoŋbedo cuny pa cwec makwo oyido nitie i lipangala.

²² I wi cwec makwo oyido nitie gima cale pi m'omakere matek, ma pilin paka pe aka bwoko jo.

²³ I pendi pi m'omakere matek bwombi jo oyare m'otire, ka geyo bwombi nyawote, aka kisi acel oumo delkwoŋe gi bwombe ario.

²⁴ Ka jodhire awinjo derino ma bwombi jo paka derino ma nam, paka dwondi Jameni Je, kodi derino ma kambi pa jolweny. Ka jocungo jodolo bwombi jo.

²⁵ Kenyo dwondi owok malo ma pi m'omakere matek i wi jo, munyo jocungo to jodolo bwombi jo.

²⁶ I wi pi m'omakere matek i wi jo, oyido nitie gima cale kom ma dhum, paka gima cale tele ma pilin, aka i wi kom ma dhum oyido nitie gima cale dhano.

²⁷ Aneno gima cale gima pilin, aka gima cale mac oumo thoko, aka wok i gima cale piere kadho malo kodi loro piny, aneno gima cale mac aka lero mere othoko.

²⁸ Paka cal ma lifudo i pondeponde i ndelo ma koth, apaka cal ma lero thoko oyido nitie. Me oyido cal madwoŋ pa Rwoth. Munyo aneno, apodho piny gi nyiman, aka awinjo dwondi dhano luwo.