માથ્થી 26 - ડાંગી નવા કરાર

ઈસુને ઈરુદ કાવતરા

¹ ઈસુ યો અખા ઉપદેશ પુરા કરના તાહા, તો તેને ચેલા સાહલા સાંગ,

² દોન દિસ માગુન પાસખાના સન આહા તી તુમાલા માહીત આહા, તે વખત માનુસના પોસા ઈસુલા કુરુસવર મારી ટાકુલા સાટી ધરી દીજીલ.

³ માગુન મોઠલા યાજકસી અન લોકાસે વડીલ, અખા અખેસે કરતા મોઠા યાજક કાયાફાસને ઘર ગોળા હુયનાત.

⁴ અન ઈસુલા કીસાક કરી ઠગીની ધરીની મારી ટાકુ ઈસી ગોઠવન કરનાત.

⁵ પન તે સાંગત, સનને સમયમા આપલે તીસા નોકો કરુ, કાહી ઈસા નીહી હુય કા લોકાસાહમા ભાનગડ હુયી જા.

બેથનીયામા ઈસુને ડોકીવર અત્તર ઉબરા

⁶ ઈસુ બેથાનિયા ગાવમા સિમોન જો પુડ કોડ રોગવાળા હતા તેને ઘરમા હતા.

⁷ ઈસુ ખા હતા તાહા એક બાયકો પકા માહાગ સુગંદી અત્તરની એક સીસી લી આની, અન તી અત્તરલા ઈસુને ડોકીવર ઉબરની.

⁸ ચેલા તી હેરીની રગવાયનાત, તે સાંગત, કાહા ઈસા વારાવર ઉબરી ટાકની?

⁹ તેને કરતા તી અત્તર ઈકી દેતી ત પકા પયસા મીળતાત અન તે અત્તરના પયસા ઈકી ન ગરીબ લોકાસાહમા તેલા વાટી દેવાયતાત ત કોડાક બેસ!

¹⁰ જી સાંગત તી જાનીની ઈસુ તેહાલા સાંગહ, કાહા તુમી યે બાયકોલા દુઃખી કરતાહાસ? યી ત માને સાટી બેસ કામ કરનીહી.

¹¹ ગરીબ લોકા તુમને હારી કાયીમ આહાત. પન મા ત તુમને હારી કાયીમ નીહી રહા.

¹² તીની જી અત્તર માવર ઉબરનીહી તી માને મરનને પુડ માલા મસાનમા પુરુલા સાટી તી માવર ઉબરનીહી.

¹³ મા તુમાલા ખરા જ સાંગાહા કા, અખે દુનેમા જઠ જઠ માને બેસ ગોઠના પરચાર કરતીલ, તઠ યે બાયકોની જી કરા તે સાટી લોકા તીલા આઠવન કરતીલ.

ઈસુલા ધરી દેવાડુલા યહૂદા તયાર હુયનેલ

¹⁴ તાહા યહૂદા ઈશ્કારિયોત જો બારા ચેલા માસુન એક હતા, તો મોઠલા યાજક સાહપાસી ગે.

¹⁵ તો તેહાલા સોદ, મા ઈસુલા ધરી દીન ત માલા કાય દેસેલ? તેહી તેલા ચાંદીના તીસ રુપે દીદાત.

¹⁶ તઠુન તો ઈસુલા ધરી દેવલા કદવ તક મીળીલ તેની વાટ હેર હતા.

પદરના ચેલાસે હારી પાસખાના જેવન

¹⁷ ખમીર વગરની ભાકરના સનને પુડલે દિસ, ચેલા ઈસુ પાસી યીની સોદત, તુને સાટી પાસખાના સનના જેવનની તયારી કઠ કરુ?

¹⁸ તાહા ઈસુની સાંગા, સાહારમા અમુક માનુસ પાસી જાયની સાંગજા કા, ગુરુજી સાંગહ, માના સમય આગડ યી ગે. મા માને ચેલાસે હારી તુને ઘરમા પાસખાના સન પાળુલા આહાવ.

¹⁹ ઈસુ સાંગનેલ તે પરમાને ચેલાસી કરા, અન પાસખાના સનના જેવન તયાર કરનાત.

²⁰ જદવ એળ પડની તાહા ઈસુ બારા ચેલાસે હારી ખાવલા બીસના.

²¹ જદવ તે ખા હતાત તાહા ઈસુની સાંગા, મા તુમાલા ખરા જ સાંગાહા, તુમને માસલા એક જન માલા ધરી દીલ.

²² તી આયકીની ચેલા ખુબ દુઃખી હુયનાત, અન એકને માગુન એક તેલા સોદુલા લાગનાત, પ્રભુ કાય તો મા આહાવ?

²³ તાહા ઈસુ સાંગ, જો માને હારી ઠાળીમા હાત ટાકી તેના કુટકા બુડવહ તોજ માલા ધરી દીલ.

²⁴ માનુસના પોસાને બારામા જીસા પવિત્ર સાસતરમા લીખેલ આહા તીસા જ તો જાહા ખરા, પન તે માનુસલા મોઠામા મોઠી શિક્ષા કરીલ, જો માલા દગા દેહે, જર તે માનુસના જલમ જ નીહી હુયતા ત તેને સાટી બેસ હુયતા.

²⁵ તાહા ધરી દેનાર યહૂદા ઈશ્કારિયોત સાંગ, ગુરુજી કાય તો મા આહાવ? તાહા ઈસુની સાંગા, તુ તી પદર જ કબુલ કરનાસ.

પ્રભુ ભોજનની શુરુઆત

²⁶ તે ખા હતાત તાહા ઈસુની ભાકર લીદી, દેવલા આભાર માનીની મોડી, ચેલાસાહપાસી પાસી દીની સાંગના, યી લે અન ખા, યી ભાકર માના શરીર આહા.

²⁷ માગુન દારીકાના રસ હતા તી વાટકી લીદી, દેવલા આભાર માનીની ચેલાસાહપાસી પાસી દીની સાંગના, તુમી યે માસલા દારીકાના રસ પીલે.

²⁸ યો દારીકાના રસ માના રગત આહા, તેકન દેવના નવા કરાર નકી હુયહ, અખે લોકા સાહલા પાપની માફી મીળુલા સાટી માના બલિદાન હુયી જાયીલ.

²⁹ મા તુમાલા સાંગાહા,કા યેને માગુન, મા તે દિસ પાવત દારીકાના રસ ફીરી કદી નીહી પેનાર જાવ સુદી મા તુમને હારી દેવના રાજમા નવા દારીકાના રસ નીહી પે.

³⁰ તાહા ઈસુ અન તેના ચેલાસી સ્તુતિના ગાના લાવી ન જયતુન ડોંગરવર ચડી ગેત.

પિતર નકાર કરીલ ઈસા ઈસુ સાંગ

³¹ તાહા ઈસુની તેહાલા સાંગા, “તુમી અખા આજ રાતના માલા સોડીની પોળી જાસેલ કાહાકા પવિત્ર સાસતરમા ઈસા લીખેલ આહા મા બાળદીલા મારી ટાકીન, અન ટોળાના મેંડાસા પીરકાંડા હુયી જાયીલ.”

³² પન મા મરેલ માસુન જીતા ઉઠીન તેને માગુન તુમને પુડ ગાલીલ વિસ્તાર જાયીન અન તઠ મીળીન.

³³ તાહા પિતર તેલા સાંગહ, યે અખા તુલા ટાકીની પોળી જાતીલ તરી મા તુલા ટાકી નીહી પોળા.

³⁴ તાહા ઈસુ પિતરલા સાંગહ, મા તુલા ખરા જ સાંગાહા, કોંબડા આરવીલ તેને પુડ આજ રાતના જ તુ માલા નીહી વળખ ઈસા તીન વાર સાંગસી.

³⁵ પિતર તેલા સાંગહ, ઈસા કદી નીહી હુય, જો માલા તુને હારી મરુલા બી પડીલ તરી મા કદી નીહી સાંગા, અન બાકીના ચેલાસી બી ઈસા જ સાંગા.

ગેથસેમાને વાડીમા ઈસુની પ્રાર્થના

³⁶ માગુન ઈસુ તેને ચેલાસે હારી ગેથસેમા નાવને એક જાગામા ગેત, તઠ તો તેહાલા સાંગ, તુમી અઠ બીસી રહા, જાવધર મા પ્રાર્થના કરાહા તાવધર અઠ બીસી રહા.

³⁷ અન ઈસુ પિતર, ઝબદીના દોન પોસા સાહલા તેને હારી લી ગે, તેને મનમા પકા જ દુઃખી અન આકુળ નીકુળ હુયુલા લાગના.

³⁸ અન તો તેહાલા સાંગ, “મા પકા દુઃખી આહાવ, યી ઈસા આહા માની લે કા માના જીવ નીંગી રહનાહા. તુમી અઠજ રહા અન જાગતા રહા.”

³⁹ તઠુન જરાક દુર જાયની જમીનવર ઉબડા પડીની ઈસી પ્રાર્થના કરના કા, ઓ માના બાહાસ, તુના ઈચાર હવા ત યો દુઃખના પેલાલા મા પાસુન દુર કર, તરી પન માની મરજી નીહી પન તુની મરજી પુરી હુય.

⁴⁰ માગુન તો ચેલાસાહપાસી આના, અન તેહાલા નીજતા હેરના, અન તેની પિતરલા સાંગા, કાય તુમાલા માને હારી એક કલાક પન જાગતા નીહી રહાયજીલ કાય?

⁴¹ જાગતા રહા અન પ્રાર્થના કરતા રહા કા તુમી પરીક્ષામા નીહી પડા. કાહાકા આત્માલા બળ આહા પન શરીર દુર્બળ આહા.

⁴² દુસરે વખત તો જાયની ઈસી પ્રાર્થના કર કા, ઓ માના બાહાસ, યી દુઃખની વાટકી મા પેવલા વગર દુર નીહી કરી સકાય જ ઈસા તુના ઈચાર હવા ત તુની મરજી હવી તીસાજ હુયુ દીજો.

⁴³ તો આજુ ફીરી આના અન ચેલા સાહલા નીજતા હેરના, કાહાકા તે પકા નીજમા હતાત.

⁴⁴ અન તેહાલા સોડીની ઈસુ આજુ ગે, તીસા જ સાંગીની તીસરી વાર પ્રાર્થના કરના.

⁴⁵ માગુન તો ચેલાસાહપાસી ફીરી આના, તેહાલા સાંગના, આતા નીજી રહા અન આરામ કરા. હેરા, માનુસના પોસાલા પાપી લોકાસે હાતમા ધરી દેવલા સમય આગડ યી ગે.

⁴⁶ ઉઠા, આપલે જાવ! હેરા, જો માલા ધરી દેવલા મદત કરી રહનાહા તો આગડ યી ગેહે.

ઈસુલા ધરી લીદા

⁴⁷ ઈસુ આજુ બોલ જ હતા, તોડેકમા યહૂદા ઈશ્કારિયોત જો બારા ચેલા માસુન એક હતા તો તઠ આના, તેને હારી મોઠલા યાજકસી અન સાસતરી લોકા અન વડીલ લોકાસી દવાડેલ દુસરા પકા લોકહી આનાત, તેહને હાતમા તલવાર અન ડેંગારા હતાત.

⁴⁸ ધરી દેનારની તેહાલા ઈસા સાંગેલ હતા કા જેલા મા સલામ કરીની મુકા દીન તો તોજ આહા, તેલા તુમી ધરી લીજા.

⁴⁹ યહૂદા લેગજ ઈસુને આગડ આના. “ઓ ગુરુજી, સલામ!” ઈસા સાંગીની મુકા દીના.

⁵⁰ ઈસુની તેલા સાંગા, “ઓ દોસતાર, જે કામ સાટી તુ આનાસ તી કામ તુ કરી ટાક,” તાહા તે યીની ઈસુવર હાત ટાકીની તેલા ધરી લી ગેત.

⁵¹ ઈસુને હારી હતાત તેહા માસલે એક જન તેની તલવાર કાડના, અન અખેસે કરતા મોઠા યાજકને ચાકરલા તોડના, તાહા તેના કાન કાપી ટાકના.

⁵² તાહા ઈસુની તેલા સાંગા, તુની તલવારલા ઠેવી દે. કાહાકા જે તેહને હાતમા તલવાર લેતાહા તે અખા તલવાર કનજ મરી જાતીલ.

⁵³ કાય તુ નીહી સમજસ કા, મા માને બાહાસલા વિનંતી કરી સકાહા, અન તો લેગજ સરગના દેવદુતસી બારા સિપાયને ટોળા કરતા વદારે માપાસી આતા જ ઊબા કરી દીલ?

⁵⁴ માગુન પવિત્ર સાસતરને તે ગોઠી કીસાક કરી પુરે હુયતીલ, જેમા લીખેલ આહા કા યી અખા ઈસે રીતે હુયુલા જરુરી આહા?

⁵⁵ માગુન ઈસુ તેલા ધરુલા આનલા તેહાલા સાંગ, ડાકુ સમજી ન ધરુલા ઈસા માલા ધરુલા સાટી તુમી તલવાર અન ડેંગારા લીની આનાહાસ કા? મા રોજદિસ મંદિરમા બીસીની સીકસન દે હતાવ તદવ તુમી માલા નીહી ધરસેલ.

⁵⁶ પન યી યે સાટી હુયના કા દેવ કડુન સીકવનારની સાસતરમા લીખી ઠેવેલ તે પરમાને હુયુલા સાટી, યી અખા હુયનાહા, માગુન અખા ચેલા ઈસુલા સોડી પોળી ગેત.

ધર્મપંચમા ઈસુ

⁵⁷ ઈસુલા ધરી લીનાત તે તેલા અખેસે કરતા મોઠા યાજક કાયાફાસને ઘર લી ગેત. તઠ વડીલ લોકા અન સાસતરી લોકા ગોળા હુયી ગેત.

⁵⁸ પિતર દુર-દુરહુન ઈસુને માગ-માગ અખેસે કરતા મોઠા યાજકસે ઘરને આંગનમા ગે. અન આંગનમા જાયની સિપાયસે હારી બીસના. આતા કાય હુયીલ તી હેરુલા ઈસા ઈચાર કરીની તો ચોકીદારસે હારી તાપુલા બીસના.

⁵⁹ મોઠલા યાજકસી અન યહૂદીસી મોઠી સભાના સભ્યો ઈસુલા મારી ટાકુલા સાટી તેને ઈરુદમા સાક્ષીને સોદમા હતાત.

⁶⁰ પકા લોકા પંચમા યીની ખોટી સાક્ષી દીનાત, તરી ઈસુલા મારી ટાકુલા સાટી કાહી જ ભુલ નીહી કાડાયજીલ, સેલે દોન જના આનાત.

⁶¹ તેહી સાંગા, દેવને મંદિરલા તોડી ટાકીની તીન દિસ માગુન ફીરીની મા બાંદીન ઈસી માલા શક્તિ આહા ઈસા યો સાંગનેલ.

⁶² તાહા અખેસે કરતા મોઠા યાજક ઉઠી ન ઈસુલા સોદ, યે લોકા તુને ઈરુદમા જી સાક્ષી દેતાહા, કાય યેના કાહી જવાબ તુને પાસી નીહી આહા?

⁶³ પન ઈસુ કાહી જ નીહી સાંગીલ, તાહા અખેસે કરતા મોઠા યાજક ફીરીની ઈસુલા સાંગ, જીતા દેવના વચન લીની તુલા મા સોદાહા, જો તુ દેવના પોસા ખ્રિસ્ત આહાસ ત આમાલા સાંગી દે.

⁶⁴ ઈસુની તેલા સાંગા તુ પદર જ સાંગનાસ તીસાજ, તુમી અખે સાહલા સાંગાહા, આતા માગુન માનુસના પોસા મોઠી શક્તિ, દેવને જેવે સવ બીસતા અન તેલા આકાશને આબુટવર યેતા તુમી હેરસેલ.

⁶⁵ તાહા અખેસે કરતા મોઠા યાજકની પદરના આંગડા ચીરી ટાકી ન સાંગના, “યો દેવની ટીકા કરનાહા, આતા આપાલા દુસરી સાકસીની જરુર નીહી આહા! તો પદરલા દેવ સારકા ગનહ તી તુમી નીરતાજ આયકનાહાસ.

⁶⁶ તુમાલા કીસાક લાગહ?” તાહા તેહી સાંગા, યેની ભુલ આહા, યો મરનની સજાને યોગ્ય આહા.

⁶⁷ માગુન તે તેવર થુકનાત, તેલા ધુમાવાની ઝોડનાત, અન થોડાક તેને કાનપટમા દીનાત,

⁶⁸ અન તે તેલા સોદનાત, ઓ ખ્રિસ્ત, કોન તુલા ઝોડના તી આમાલા સાંગ.

પિતર નકાર કરહ

⁶⁹ પિતર બાહેર આંગનમા હતા, તાહા એક દાસી તે પાસી યીની સાંગ, તુ ગાલીલ વિસ્તારને ઈસુ હારી હતાસ.

⁷⁰ પન તે અખેસે વંગ પિતરની ઈસા સાંગીન નકાર કરા, તુ કાય સાંગહસ તી મા ત નીહી જાના.

⁷¹ અન તો આંગનને તેહુન પડસાળીમા ગે, તાહા એક દુસરી દાસી તેલા હેરીની તઠ હતાત તેહાલા સાંગ, યોહી નાસરેથ ગાવને ઈસુ હારી હતા.

⁷² ફીરી પિતર ના પાડના, અન જીતા દેવની કીરે ખાયીની સાંગના, મા તે માનુસલા નીહી વળખા.

⁷³ જરાકવાર માગુન તે તઠ ઊબા હતાત તેહી પિતર પાસી યીની સાંગત, તુ ખરા જ તેહા માસલા એક આહાસ, તુને બોલીવરહુન આમાલા માહીત પડહ.

⁷⁴ તાહા પિતર સાંગ, જીતા દેવની કીરે ખાયીની સાંગાહા, મા તે માનુસલા નીહી વળખા, મા ખોટા બોલ હવાવ ત દેવ માલા શિક્ષા કરીલ, હોડેકમા કોંબડા આરવના.

⁷⁵ ઈસુની સાંગેલ તી પિતરલા આઠવ આના, કોંબડા દોનદા આરવીલ તેને પુડ તુ તીન વાર માના નકાર કરસીલ, તી આઠવ કરીની પિતર બાહેર જાયની સાતી ઝોડી ઝોડી ન રડુલા લાગના.