2 કોરિંથી 2 - ડાંગી નવા કરાર

પદરને માયાલા સાબિત કરુલા

¹ તે સાટી મા માને મનમા નકી કરનેલ કા તુમાલા દુઃખ દેવલા સાટી ફીરીવાર તુમા પાસી નીહી યે.

² કાહાકા જો મા તુમાલા દુઃખી કરીન, ત માલા સંતોષ દેનાર કોન રહીલ? ફક્ત તોજ માનુસ જેલા મા દુઃખ દીનાહાવ.

³ તે સાટી મા તુમાલા યી ગોઠ લીખનાહાવ, જેથી ઈસા નીહી હુય કા મા યે તાહા જેલા આનંદ મીળુલા પડ, મા તેનેકન ઉદાસ હુયા. કાહાકા માલા તુમને અખે સાહવર યે ગોઠની ખાતરી આહા, કા જદવ માલા આનંદ હુયીલ, ત તુમાલા અખે સાહલા આનંદ હુયીલ.

⁴ પકા દુઃખ અન મનના કષ્ટકન, મા આસોળા પાડી પાડી ન તુમાલા યી કાગદ લીખનેલ, તુમાલા દુઃખી કરુલા સાટી નીહી. પન યે સાટી કા તુમી તેલા પકા માયાકન જાની લે, જી માયા માલા તુમને સાટી આહા.

પાપીલા માફી

⁵ આતા જો કોની દુઃખી કરા હવા, ત માલા નીહી, પન થોડા-થોડા તુમાલા અખે સાહલા દુઃખી કરેલ આહા. (તેને બારામા મા તેના કરતા વદારે કાહી સાંગુલા નીહી માંગા.)

⁶ ઈસે માનુસલા જો દંડ તુમને માસુન વદારે વીસવાસી લોકાસી તેલા દીયેલ આહા, તી બરાબર આહા.

⁷ તે સાટી ઈસા કરુને કરતા યી બેસ આહા, કા તુમી તેના ગુના માફ કરા, અન તેલા દિલાસા દે. જો તુમી તેલા માફી નીહી દે ત કદાસ તો હોડા દુઃખી હુયી જાયીલ કા નીરાશામા હાર માનીની ખ્રિસ્તવર વીસવાસ કરુલા સોડી દે.

⁸ યે કારને મા તુમાલા વિનંતી કરાહા, કા તુમી તેલા દાખવા કા તુમી આતા બી તેવર માયા કરતાહાસ.

⁹ કાહાકા મા તુમાલા કાગદ યે સાટી લીખનેલ, કા મા તુમાલા પારખી લે. કા તુમી માને નિર્દેશલા પાળુલા તયાર આહાસ, કા નીહી.

¹⁰ જેલા તુમી માફ કરતાહાસ તેલા મા બી માફ કરાહા. કાહાકા માલા જી પન માફ કરુની જરુર હતી મા તુમને ભલાયને સાટી ખ્રિસ્તને અધિકારકન તી માફ કરનાહાવ.

¹¹ જેથી સૈતાન આપલે પરિસ્થિતિના કાહી લાભ ઉઠવી નીહી સક, કાહાકા આપલે તેને વેટ ઉદેશલા જાનજહન.

મકદોનિયા સાટી મૂસાફરી

¹² જદવ મા ખ્રિસ્તની બેસ ગોઠ આયકવુલા સાટી ત્રોઆસ સાહારમા આનાવ, ત પ્રભુની માલા બેસ ગોઠના પરચાર કરુલા સાટી મોઠી તક દીદી,

¹³ પન મા ખુબ જ દુઃખી હતાવ, યે સાટી કા મા માના ભાવુસ તિતસલા તુમા પાસુન બેસ નીરોપ લયતા નીહી હેરેલ. તે સાટી મા ત્રોઆસ સાહારને વીસવાસી સાહપાસુન વિદાય હુયીની તિતસલા ગવસુલા મકદોનિયા વિસ્તારમા ગેવ.

ખ્રિસ્તી સેવક

¹⁴ પન દેવલા ધન્યવાદ હુય, જો ખ્રિસ્તમા કાયીમ આપલા જીતમા લી જાહા, અન તેને ગેનની સુવાસ આપલે મારફતે દરેક જાગ પસરવહ.

¹⁵ કાહાકા આમી દેવમા તારન હુયનારા અન નાશ હુયનાર દોનીસે સાટી આપલે ખ્રિસ્તના સુવાસ આહાવ.

¹⁶ જે નાશ હુયી રહનાહાત, તેહને સાટી ત આમી મરનના વાસને સારકા આહાવ, અન જે તારન હુયી રહનાહાત તેહને સાટી જીવનના સુવાસ આહાવ. ખરેખર, કોની પન પદર જ યે સુવાસલા ફયલવુલા યોગ્ય નીહી આહા.

¹⁷ કાહાકા આપલે તે પકા લોકસે જીસા નીહી, જે ધનને સાટી દેવને વચનના પરચાર કરતાહા. પન આમી ખરે મનકન, દેવ સહુન દેવહારી આહા ઈસા જાનીની, ખ્રિસ્તને અધિકારને હારી બોલજહન.