Yakubu 5 - Dadiya NT

Ja Ga Nǝb Shilogɔ

¹ Jǝ́ nyʊwa jǝ́ nǝb shilogɔ! Jǝ́ ji wi, jǝ́ ga kwaalɨ a gaalan nɨ bɛ jem lɛɨ.

² Shilo jenɔ gwam kʊkɔ. Bʊntangɔ jam jam dwangtɨn jenɔ.

³ Kemʌn mʊn jenɔ jǝbɔ maalʊ jenɔ a ga bwatɛ. Bwatɛ nɨ nǝn gɔ nǝ nyiyo lɛ a dul jeni, wʊnɨ ja bʊtɔ jenɔ lɛ na kǝlaɨ. Jǝ́ mʊr dul jenɔ gǝm shilo a kum dɨltǝm nɨɨ.

⁴ Wi naan nǝb maajɨ nɨ a maa maajɨ a twam jen jǝ́ kɔ ywatǝm jini, a yɔ a daa Kwaama woi. Wi nǝb nɨ kʌso jem twam jenɔ lɛɨ, a la a daa Kwaama woi, Tɛlalɔ Nǝ Kwaan.

⁵ Jǝ́ yɨ yɨm a mʊgɔ lǝma a yooli. Jǝ́ ja lɛ jǝ́ nɔɔ lɛ kanga jǝ́ swɨ lɛɨ. Jǝ́ dʊʊla na yʊwaltɨn nɨ yam kum biyotǝm jinɔ lɛɨ.

⁶ Nǝbɔ dǝngdǝngɨ, jǝ́ mwatɨ jim borang bwɨla, jǝ́ jʌbo ji. Ja kɔ jen bɔ.

Kaam Kanjǝl Gʊtǝm Lɔlɔ

⁷ A dul kɛl nɨ kambɔ, jǝ́ yɨ yɨm kʊtǝm nǝl a yɔ nǝn a kwama Tɛlalɔ bɛm lɛɨ. Jǝ́ dʌng kʊtǝm nǝlɔ nǝ jʊngtǝm twamɔ gǝ maa lɛɨ, a yɔ nǝn a kwama nɨ twam gǝnɔ gǝ jǝgǝm dul lɛɨ. N kʊtǝm nǝl gǝ yam mwɛ kwala lɛ jǝbɔ mwɛ guli.

⁸ Jen tʌjen bɛ jǝ́ yɨ nǝn bwatǝm nǝl, jǝ́ kʊʊ nǝl, jʊ a bwɨɨ bɛtǝm Tɛlalɔɨ a dwama.

⁹ Kambɔ, jǝ́ bǝla kʊngatǝmɔ wo a kʊm jen, kage ja biyo jem borang. Nǝ biyotǝm borangɔ bɛ lɛ. N wɔ tɨm a nyanga kan.

¹⁰ Kambɔ, jǝ́ bwangtǝn nǝbkuwotǝmkǝga nɨ a sʊwa kɛl a dun Tɛlalɔɨ. Jǝ́ maa mɛlalɨ nǝn bwatǝm nǝl jinɔ a mʊgɔ gaalan nɨ.

¹¹ Nǝb nɨ a kʊ nǝlɨ, bǝ sʊwa bǝngɔ nǝb fulotǝm nǝl. Jǝ́ nyʊwa kɛl kʊtǝm nǝl Ayubaɨ. Jǝ́ nyǝm kanga Tɛlalɔ a nǝ gǝn bwili a dɨltǝmɨ, Tɛlalɔ n nǝ tɨkalɨ, n nǝ jitǝm bʊnǝn.

¹² Kɛtǝlam mɨ, jʊ a laa jǝlɨ, ka jǝ́ wɛɛl lɛ wɛɛlɨ nǝn dʌbʌl jǝbɔ tǝm, jǝbɔ kaa jǝl nyɔ. Bɛ jǝ́ sʊwa jengɔ, “Ɔɔ” na dǝngdǝngɨ. Jǝ́ sʊwa jengɔ, “Ɔ ɔ” na mɨ nyɨɨ, kage Kwaama a maa jem mwɛl.

Keli Nǝtǝm Bɨlǝngkɛl

¹³ Na kaa nǝl wo a kʊm jen a mʊgɔ gaalanɨ, bɛ ga maa keli. Na kaa wo a mʊgɔ fulotǝm nǝlɨ, bɛ ga ma nafɨ bǝlátǝm.

¹⁴ Na kaa wo a kʊm jen mɨ kwamɨgǝnɨ, bɛ ga jo nǝb dʊʊm mʊrkalɨ nǝb bwangtǝm Kwaamaɨ, ja maa gǝm keli, ya ja ya gǝm nwang lɛ a mʊgɔ dun Tɛlalɔɨ.

¹⁵ Keli nɨ ja maa a mʊgɔ nǝtǝm bɨlǝngkɛlɨ, gǝ gung gung nǝ bɔɔla. Tɛlalɔ gung gǝn gung. Na ga maa bwɨlangkɛlɨ, Tɛlalɔ kǝlǝm gǝm kǝlǝm.

¹⁶ A dul kɛl nɨɨ, ya jǝ́ sʊwaka bwɨlangkɛltɨn jenɔ lɛ, ya jǝ́ tɨkaka lɛ nǝn keli, sǝ Tɛlalɔ a gung jen. Keli nʊ nɨ dǝngdǝngɨ, maa maajɨ lɛ nǝn kwaan dangǝn.

¹⁷ Iliya n nǝfili na bǝn. A tɨ dangǝn a mʊgɔ keli gɔ, ka ja swiyo lɛ mwɛ a kwama. Mwɛmɔ a swiyo bɔ a tǝm gɔ jolɔ taal jǝbɔ bwaala nukun.

¹⁸ A yǝla maa keli, nǝngɔ mwɛmɔ a gǝla a dʌbʌl a swiyo a tǝmɔ gǝmɨ, tǝmɔ a jǝg jǝjalǝnɔ a bʊm.

¹⁹ Kɛtǝlam mɨ, na kaa win a kʊm jen a bǝla gola bɨlǝngkɛlɨ, bɛ kaa a kʊm jen a yǝla nǝn gɔ a gola.

²⁰ Bɛ ga nyǝm pʌd nʊ nɨ a yǝla nǝn nǝ bwɨlangkɛl a golaɨ, a bʊʊ nǝn kʊlɨ nǝ bwɨlangkɛl nɨ a bwaa, yǝlam gǝm gola kǝlǝmtǝm kʌm bwɨlangkɛltɨn gǝnɔ.