Yakubu 4 - Dadiya NT

Fwalɨ Yɨm Yooli

¹ N wɛ bɛ lɛ nǝn kɨlan jǝbɔ gʊbkatǝm a kʊm jeni? Mɨ nyǝmatǝm wo, jʊ bɛ lɛ nǝn kanjǝl nɨɨ n wɛltɨn nɨ ta kun nɛ a kʊm jeni.

² Jǝ́ saa saa kanjǝlɔ mɨ jǝ́ nya lɛ. Jǝ́ jʌ dul sǝ jǝ́ nya jʊ nɨ jǝ́ swɨ lɛɨ, mɨsɔ jǝ́ nya jʊ nɨ lɛ jǝ́ swɨ lɛɨ. Jǝ́ kona nu lɛ a dul jʊ kaamɨ nǝngǝnɨ, mɨsɔ yǝlam a jen nɛ. Jǝ́ maa kɨlan nɛ jǝbɔ gʊbkatǝm sǝ jǝ́ wɔɔm a daa ji woi. Jǝ́ nya nɨ, jʊ a bwɨɨ mɨ jǝ́ kela Kwaama lɛ.

³ Nǝn kwama jǝ́ kelaɨ, mɨsɔ jǝ́ nya lɛ jʊ a bwɨɨ mɨ jǝ́ kel lɛ a gola nyan. Jǝ́ swɨ lɛ jǝ́ jʌ kanjǝl nɨ jǝ́ nyaɨ, a kanjǝl bwɨla na nyʊwatǝm lǝma bʊtɔ jen.

⁴ Jǝ́ na na nǝb bulon! Jǝ́ nyǝm bɔ yǝlamtǝm fwalɨ yooligɨɨ win jǝbɔ maatǝm kii jǝbɔ Kwaamaɨ ka? A dul kɛl nɨ, nʊ nɨ a do swɨtǝm yoolii, a do dul gǝnɔ gǝ nǝ kii Kwaamaɨ.

⁵ Kɛl Kwaamaɨ a sʊwa gɔ, “Kwaama maa nungon nɛ a dʊʊmɨ nɨ ga dǝg a bʊtɔ bǝnɨ.” Jǝ́ kuwo lɛ mʊlalɨ kɛl Kwaamaɨ a sʊwa nǝn kwan ka?

⁶ Kwaama sʊ bǝm lǝma gǝnɔ lɛ a lada. N jʊ a bwɨ kɛl gǝnɔ a sʊwa gɔ, “Kwaama kɔ nǝ gungtǝm dul lɛ. A nʊ nɨ mɨ nǝn gungtǝm duli, Kwaama nǝ gǝn lǝma gǝnɔ lɛ.”

⁷ Bɛ jǝ́ nǝ dul jenɔ a daagɔ Kwaama woi. Jǝ́ kɔ Mammɔ. Mwal jen mwal.

⁸ Jǝ́ bɨtǝn a daagɔ Kwaama woi. Gǝ tǝgǝn bɨtǝn bɨ tʌgo a jen gǝm. Jǝ́ nǝb bwɨlangkɛlɔ, jǝ́ saalǝm kang jenɔ. Jǝ́ nǝb fentogɔ, jǝ́ saalǝm nǝl jenɔ.

⁹ Jǝ́ maa fitǝm nǝl, jǝ́ ji wi, jǝ́ kǝl mwɛ num. Bɛ dǝgɨ jenɔ a yǝlam wi, bɛ fulotǝm nǝl jenɔ a yǝlam kaltǝm nǝl.

¹⁰ Bɛ jǝ́ shig dul jenɔ a kǝga Tɛlalɔɨ. Gǝ tǝgǝn gung jen gung.

Ka Jǝ́ Yabka Lɛ Bwɨlangkɛl

¹¹ Kambɔ, ka jǝ́ tolka lɛ. Nʊ nɨ tuwo kɨla gɔ nǝ bwangtǝm lɛɨ, gǝ tuwo diil Kwaamaɨ. Nʊ nɨ maa kɨla gɔ gǝm borang lɛɨ, gǝ maa diil Kwaamaɨ gǝm borang. Na ń maa diil Kwaamaɨ gǝm borangɨ, mɨ mʊ bwangtǝn diil Kwaamaɨ lɛ. Ń nǝ diilɔ bwɨlangkɛl.

¹² Nǝn Kwaama kwaagɔ win nǝ diil lɛɨ. Nǝn gɔ kwaagɔ win maa borang lɛɨ. Nǝn gɔ kwaagɔ win bʊʊ lɛ nǝn nǝlɨ. Nǝn gɔ kwaagɔ win nǝn kwaan jʌtǝmɨ. A dul kɛl nɨɨ, nǝmɔ mʊ wo, mʊ la nyɔ, mʊ nǝ fwalɨ yɨm mʊnɔ bwɨlangkɛl lɛɨ?

Ka Jǝ́ Maa Lɛ Lɨyal Nǝn Fʌngɔ

¹³ Jǝ́ nyʊwa, jen nɨ jǝ́ sʊwa lɛ jengɔ, “Na ke bɔ dwiyeni, fʌng bǝ shu shu a kaa tuulɔ, bǝ maa jolɔ win, bǝ ja gamdʌbo lɛ, bǝ nya sʊtǝm lɛ.”

¹⁴ N wɔ jǝ́ nyǝm bɔ jʊ bwɨ lɛ fʌngi. Mǝ nɔɔ, jǝ́ nyǝm kum jenɔ ka? Na kaa jǝl na sɛyʊwa, wʊnɨ gǝ nʊng dul gǝnɔ lɛ a kǝlɨ kwamaɨ, a yǝla a lɛlamɨ.

¹⁵ A bʊm nyɔ jǝ́ sʊwa jengɔ, “Na Tɛlalɔ a jǝlaɨ, bǝn a mʊgɔ nǝb nɨ nǝn kʊlɨɨ, bǝ maa jʊ nɨ jǝbɔ jʊ nɨ.”

¹⁶ N wɔ kǝngkǝnɨ jǝ́ lɨyal lɛ a jʊ nɨ jǝ́ maa lɛɨ. Maatǝm lɨyal nɨ, n maajɨ shil.

¹⁷ Nʊ nɨ a nyǝm jʊ nɨ a bʊm gǝ maa lɛɨ, a kɔ maatǝmɨ, a yǝlam gǝm bwɨlangkɛl.