Yakubu 3 - Dadiya NT

Nǝ Bwangtǝm Jǝbɔ Ben Gǝnɔ

¹ Kɛtǝlam mɨ, ka kɔrɔ jenɔ ya yǝlam lɛ nǝb mɛlalɨ, jǝ́ nyǝm nyɔ bǝn nɨ bǝ maa mɛlalɨ lɛɨ, jǝ maa bǝm borang a shilo a laa a tangǝn nǝbɨɨ.

² Pʌd bǝnɔ bǝ maa bwɨlangkɛl. Na kaa nǝl a maa bɔ bwɨlangkɛl a sʊwatǝm kɛlɨ, gɔ n nʊ nɨ dǝngdǝngɨ, dwal dwal a tɔɔ bʊtɔ gǝnɔ gwam.

³ Bǝ dǝg dǝg tʊwagɔ gǝm kung a nyiyo sǝ a bwang bǝm. Maatǝmɔ nyɨɨ dǝg dǝg bʊtɔ tʊwagɔ gwam a maa jʊ bǝ swɨ lɛɨ.

⁴ Jǝ́ dʌng tɨyamwɛngtɨnɔ. Ja dʊʊla nyɔ, n yʊwa kwamɨ yɔ lɛ nǝn ji suli, n kǝlɨ bɛ dwam mǝgtǝm nǝ mǝgtǝmɔ gǝ yǝla gǝn nɛ nǝn a daa nɨ gwam ga swɨɨ.

⁵ Benɔ gǝ na nyɔ. N kǝlɨ bɛ jǝl a mʊgɔ jinʌn bʊtɔ, gǝ swɨ maatǝm lɨyal a kanjǝl dʊʊlantɨn. Jǝ́ dʌng kanga kǝlɨ kǝlagɔ na ja kuli gǝ twɨm kuulɔ lɛ gwamɨ.

⁶ Ben nǝlɨ n kǝla. N bwɨlang yooli a mʊgɔ bʊtɔ bǝn! Benɔ gǝ kal kal nǝl gwam a mʊgɔ yɨm gǝnɔ gǝm. Benɔ dul gǝn lɔ kǝla kul gǝm kǝla lɛɨ.

⁷ Nǝfitʌmɔ gǝ mɛl mɛl yʊwaltɨnɔ, jǝbɔ lǝbɨtɨnɔ, jǝbɔ namtɨn nɨ wuul lɛ nǝn fʌli, jǝbɔ jʌngigɔ.

⁸ A benɔ mɨ nʊ nɨ wo dwal lɛ a mɛl gǝnɨ. Benɔ n bwɨlang jǝl. Mɨ nǝn fǝbtǝm. A yii nǝn twalǝm nɨ gǝ maa jʌtǝm lɛɨ.

⁹ Bǝ bǝlá Tɛlalɔ wʊnɨ nǝn Tɛtɛ bǝnɨ nǝn ben bǝnɔ. Nǝn gɔ tag bǝ tuwolam nǝb lɛ nǝnɨ, wʊnɨ Kwaama a fwal a mʊgɔ jelkatǝm gǝnɨ.

¹⁰ Nǝn nyiyo gɔ win bǝ maam bǝlátǝm lɛɨ, nǝn gɔ tag bǝ tuwolam nǝb lɛɨ. N wɛ kɛtǝlam mɨ! A bʊm nyɔ ka?

¹¹ Laa mwɛmɔ win, gǝ jǝg jǝg mwɛ denden jǝbɔ mwɛ tuuli daagɔ win ka?

¹² Kɛtǝlam mɨ, tɨya dʌfeng gǝ tʊʊ tʊʊ tʊʊl zaitun ka? Tɨya fogfogi gǝ tʊʊ tʊʊ tʊʊl dʌfeng ka? Laa mwɛ nɨ jǝg mwɛ mam lɛɨ, mɨsɔ jǝg mwɛ denden nɛ.

Yʊlan Nyan Nɨ A Bɛ A Dʌbʌli

¹³ Nʊ nɨ nǝn yʊlan jǝbɔ nyǝmtǝm a kʊm jeni, bɛ ga nʊng a gola yɨm nyan jǝbɔ maajɨ nyan. Bɛ ga maa nǝn yʌbtǝm dul, wʊnɨ jǝ nya lɛ a mʊgɔ yʊlanɨ.

¹⁴ A mʊgɔ nǝl jen, na jǝ́ maa nungon nɛ jǝbɔ swɨtǝm duli, ka jǝ́ maa lɛ lɨyal jengɔ jǝ́ nǝn yʊlan, ka jǝ́ bǝm lɛ bɨlǝngkɛlɔ.

¹⁵ Yʊlan nɨ ke bɔ a wʊnɨ gǝla lɛ a dʌbʌli, na a yooli nɨɨ. Ke bɔ a sagsag, na a mammɨ.

¹⁶ Daa nɨ gwam nungonɔ wo jǝbɔ swɨtǝm duli, n daagɔ kʊkkatǝmɔ jǝbɔ kanjǝl shilɔ wo gwamɨ.

¹⁷ A yʊlan nɨ a bɛ a dʌbʌli nǝn gɔ a yɔ nǝn bǝn nǝn tɨkǝga a sagsagɨɨ, nǝngɔ bɛ lɛ nǝn yɨm kwamɨgǝnɨ, jǝbɔ yʌbtǝm dul, jǝbɔ shigtǝm dul, jǝbɔ jitǝm bʊnǝn wʊnɨ maa jǝ nya lɛɨ. Mɨ nʊng swɨtǝm dul lɛ jǝbɔ maatǝm fento.

¹⁸ Nǝb mʊrkatǝm yɨm kwamɨgǝnɔ nɨ a kwal a mʊgɔ yɨm kwamɨgǝnɨ, jǝ kʌso maajɨ dǝngdǝng.